ހުވަފެންތަކުގެ ނިމުން – ހަޤީޤީ ދިރިއުޅުމުގެ ފެށުން
ކުޑަކުއްޖަކު ފުލޯކު ވާހަކަތައް ޤަބޫލުކުރާ ފަދައިން، ކުރިން ސާރާވެސް ހުވަފެންތަކަށް ފުރިހަމައަށް އިތުބާރު ކުރިއެވެ. ނަމަވެސް، މާޒީގެ ހަނދާންތަކާއި މުސްތަޤުބަލުގެ މަޖުބޫރުކަމާ ދެމެދު ހުރެ، މިއަދު އޭނާއަށް އެއަށްވުރެ މާ ފުން، މާ މާތް ހަޤީޤަތެއް އިޙުސާސް ކުރެވިއްޖެއެވެ.
އެ ދުވަހުގެ ހެނދުނުން ފެށިގެން އައީ އާދަޔާ ޚިލާފު ހަމަހިމޭންކަމަކާ އެކުގައެވެ. ހީވަނީ މުޅި ދުނިޔެވެސް، ކުރިން ނިންމާފައިވާ ނިންމުމެއްގެ އިންތިޒާރުގައި ހުއްޓިފައި އޮތްހެންނެވެ. އެ ގަނޑުވަރު ފަދަ ބޮޑު ގޭގެ ދިގު ފެންޑާތަކުގައި ސާރާ ހިނގަމުން ދިޔައިރު، ކޮންމެ ފިޔަވަޅަކުންވެސް އޭނާ ދަސްކުރި ކަންތައްތަކާއި، އޭނާއަށް ގެއްލުނު ކަންތައްތަކާއި، އަދި ދޫކޮށްލަން ޖެހޭ ކަންތައްތަކުގެ ބަރުދަން އިޙުސާސް ކުރެވެމުން ދިޔައެވެ.
ސާރާ އެ ކޮޓަރިއަށް ވަތްއިރު، އާދަޔާ ޚިލާފު އެއްވެސް ކަމެއް ނެތެވެ. ނަމަވެސް ހުރިހާ ކަމެއްވެސް އިޙުސާސް ކުރެވެނީ މުޅިން ތަފާތު ގޮތަކަށެވެ. މެޝިންތަކުގެ އަޑުތައް ހުރީ ވަކި އުސޫލެއްގެ މަތިންނެވެ. ޑޮކްޓަރުން ހަރަކާތްތެރިވަމުން ދިޔައީ ވަރަށް އަވަސް އަދި ތަރުތީބުކޮށްލެވިފައިވާ ގޮތަކަށެވެ. އޭނާގެ މައިންބަފައިން ތިބީ އެމީހުންގެ ކޮންޓްރޯލާއި ޔަޤީންކަމުގެ ދުނިޔޭގައި ސާބިތުކަމާއެކުގައެވެ.
“މިއީ އެންމެ ފަހު މަރުހަލާ.” ބައްޕަ ބުންޏެވެ. ބައްޕަގެ އަޑުގައި ހުރީ ސާބިތުކަމާއި ފަޚުރުވެރިކަމެވެ. “މިއަދު އަހަރެމެންނަށް ސޯފީ މުޅިން ހަމައަކަށް އަޅުވައި، ސަލާމަތް ކުރެވޭނެ.”
“ހަމައަކަށް އެޅުވުން” ނުވަތަ “ސްޓެބިލައިޒް”. އެއީ ވަރަށް ފަރުވާތެރިކަމާއެކު ހޮވާލެވިފައިވާ ބަހެކެވެ. ނަމަވެސް އޭގައި ވަނީ ކޮޅެއް ނެތްވަރުގެ ދޮގުވެރިކަމެކެވެ. ސާރާ މަޑުމަޑުން ކުރިއަށް ޖެހިލިއެވެ. އޭނާގެ ނަޒަރު ހުއްޓުނީ ސޯފީއަށެވެ. ސޯފީ އޮތީ އެއްވެސް ހަރަކާތެއް ނެތި، ވަށައިގެންވާ ހަލަބޮލިކަމާ ދުރުގައި، ހަޤީޤީ ދުނިޔެއާއި ޚިޔާލީ ދުނިޔެއާ ދެމެދު މެދުކެނޑިފައެވެ.
