އެޕްސްޓައިން-ބާ ވައިރަސް (އީބީވީ) އާ ދެކޮޅަށް މަސައްކަތް ކުރާ އާ އެންޓިބޮޑީތަކެއް އެމެރިކާގެ ސައިންސްވެރިންގެ ޓީމަކުން އުފައްދައިފިއެވެ.
އީބީވީ އަކީ ދުނިޔޭގެ އެންމެ އާންމު ވައިރަސްތަކުގެ ތެރެއިން ވައިރަހެކެވެ. ދުނިޔޭގެ ބޮޑެތި މީހުންގެ 95 އިންސައްތަ މީހުންގެ ހަށިގަނޑުގައި މި ވައިރަސް ހުންނަ ކަމަށް ބެލެވެއެވެ. ގިނަ މީހުންގެ ކިބައިން ބޭރުފުށަށް ފެންނަ އެއްވެސް އަލާމާތެއް ނުފެނުނު ނަމަވެސް، މި ވައިރަސް ހަށިގަނޑުގައި ދާއިމީ ގޮތެއްގައި ދެމިހުރެ، ބައެއް ކެންސަރުތަކާއި މަލްޓިޕަލް ސްކްލެރޯސިސް ފަދަ ސީރިއަސް ބަލިތަކާ ގުޅުން ހުންނަ ކަމަށް ދިރާސާތަކުން ދައްކައެވެ.
ފްރެޑް ހަޗިންސަން ކެންސާ ސެންޓަރާއި ޔުނިވާސިޓީ އޮފް ވޮޝިންޓަނުގެ ސައިންސްވެރިން އުފެއްދީ އީބީވީ ވައިރަހުގެ ސަތަހުގައިވާ ދެ ޕްރޮޓީނަކަށް (ޖީޕީ350 އާއި ޖީޕީ42) އަމާޒުކުރާ އެންޓިބޮޑީތަކެކެވެ. މި ޕްރޮޓީންތަކަކީ ވައިރަސް ހަށިގަނޑުގެ ބީ ސެލްތައް (ދިފާއީ ނިޒާމުގެ މުހިންމު ހުދު ލޭ ސެލް) އަށް ވާސިލުވުމަށް ބޭނުންކުރާ ދެ ޕްރޮޓީނެވެ. ލެބޯޓަރީން ޖުމްލަ 10 އެންޓިބޮޑީއެއް ވަކިކުރި އިރު، ދިރޭ މީދާ ބޭނުންކޮށްގެން ހެދި ޓެސްޓުތަކުން އެއް އެންޓިބޮޑީ ވައިރަހުން ރައްކާތެރިކުރުމުގައި ހާއްސަ ކާމިޔާބީއެއް ދައްކާފައިވެއެވެ.
މި ދިރާސާގައި ބޭނުންކުރީ ޖެނެޓިކް ގޮތުން އިންސާނީ އެންޓިބޮޑީ އުފައްދާ ގޮތަށް ތައްޔާރުކޮށްފައިވާ ހާއްސަ މީދާތަކެކެވެ. މީގެ ސަބަބުން މި އެންޓިބޮޑީތައް ކުރިމަގުގައި އިންސާނުންގެ ހަށިގަނޑު ބަލައިގަތުމުގެ ފުރުސަތު ބޮޑުވެއެވެ. “އެޕްސްޓައިން-ބާ ވައިރަސް ދިފާއީ ސެލްތަކަށް ވާސިލުވުން ހުއްޓުވާ އިންސާނީ އެންޓިބޮޑީ ހޯދުމަކީ ވަރަށް ބޮޑު ގޮންޖެހުމެއް، ސަބަބަކީ އެހެން ވައިރަސްތަކާ ހިލާފަށް އީބީވީ ގާތްގަނޑަކަށް ހުރިހާ ބީ ސެލްއެއް ކައިރިއަށް ވާސިލުވާ ގޮތެއް ހޯދާތީ” ކަމަށް ބައޯކެމިސްޓް އެންޑްރޫ މެކްގަޔާ ވިދާޅުވިއެވެ. “އާ ޓެކްނޮލޮޖީތައް ބޭނުންކޮށްގެން މި ހުސް ޖާގަ ފޫބައްދަން އަހަރެމެން ނިންމީ، އަދި ނަތީޖާއެއްގެ ގޮތުން ދުނިޔޭގެ އެންމެ އާންމު ވައިރަސްތަކުން އެކައްޗެއް ހުއްޓުވުމާ ދިމާއަށް މުހިންމު ފިޔަވަޅެއް އެޅުނީ” ކަމަށް ވެސް އޭނާ ވިދާޅުވިއެވެ.
މި އެންޓިބޮޑީތައް ބޭނުންކުރެވިދާނެ އެއް ދާއިރާއެއް ކަމުގައި ފާހަގަކޮށްފައި ވަނީ ކޮންމެ އަހަރަކު ދުނިޔޭގެ އެކި ކަންކޮޅުތަކުގައި ކުރެވޭ އެތައް ލައްކަ ގުނަވަން ބަދަލުކުރުމާއި ބޯން މެރޯ ޓްރާންސްޕްލާންޓެވެ. ޓްރާންސްޕްލާންޓަށް ފަހު ދިފާއީ ނިޒާމު ބަލިކުރާ ބޭސް ބޭނުންކުރަން ޖެހޭ އިރު، އީބީވީގެ ސަބަބުން ފުރާނައަށް ނުރައްކާ ކެންސަރުތައް ޖެހުމުގެ ފުރުސަތު ބޮޑުވެއެވެ. “އީބީވީ ވައިރަސް ހުއްޓުވުމުން، ޓްރާންސްޕްލާންޓަށް ފަހު ޖެހޭ ލިމްފޯޕްރޮލިފަރޭޓިވް ބަލި މަދުކުރެވި، ދިފާއީ ނިޒާމު ބަލިކުރާ ބޭހުގެ މިންވަރު ކުޑަކުރެވޭނެ ކަމުގެ ފުރުސަތު ބޮޑު” ކަމަށް ޖަރާސީމާ ބެހޭ ޑޮކްޓަރު ރެޗެލް ބެންޑާ އިގްނާޝިއޯ ވިދާޅުވިއެވެ. ހާއްސަ ގޮތެއްގައި މި ވައިރަހަށް ކުރިން ހުށައެޅިފައި ނެތް ކުޑަކުދިންގެ ޓްރާންސްޕްލާންޓް ކޭސްތަކުގައި މި ފަރުވާ ބޭނުންތެރިވާނެ ކަމަށް ފާހަގަކޮށްފައިވެއެވެ.
އިންސާނުންގެ ސޭފްޓީ ޓެސްޓިންގާއި ކްލިނިކަލް ޓްރަޔަލްތަކާ ހިސާބަށް ދެވެން އަދި ގިނަ މަސައްކަތްތަކެއް ކުރަން ޖެހޭ ކަމަށް ދިރާސާގައި ފާހަގަކޮށްފައިވެއެވެ. މި ދިރާސާ ސެލް ރިޕޯޓްސް މެޑިސިން ޖާނަލްގައި ޝާއިއުކޮށްފައިވެއެވެ.
