ބޮލީވުޑްގެ މަޝްހޫރު ބަތަލާ ކަރީނާ ކަޕޫރު ޚާން، ސައިފް އަލީ ޚާނާ ކައިވެނި ކުރަން އުޅުނު ދުވަސްވަރު، އެ ކައިވެނި ނުކުރުމަށް ގިނަ ބަޔަކު އޭނާއަށް އިންޒާރު ދީފައިވާ ކަމަށް ބުނެފިއެވެ.

ކަރީނާ މި ވާހަކަތައް ހާމަކުރީ ދާދި ފަހުން ދިން އިންޓަވިއުއެއްގައެވެ. އޭނާ ބުނި ގޮތުގައި 2012 ވަނަ އަހަރު ސައިފްއާ ކައިވެނި ކުރަން ނިންމި ދުވަސްވަރު، ފިލްމީ ދާއިރާގެ ގިނަ ބަޔަކާއި ރައްޓެހިން އޭނާއަށް ނަސޭހަތްތެރިވީ ކައިވެނި ނުކުރުމަށެވެ. އެ މީހުން ބުނަމުން ދިޔައީ “ކައިވެނި ނުކުރާށޭ، އެހެން ނޫނީ ކެރިއަރު ނިމޭނޭ.” މިފަދައިންނެވެ.

މި އިންޒާރުތައް ދިނުމުގެ މައިގަނޑު ސަބަބަކީ، އެ ދުވަސްވަރު ބޮލީވުޑްގައި އޮތް ގަބޫލުކުރުމެކެވެ. އެއީ އަންހެން ބަތަލާއަކު ކައިވެނި ކުރުމުން އޭނާގެ މަގުބޫލުކަން ގެއްލި، ފިލްމީ ދާއިރާގައި އޮންނަ ފުރުސަތުތައް ހަނިވެގެންދާނެ ކަމަށް އޮތް ބިރެވެ. ނަމަވެސް ކަރީނާ ބުނީ އޭނާ ބޭނުންވީ އެ ގަބޫލުކުރުން ބަދަލުކޮށް، ކައިވެންޏަށް ފަހު ވެސް ކާމިޔާބު ކެރިއަރެއް ބިނާކުރެވިދާނެކަން ސާބިތުކޮށްދޭން ކަމަށެވެ.

ކަރީނާ އާއި ސައިފް ކައިވެނި ކުރީ ފަސް އަހަރު ދުވަހު ރައްޓެހިވެގެން އުޅުމަށްފަހު 16 އޮކްޓޯބަރު 2012 ގައެވެ. މި ކައިވެންޏަށް މިހާރު 12 އަހަރު ވެފައިވާއިރު، ކަރީނާއަކީ އަދިވެސް ބޮލީވުޑްގައި އެންމެ ބޮޑު އާމްދަނީއެއް ލިބޭ އަދި އެންމެ ކާމިޔާބު އެއް ބަތަލާއެވެ.

މި ހާމަކުރުމާއެކު ކަރީނާ ވަނީ، އަމިއްލަ ދިރިއުޅުމުގެ ނިންމުންތަކުގެ ސަބަބުން މަސައްކަތުގެ ދާއިރާއަށް ހުރަސް އެޅިގެން ނުވާނެ ކަމުގެ ނަމޫނާއެއް ދައްކައިދީފައެވެ. ސައިފް އާއި ކަރީނާގެ މިހާރު ދެ ފިރިހެން ކުދިން ތިބެއެވެ. އެއީ ތައިމޫރު އަލީ ޚާން އާއި ޖެހް އަލީ ޚާންއެވެ.