އުމުރުން އެންމެ 22 އަހަރުގެ ޒުވާން އަންހެނަކަށް، ވޭޕްކުރުމުގެ ސަބަބުން ފުއްޕާމޭގެ ކެންސަރު ޖެހިފައިވާކަން އެނގުމާއެކު، އެހެން މީހުންނަށް މިކަމުގެ ނުރައްކާތެރިކަމާ ބެހޭގޮތުން އޭނާ ވަރުގަދަ އިންޒާރެއް ދީފިއެވެ.
އިނގިރޭސިވިލާތަށް ނިސްބަތްވާ ލިޑިއާ ރީވް ނަމަކަށް ކިޔާ މި ޒުވާނާއަކީ ގަވާއިދުން ވޭޕް ބޭނުންކުރަމުން ދިޔަ މީހެކެވެ. އޭނާއަށް މި ބަލި ޖެހިފައިވާކަން އެނގުނީ، ގިނަ ދުވަސްތަކެއް ވަންދެން ކެއްސުމާއި ނޭވާލާން އުނދަގޫވުމުގެ މައްސަލަތަކެއް ކުރިމަތިވެގެން ޑޮކްޓަރަށް ދެއްކުމުންނެވެ.
ލިޑިއާ ބުނި ގޮތުގައި، ވޭޕްކުރާ މީހުން އެއްގޮތަކަށްވެސް އިހުމާލުވެގެން ނުވާނެ އެންމެ މުހިންމު އަލާމާތަކީ ކެއްސާއިރު އަނގައިން ލޭ އައުމެވެ. މިއީ އޭނާގެ ފުއްޕާމޭގައި ކެންސަރުގެ ގަނޑެއް އުފެދިފައިވާކަން އެނގުނު އެންމެ ބޮޑު އެއް ނިޝާނެވެ. އޭނާ ފާހަގަކުރި ގޮތުގައި، ގިނަ ފަހަރަށް ޒުވާނުންނަށް ހީވަނީ ވޭޕަކީ ސިނގިރޭޓަށްވުރެ ރައްކާތެރި އެއްޗެއް ކަމަށެވެ. ނަމަވެސް، މިއީ ފުރާނައަށް ނުރައްކާވާ ފަދަ ބޮޑެތި ބަލިތަކަށް މަގުފަހިކުރާ ކަމެއްކަން އޭނާގެ އަމިއްލަ ތަޖުރިބާއިން ވަނީ ސާބިތުވެފައެވެ.
މި ހާދިސާއާ ގުޅިގެން ސިއްހީ މާހިރުން ވިދާޅުވަނީ، ވޭޕްކުރުމުގެ ސަބަބުން ފުއްޕާމޭގެ ސިއްހަތަށް ދިގު މުއްދަތުގައި ކުރާނެ ނޭދެވޭ އަސަރުތައް އަދިވެސް އަންނަނީ ދިރާސާ ކުރެވެމުން ކަމަށެވެ. ނަމަވެސް ޒުވާން އުމުރުގައި ކެންސަރު ފަދަ ބަލިތައް ވޭޕްގެ ސަބަބުން ޖެހުމުގެ ފުރުސަތު ބޮޑުކަމަށް މިހާރު ފެންނަމުންދާ ހާދިސާތަކުން ހާމަވެއެވެ.
ރާއްޖޭގައި ވެސް ޒުވާނުންނާއި ކުޑަކުދިންގެ މެދުގައި ވޭޕްކުރުން އާންމުވަމުންދާ މި ދަނޑިވަޅުގައި، މިފަދަ ހާދިސާތަކަކީ ލިބިގެންދާ ވަރަށް ބޮޑު ފިލާވަޅެކެވެ. ސިއްހީ މާހިރުން އިރުޝާދު ދެއްވަނީ ކެއްސުމާއި، ނޭވާ ކުރުވުމާއި، ނުވަތަ އަނގައިން ލޭ އައުން ފަދަ ކަމެއް ފާހަގަކުރެވިއްޖެނަމަ، ލަސްނުކޮށް ޑޮކްޓަރެއްގެ އެހީތެރިކަން ހޯދުމަށެވެ.
ލިޑިއާ މިހާރު މަސައްކަތް ކުރަމުންދަނީ އޭނާގެ ވާހަކަ މެދުވެރިކޮށް، ވޭޕް ބޭނުންކުރާ އެހެން ޒުވާނުން އެ ނުރައްކާތެރި އާދައާ ދުރުހެލިކުރުވުމަށެވެ.