“އެކަމަކު، އޭރުންވެސް އެއީ ހަމަ ސޯފީއަށް ވާނެތަ؟” ސާރާ މަޑުމަޑުން އަހާލިއެވެ.
މަންމަ އެނބުރި ބަލައިލިއެވެ. މަންމަގެ މޫނުމަތިން ފެންނަނީ ހަމަޖެހުމެވެ. ވަގުތުން ޖަވާބު ދިނެވެ. “އޭނާ މާ ރަނގަޅުވާނެ.”
އެ ވަގުތު ސާރާއަށް ހުރިހާ ކަމެއް ވިސްނުނެވެ. އެމީހުން އެ މަސައްކަތް ކުރަނީ އޭނާގެ ދައްތަ އަނބުރާ ގެނައުމަކަށް ނޫނެވެ. އެމީހުން އެ މަސައްކަތް ކުރަނީ ސޯފީގެ ބަދަލުގައި އެހެން އެއްޗެއް ގެނައުމަށެވެ. ސާރާ ސޯފީގެ އަތުގައި ހިފާލިއެވެ. އެއީ ބަހުން ބުނެނުދެވޭނެ އެތައް ވާހަކައެއް ބުނެދެވޭނެ ކަހަލަ އިޙުސާސެކެވެ. ދެން، ފުން ނޭވާއެއްލުމަށްފަހު ސާރާ ލޯ މަރާލިއެވެ. އަދި އެންމެ ފަހު ފަހަރަށް އެ ހުވަފެނީ ދުނިޔެއަށް ވަނެވެ.
މިފަހަރު، އެ ހުވަފެން ވަރަށް އާދައިގެއެވެ. އެއްވެސް ބޮޑު ކަމެއް ނެތެވެ. ބަދަލުވަމުންދާ ދުނިޔެތަކެއް ނެތެވެ. އޮތީ ހަމައެކަނި ކަނޑެވެ. ހަމަހިމޭން، ނިމުމެއް ނެތް، ރިހި އަލިން ފެންވަރުވާލެވިފައިވާ ކަނޑެކެވެ. ސޯފީ އެތަނުގައި ހުއްޓެވެ. އޭނާއަށް އެއްވެސް ބަދަލެއް ނާދެއެވެ. ސާރާ ކަރުނުން ފުރިފައިވާ ދެލޮލާއެކު ހިނިތުންވެލިއެވެ.
“މި ރިހި ހުވަފެންތައް..” ސާރާ މަޑުމަޑުން ބުންޏެވެ. އޭނާގެ އަޑުގައި ތުރުތުރުލުމެއް ހުއްޓެވެ. “މި ހުވަފެންތަކުގެ ނިމުން އަތުވެއްޖެ.”
އޭނާ ވަށައިގެންވާ ހަމަހިމޭންކަމަށް ބަލައިލިއެވެ. “މި ޚިޔާލީ ދުނިޔޭގައި އެއްވެސް ކަމަކީ ހަޤީޤަތެއް ނޫންކަން އެނގޭ.. އެކަމަކު ހަޤީޤީ ދިރިއުޅުން ފެށުމުން، އަހަރެމެންނަށް މިތާކު ނުތިބެވޭނެ ދޯ؟”
ސޯފީ އޯގާތެރިކަމާއެކު ހިނިތުންވެލިއެވެ. “ނޫން.” އޭނާ ބުންޏެވެ. “އަހަރެމެންނަކަށް ނުތިބެވޭނެ.”
ރާޅުތައް މަޑުމަޑުން ބިންދަމުން ދިޔައީ މުޅި ދުނިޔެވެސް އެ ވާހަކަތަކަށް ކަނުލާ އަޑުއަހާ ފަދަ ގޮތަކަށެވެ.
“އެމީހުން އެކަން ނިންމަން އެ އުޅެނީ.” ސާރާ މަޑުމަޑުން ބުންޏެވެ.
“އަހަންނަށް އެނގޭ.”
“އެކަން އެގޮތަށް ކޮށްފިނަމަ.. އަހަންނަށް ދައްތަ ގެއްލޭނެ.”
ސޯފީ ގާތަށް ޖެހިލިއެވެ. އޭނާގެ ކިބައިން ފެންނަނީ ހަމަޖެހުމެވެ. “ކޮއްކޮއަށް ގެއްލޭނީ އެމީހުން އަހަރެން ބަދަލުކޮށް ހަދަން އެ އުޅޭ ސިފަ. އަހަރެންނެއް ނޫން.” ސޯފީ މަޑުމަޑުން ބުންޏެވެ.
