މޭބިސްކަދުރު ކެއުމަކީ އިރުގެ ނުރައްކާތެރި އަލްޓްރާވައިލެޓް (ޔޫވީ) ދޯދިތަކުން ހަންގަނޑަށް ލިބޭ ގެއްލުންތަކުން ދިފާއުވުމަށް އެހީތެރިވެދޭ ކަމެއްކަން އެމެރިކާގެ ސައިންސްވެރިން ކުރި އާ ދިރާސާއަކުން ދައްކައިފިއެވެ.
ޔުނިވަރސިޓީ އޮފް އެލަބާމާ އެޓް ބާމިންހަމްގެ ދިރާސާވެރިން ކުރި މި ދިރާސާ ދައްކާގޮތުން، މޭބިސްކަދުރުގައި ހިމެނޭ ގުދުރަތީ މާއްދާތަކެއް ކަމަށްވާ ‘ޕޮލިފީނޯލްސް’ގެ ސަބަބުން ހަންގަނޑު އިރުގެ ދޯދިތަކަށް އޮންނަ ނާޒުކުކަން ކުޑަކޮށްދެއެވެ. މި ދިރާސާގެ ނަތީޖާ މިހާރު ވަނީ ސައިންޓިފިކް މަޖައްލާއެއް ކަމަށްވާ “އެންޓިއޮކްސިޑެންޓްސް” ގައި ޝާއިއުކޮށްފައެވެ.
މި ދިރާސާ ކުރިއަށް ގެންދިޔައީ ދިރާސާގެ ބައިވެރިންނަށް ދެ ހަފުތާ ވަންދެން ކޮންމެ ދުވަހަކު މޭބިސްކަދުރުން ތައްޔާރުކޮށްފައިވާ ޕައުޑަރެއް ދީގެންނެވެ. މިއީ ދުވާލަކު ދެ ތަށި މޭބިސްކަދުރު ކެއުމާ އެއްވަރުގެ މިންވަރެކެވެ. ދިރާސާގެ ނަތީޖާއިން ދެއްކި ގޮތުގައި، މޭބިސްކަދުރު ބޭނުންކުރުމުގެ ސަބަބުން އިރުގެ ދޯދިތަކުން ހަންގަނޑު ރަތްވުމާއި (ސަންބާރން) ހަންގަނޑުގެ ސެލްތަކަށް ލިބޭ ގެއްލުންތަކުން ބޮޑުތަނުން ރައްކާތެރިކަން ލިބިގެންދެއެވެ.
ސައިންސްވެރިން ފާހަގަކުރި ގޮތުގައި މޭބިސްކަދުރަކީ ހަމައެކަނި ހަންގަނޑަށް ދިފާއީ ބާރުދޭ އެއްޗެއް ނޫނެވެ. އޭގެ ބަދަލުގައި، މޭބިސްކަދުރުގައި ހިމެނޭ މާއްދާތަކުން ހަންގަނޑުގެ ޖީންތަކަށް ބަދަލުތަކެއް ގެނެސް، އިރުގެ ދޯދިތަކުން ލިބޭ ގެއްލުންތަކާ ދެކޮޅަށް މަސައްކަތް ކުރުމަށް ހަންގަނޑު “ރީޕްރޮގްރާމް” ކޮށްލައެވެ. މީގެ އިތުރުން ހަންގަނޑުގެ ކެންސަރާއި، މުސްކުޅިވުމުގެ އަލާމާތްތައް ފާޅުވުން ފަދަ ކަންކަމުން ސަލާމަތްވުމަށްވެސް މޭބިސްކަދުރު އެހީތެރިވެދެއެވެ.
މި ހޯދުމަކީ ހަންގަނޑުގެ ދިފާއީ ނިޒާމު ވަރުގަދަކުރުމަށް ކާނާގެ ޒަރީއާއިން ކުރެވިދާނެ މަސައްކަތްތަކަށް ލިބުނު ވަރަށް ބޮޑު ކުރިއެރުމެކެވެ. ނަމަވެސް، ސައިންސްވެރިން އިރުޝާދު ދެނީ މޭބިސްކަދުރު ކެއުމާއެކުވެސް، އިރުގެ އަލިން ރައްކާތެރިވުމަށް ބޭނުންކުރާ ސަންސްކްރީން ފަދަ ތަކެތި ބޭނުންކުރުން ހުއްޓާނުލުމަށެވެ.
