ހޯޗީމިން ސިޓީގައި ދެ ފާރު ދޭތެރޭގައި ތާށިވި 9 އަހަރުގެ ކުޑަކުއްޖަކު، ކައްކާ ތެޔޮ ބޭނުންކޮށްގެން ސަލާމަތްތެރިކަމާއެކު ފަޔަރ ފައިޓަރުން ސަލާމަތްކޮށްފިއެވެ. މި ހާދިސާ ހިނގާފައިވަނީ މިދިޔަ މާރިޗު މަހުގެ 25 ވަނަ ދުވަހުއެވެ.
ޓްރަން ކުއޮކް ދަޓް ނަމަކަށް ކިޔާ މި ކުއްޖާ، އޭނާގެ ބުޅާ ހޯދުމަށްޓަކައި ގާތްގަނޑަކަށް 4 މީޓަރު އުސްމިނުގައި ހުރި ޓިނު ފުރާޅަކަށް އެރީ އެދުވަހުގެ ހެނދުނު 10 ޖަހާކަންހާއިރުއެވެ. ފުރާޅުމަތީގައި އުޅުމުގެ ތެރޭގައި ކުއްޖާ ކައްސާލައިގެން ވެއްޓުނީ ދެ ގޭގެ ދޭތެރޭގައި އޮތް އެންމެ 20 ސެންޓިމީޓަރުގެ ހަނި ހުސްތަންކޮޅެއްގެ ތެރެއަށެވެ.
އެ ކުއްޖާ ވެއްޓި ޖެހުނީ ދެ ގޯތި ވަކިކުރުމަށް ކުރިން ޖަހާފައިހުރި ފާރެއްގެ ކޮންކްރީޓް ބިންގަލެއްގެ މަތީގައެވެ. ސަލާމަތްވުމަށްޓަކައި އެ ކުއްޖާ ކުރި މަސައްކަތުގެ ސަބަބުން، ދެ ފާރު ދޭތެރޭގައި އޭނާ އިތުރަށް ބާރުވުން ނޫން ކަމެއް ނުވިއެވެ. އަވަށްޓެރިން އެހީތެރިވާން މަސައްކަތް ކުރި ނަމަވެސް، ކުއްޖާއަށް އަނިޔާއެއް ނުވާނޭހެން އެތަނުން ނެރެވޭ ގޮތެއް ނުވިއެވެ.
މި ހާދިސާގެ ރިޕޯޓް ލިބުނުތާ 20 މިނެޓެއްހާއިރު ތެރޭގައި ހޯޗީމިން ސިޓީގެ ފުލުހުންގެ ފަޔަރ އެންޑް ރެސްކިއު ޓީމުގެ އޮފިސަރުން އެ ސަރަހައްދަށް ދިޔައެވެ. ފުރަތަމަ އެމީހުން ގަސްދުކުރީ ފާރު ތޮރުފައިގެން ނުވަތަ ބުރިކޮށްލައިގެން ކުއްޖާ ނެރުމަށެވެ. ނަމަވެސް، އެފަދަ ބަރު ސާމާނު ބޭނުންކޮށްފިނަމަ، އެހާ ހަނި ތަންކޮޅެއްގައި އޮތް ކުއްޖާއަށް އަނިޔާއެއް ވެދާނެތީ އެ ނިންމުން ބަދަލުކުރިއެވެ.
އޭގެ ބަދަލުގައި، ރެސްކިއު އޮފިސަރުން ނިންމީ ކުއްޖާގެ ގައިގައި ކައްކާ ތެޔޮ އުނގުޅައިގެން، ގައި އޮމާންކޮށްގެން ބޭރަށް ދަމައިގަތުމަށެވެ. މިގޮތުން ވާ ބޭނުންކޮށްގެންނާއި އަތުން މަޑުމަޑުން ހިފާ ދަމައިގެން އެ ކުއްޖާ ސަލާމަތްކުރުމުގެ މަސައްކަތް ކުރިއަށް ގެންދިޔައެވެ. މި މަރުހަލާގައި ކުއްޖާ ހަމަހިމޭންކޮށް ބޭއްވުމަށާއި، ވަރުބަލިވިޔަ ނުދިނުމަށްޓަކައި އޮފިސަރުން ދިޔައީ އޭނާއަށް ފެން ބޯންދެމުންނެވެ.
ގާތްގަނޑަކަށް 20 މިނެޓުގެ މަސައްކަތަށްފަހު، ދަޓް ވަނީ އެއްވެސް ނުރައްކަލެއް ނެތި ސަލާމަތްކުރެވިފައެވެ. މި ހާދިސާގައި އޭނާގެ ހަށިގަނޑުގެ ބައެއް ތަންތަން ކުޑަކޮށް މަށައިގެން ދިޔުން ފިޔަވައި، ސިއްހީ ބޮޑު އެއްވެސް މައްސަލައެއް ކުރިމަތިވެފައެއް ނުވެއެވެ.