ސާރާ ބޯ ހޫރާލިއެވެ. އޭނާގެ ލޮލުން ކަރުނަ އޮހެމުން ދިޔައެވެ. “އެވަރުން ނުފުދޭ.. އަހަރެން ބޭނުމީ ދައްތަ.”
ސޯފީ ސާރާގެ ދެއަތުގައި ބާރަށް ހިފާލިއެވެ. “އެހެންވީމާ، ކޮއްކޮ ޖެހޭނެ އަހަރެން ދެން ދޫކޮށްލަން.”
އެ ބަސްތަކުން ދެމީހުންގެ ދެމެދުގައި ބޮޑު ހިތާމާއަކާއި ހަމަހިމޭންކަމެއް ވެރިވިއެވެ.
“ކޮއްކޮ އަހަރެން ދޫކޮށްނުލައިފިނަމަ،” ސޯފީ ކުރިއަށް ގެންދިޔައެވެ. “އެމީހުން އަހަރެން ބަދަލުކޮށްލާނީ އަހަރެންގެ ސިފަ ޖެހިފައިވާ އެހެން އެއްޗަކަށް. އެކަމަކު އެއީ އަހަރެންނެއް ނޫން. އޭރުން ކޮއްކޮއަށް އަބަދުވެސް އެ ހުސްކަން އިޙުސާސްވާނެ.”
ސާރާގެ ހިތުގައި ވަރަށް ބޮޑަށް ރިހުނެވެ. ނަމަވެސް އެ ރިހުމުގެ ތެރެއިން އޭނާއަށް ހަޤީޤަތް ވިސްނުނެވެ. އޭނާ ސޯފީގެ ގައިގައި ބާރަށް ބައްދާލިއެވެ.
“ދައްތައާ ނުލައި ދިރިއުޅޭނެ ގޮތެއް އަހަންނަކަށް ނޭނގެ.” އޭނާ މަޑުމަޑުން ބުންޏެވެ.
ސޯފީވެސް ސާރާގެ ގައިގައި ބައްދާލިއެވެ. ދެން މަޑުމަޑުން ދުރަށް ޖެހިލަމުން، ސާރާގެ ލޮލަށް ބަލައިލިއެވެ. “ކޮއްކޮ އެކަނި އުޅޭކަށް ނުޖެހޭނެ.” އޭނާ ބުންޏެވެ.
ކުޑަ ވަގުތުކޮޅަކަށްފަހު، ސޯފީގެ ތުންފަތްމައްޗަށް ލާނެތް ހިނިތުންވުމެއް އައެވެ. “އަދި ސާރާ..”
ސާރާ އޭނާއަށް ބަލައިލީ ހައިރާންވެފައެވެ. “ލޯތްބަށް ފުރުސަތެއް ދީ.” ސޯފީ އޯގާތެރިކަމާއެކު ބުންޏެވެ.
ސާރާ ކުޑަކޮށް ބަލައިލިއެވެ. “ކީކޭ؟”
ސޯފީ މަޑުމަޑުން ހީނލިއެވެ. އެއީ ސާރާ ދަންނަ ވަރަށް އަސަރުގަދަ ހިނިތުންވުމެކެވެ. “އަހަންނަށް ނޭނގެއޭ ކިޔައިގެން ނުހުރޭ.” އޭނާ ސަމާސާ ގޮތަކަށް ބުންޏެވެ.
ސާރާ ކަރުނައިގެ ތެރެއިން ހިނިތުންވެލަން މަސައްކަތް ކުރަމުން ބޯ ހޫރާލިއެވެ. “މިއީ އެކަހަލަ ވާހަކަ ދައްކަންވީ ވަގުތެއް ނޫން..”
“މިއީ ހަމަ އެންމެ މުނާސަބު ވަގުތު.” ސޯފީ މެދުކަނޑާލަމުން ބުންޏެވެ. އޭނާގެ ލޮލުން ލޯތްބާއި އުންމީދު ފެންނަން ހުއްޓެވެ. “އެއީ ކޮއްކޮގެ އަލިފުޅު، އެނގެއެއްނު.”
