މޯބައިލް ފޯނު ބޭނުންކުރުމުގެ ސަބަބުން ކުޑަކުދިންގެ ހަށިގަނޑަށް ކުރާ އަސަރުތަކާ މެދު އޮންނަ ކަންބޮޑުވުންތައް ދަނީ އިތުރުވަމުންނެވެ. ދިރާސާތަކުން ދައްކާ ގޮތުގައި، ބޮޑެތި މީހުންނާ އަޅާބަލާއިރު ކުޑަކުދިންގެ ހަށިގަނޑު އަދި ފުރިހަމައަށް އުފެދިފައި ނުވާތީ، ފޯނުން ބޭރުކުރާ “ރޭޑިއޯ ފްރީކުއެންސީ” (އާރް.އެފް) ހަކަތަ އެކުދިންގެ ހަށިގަނޑަށް ދަމައިގަންނަ މިންވަރު އިތުރެވެ.
2011 ވަނަ އަހަރު “އިލެކްޓްރޯމެގްނެޓިކް ބަޔޮލޮޖީ އެންޑް މެޑިސިން” މަޖައްލާގައި ޝާއިޢުކުރި އޯމް ޕީ. ގާންދީގެ ދިރާސާއެއްގައިވާ ގޮތުން، ކުޑަކުދިންގެ ބޮލުގެ ނާށިގަނޑު ތުނިވެފައި ބޯ ކުޑަވުމުގެ ސަބަބުން، ބޮޑެތި މީހުންނަށްވުރެ ދެގުނަ އިތުރަށް ސިކުނޑީގެ ޓިޝޫތަކަށް ރޭޑިއޭޝަން ދަމައިގަނެއެވެ. އަދި ކަށީގެ މަދަށް މި އަސަރު 10 ގުނަ އިތުރަށް ކުރާކަމަށް ފާހަގަކޮށްފައިވެއެވެ.
މީގެ އިތުރުން، 2018 ވަނަ އަހަރު “އެންވަޔަރަންމަންޓަލް ރިސާޗް” އިން ކުރި މުތާލިއާއަކުން ދައްކާ ގޮތުގައި، އެއް މިންވަރަކަށް ފޯނަށް ހުށަހެޅުނު ނަމަވެސް، ކުޑަކުދިންގެ ސިކުނޑިއަށް ރޭޑިއޭޝަން ދަމައިގަންނަ މިންވަރު 50 އިން 60 އިންސައްތައަށް އިތުރެވެ.
އެހެންނަމަވެސް، “ނޭޝަނަލް ކެންސަރ އިންސްޓިޓިއުޓް” ފަދަ ޞިއްޙީ އިދާރާތަކުން ބުނާ ގޮތުގައި، ފޯނު ބޭނުންކުރުމާއި ސިކުނޑީގެ ކެންސަރާ ސީދާ ގުޅުމެއް އޮތްކަމުގެ ސާފު ހެއްކެއް އަދި ފެންނާކަށް ނެތެވެ. އެކަމަކު މިކަމުގެ ދިގު މުއްދަތުގެ އަސަރުތައް އަދިވެސް ދަނީ ދިރާސާ ކުރެވެމުންނެވެ. މާހިރުން ފާހަގަކުރައްވާ ގޮތުގައި މިއީ ހަށިގަނޑަށް ރޭޑިއޭޝަން އެކްސްޕޯޒްވާ މިންވަރު އިތުރުވުމެވެ. މިއީ ސީދާ ގެއްލުމެއް ލިބޭނެކަމުގެ ކަށަވަރު ހެއްކެއް ނޫނެވެ. އެހެންކަމުން މިކަމުގައި ބިރުވެރިކަން އުފެދޭ ފަދަ ވާހަކަތައް ނުފެތުރުމަށް އިރުޝާދު ދެއެވެ.
🧠 ރައްކާތެރިކަމުގެ ގޮތުން ކުރެވިދާނެ ކަންތައްތައް:
• ސްޕީކަރުގައި ބަހައްޓައިގެން ނުވަތަ އިއަރފޯނު ބޭނުންކޮށްގެން ވާހަކަދެއްކުން.
• ފޯނުން ވާހަކަދައްކާ ވަގުތު ކުރުކުރުން.
• ފޯނު ސީދާ ކަންފަތުގައި ޖައްސައިގެން ހުރުމުގެ ބަދަލުގައި ދުރުގައި ބެހެއްޓުން.
މިކަމާ ގުޅޭ ދިރާސާތައް ކުރިއަށްދާއިރު، މާހިރުން ލަފާދެއްވަނީ ބިރުގަނެ ހާސްވުމުގެ ބަދަލުގައި، ހޭލުންތެރިކަމާއެކު ފޯނު ބޭނުންކުރުމަށެވެ. ޚާއްޞަކޮށް ކުޑަކުދިން ފޯނު ބޭނުންކުރުމުގައި މި ފަރުވާތެރިކަން ބެހެއްޓުން މުހިންމެވެ.