ސާރާ ގަނޑުވި ކަހަލައެވެ. “ތި ކިޔަނީ ކީކޭ؟” އޭނާ މަޑުމަޑުން އަހާލިއެވެ.
ސޯފީގެ ހިނިތުންވުން އިތުރަށް ފުންވިއެވެ. “ހަމަ ދޮންހިޔަލަ އާއި އަލިފުޅު ފަދައިން، ތިބާއަށްވެސް އެވަނީ ތިބާގެ ދިރިއުޅުމަށް އެންމެ ބޭނުންވި ވަގުތު އެހީތެރިއަކު ފެނިފައި. އޭނާއަކީ އިއްތިފާޤުން އައި މީހެއް ނޫން.”
ސާރާގެ ހިތުގެ ތެޅުން އަވަސްވިއެވެ. އޭނާގެ ޚިޔާލަށް އައީ ސާޖިދުއެވެ. އޭނާގެ ހަމަހިމޭންކަމާއި، ސާބިތުކަމާއި، އަދި ހުރިހާ ކަމެއް ބުރަވެގެން ދިޔައިރުވެސް އޭނާ ސާރާގެ ގާތުގައި ހުރި ގޮތެވެ.
ސޯފީ ސާރާގެ ދެއަތަށް ފިތާލިއެވެ. “އެއީ ކޮއްކޮގެ އަލިފުޅު.” އޭނާ އަނެއްކާވެސް ބުންޏެވެ. “އަދި ކޮއްކޮއަކީ އަބަދުވެސް ތި ހީކުރާ ވަރަށްވުރެ މާ ވަރުގަދަ މީހެއް. ހަމަ ދޮންހިޔަލަ ފަދައިން.”
ސާރާގެ ލޮލުން ކަރުނަ ތިއްކެއް ވެއްޓުނެވެ. “އަހަންނަށް އަލުން ހިތް ހުޅުވާލަންވީ ގޮތެއް ނޭނގެ.” އޭނާ މަޑުމަޑުން ބުންޏެވެ.
ސޯފީ ހިނިތުންވެލިއެވެ. “ކޮއްކޮ މަޖުބޫރުން އެކަން ކުރާކަށް ނުޖެހޭނެ. ހަމައެކަނި ހިތް ބަންދުކޮށްނުލާ.”
ދެމީހުންގެ ދެމެދުގައި މިއޮތީ ހަމަހިމޭންކަމެކެވެ. އެކަމަކު އެއީ ހިތާމައިގެ ހަމަހިމޭންކަމެއް ނޫނެވެ. އެއީ އެކަކު އަނެކަކަށް ފުރިހަމައަށް އިޙުސާސްވުމުގެ ހަމަހިމޭންކަމެވެ.
“އަހަންނަށް ވަޢުދުވޭ.” ސޯފީ މަޑުމަޑުން ބުންޏެވެ.
ސާރާ މަޑުމަޑުން ބޯ ޖަހާލިއެވެ. “އަހަރެން ވަޢުދުވަން.”
ސޯފީގެ ހިނިތުންވުން އަމާންވިއެވެ. “ވަރަށް ރަނގަޅު.” އޭނާ ބުންޏެވެ. “ސަބަބަކީ ހުވަފެންތައް ނިމުނަސް، ދިރިއުޅުމުގައި އަދިވެސް ރީތި ކަންތައްތަކެއް އިންތިޒާރުގައި ހުންނާނެތީ.”
ވަށައިގެންވާ ދުނިޔެ މަޑުމަޑުން ފަނޑުވާން ފެށިއެވެ. ސާރާ އެންމެ ފަހު ފަހަރަށް އޭނާގެ ގައިގައި ބައްދާލިއެވެ. “އަހަރެން ވަރަށް ލޯބިވޭ.” އޭނާ ބުންޏެވެ.
“އަހަންނަށް އެނގެއޭ.” ސޯފީ އޯގާތެރިކަމާއެކު ޖަވާބު ދިނެވެ. ދެން، އޭނާ ގެއްލިއްޖެއެވެ.
ސާރާއަށް ހޭލެވުނީ މެޝިންތަކުގެ އަޑުތައް ގަދަވެ، މީހުންގެ ހަޅޭކުގެ އަޑު އިވުމުންނެވެ. މުޅި ކޮޓަރީގައި އޮތީ މަރުގެ ހަމަހިމޭންކަމުގެ ރަނގަބީލެވެ.
މަންމަގެ ހަމަޖެހުން ގެއްލިއްޖެއެވެ. ބައްޕަ ހުރީ ގަނޑުވެފައެވެ. ނަމަވެސް ސާރާ.. އޭނާ ހުރީ މަޑުންނެވެ. އޭނާގެ ލޮލުން ހިމޭން ކަރުނަ ފައިބަމުން ދިޔަ ނަމަވެސް، ހިތުގައި އޮތީ ހަމަޖެހުމެވެ. ސަބަބަކީ އޭނާ ސޯފީގެ ބަދަލުގައި އެހެން އެއްޗެއް ގެނައުމަށް ފުރުސަތު ނުދިނީމައެވެ. އޭނާ ސޯފީއަކީ ހަޤީޤަތަކަށް ވުމަށް ފުރުސަތު ދިނީއެވެ.
ދުވަސްތައް ފާއިތުވަމުން ދިޔައެވެ. އެ ބޮޑު ގޭގައި މިހާރު ކޮންޓްރޯލެއް ނެތެވެ. އޮތީ ހަމައެކަނި ހަޤީޤަތް ޤަބޫލުކުރުމުގެ ހަމަހިމޭންކަމެވެ. ސާރާ އޭނާގެ ދިރިއުޅުމައިގެން ކުރިއަށް ދިޔައެވެ. ސާޖިދުގެ އިރުޝާދުގެ ދަށުން އޭނާގެ ކިޔެވުން ކުރިއަށް ދިޔައިރު، މިހާރު އޭނާއަށް ކަންކަން ވިސްނެނީ ލޯތްބާއި ކަނޑައިގެން ދިޔަ ގުޅުންތަކުގެ ތެރެއިންނެވެ.
އެއް ދުވަހެއްގެ ހަވީރު، އިރު އޮއްސެމުން ދިޔަ ވަގުތު ސާޖިދު އޭނާގެ ގާތުގައި ހުއްޓެވެ. “ތިބާ އިޚްތިޔާރު ކުރީ ހަޤީޤަތް.” ސާޖިދު މަޑުމަޑުން ބުންޏެވެ.
ސާރާ ކުރިއަށް ބަލަހައްޓައިގެން ހުރެ ބުންޏެވެ. “އަހަރެން އިޚްތިޔާރު ކުރީ ދައްތަ.”
އޭގެ ފަހުން އައީ މަޑު ހަމަހިމޭންކަމެކެވެ. ދެން، ސާޖިދު މަޑުމަޑުން ސާރާގެ އަތުގައި ހިފާލިއެވެ. މިފަހަރު ސާރާ އަތެއް ދަމައެއް ނުގަނެއެވެ.
ސަބަބަކީ، ނިމިދިޔަ ހުވަފެނެއްގެ ތެރެއިން ވީ ވަޢުދެއް އަދިވެސް ދެމިއޮތީމައެވެ. އެއީ ކިތަންމެ ބޮޑު ގެއްލުމަކާ ކުރިމަތިލާން ޖެހުނު ކަމުގައި ވިޔަސް، އަދި ކިތަންމެ ލޯބިވާ އެއްޗެއް ދޫކޮށްލަން ޖެހުނު ކަމުގައި ވިޔަސް، ދިރިއުޅުން އަލުން ފެށޭނެ ކަމުގެ ޔަޤީންކަމެވެ.
އެރޭ ސާރާ ލޯ މަރާލީ ހުވަފެނެއް ފެނޭތޯ ހޯދާކަށް ނޫނެވެ. ނަމަވެސް އެ ހަމަހިމޭންކަމުގެ ތެރެއިން އޭނާއަށް ކަމެއް އިޙުސާސް ކުރެވުނެވެ.
އޯގާތެރި.. އަދި ވަރަށް ބޮޑަށް ދަންނަ ކަހަލަ އިޙުސާސެކެވެ.
އޭނާގެ ތުންފަތްމައްޗަށް ހިނިތުންވުމެއް އައެވެ. ސަބަބަކީ އެ ރިހި ހުވަފެންތަކުގެ ނިމުން އަތުވެއްޖެއެވެ. ނަމަވެސް ހަޤީޤީ ދިރިއުޅުން އެންމެ ފަހުން ފެށިއްޖެއެވެ.
(ނިމުނީ)
