އެޕަލްގެ ވޯލްޑްވައިޑް ޑިވެލޮޕާސް ކޮންފަރެންސް ޖޫން 8 ގައި ފެށުމަށް ތައްޔާރުވެއްޖެ އެވެ. އުންމީދުކުރެވޭ ކަންތައްތަކާއި މި ކޮންފަރެންސް ލައިވްކޮށް ބަލާނެ ގޮތާމެދު ފޭނުން ތިބޭނީ ކެތްތެރިކަން ކުޑަވެފައެވެ.
މި ހަރަކާތުގެ ލައިވްސްޓްރީމް އެޕަލްގެ ވެބްސައިޓުންނާއި، އެޕަލް ޓީވީ އެޕް އަދި އެޕަލްގެ ރަސްމީ ޔޫޓިއުބް ޗެނަލް މެދުވެރިކޮށް ބަލާލެވޭނެއެވެ.
އެޕަލް ކުންފުނީގެ އަހަރީ “ވޯލްޑްވައިޑް ޑިވެލޮޕާސް ކޮންފަރެންސް” (ޑަބްލިޔު.ޑަބްލިޔު.ޑީ.ސީ 2026) ޖޫން މަހުގެ 8 ވަނަ ދުވަހު ފެށުމަށް މިހާރު ވަނީ ހުރިހާ ތައްޔާރީތަކެއް ވެފައެވެ. މި ކޮންފަރެންސްގައި އެޕަލްގެ އުފެއްދުންތަކަށް ގެންނަ ފާހަގަކޮށްލެވޭ މުހިންމު ސޮފްޓްވެއަރ އަޕްޑޭޓްތަކެއް ދައްކާލާނެ ކަމަށް ބެލެވެއެވެ.
މި އަޕްޑޭޓްތަކުގެ ތެރޭގައި މެކްއޯއެސް 27، އައިޕެޑްއައިއޯއެސް 27، އައިއޯއެސް 27ގެ އިތުރުން، އެންމެ ޒަމާނީ އާޓިފިޝަލް އިންޓެލިޖެންސް (އޭއައި) އާއެކު ފަރުމާކޮށްފައިވާ “ސިރީ” ގެ އާ ފީޗާތައް ހިމެނެއެވެ.
އޭއައި އާއެކު ތަރައްގީކޮށްފައިވާ ސިރީ
މި ފަހަރުގެ ކޮންފަރެންސްގައި އެންމެ ބޮޑު ސަމާލުކަމެއް ލިބޭނެ ކަމަށް ބެލެވެނީ އާ ފަރުމާއަކާއެކު ނެރޭ ސިރީ އަށެވެ. އައު ސިރީ މެދުވެރިކޮށް އިންސާނުން ވާހަކަދައްކާ ފަދަ ގޮތަކަށް މުއާމަލާތްކޮށް، އުނދަގޫ މަސައްކަތްތައް ފަސޭހަކަމާއެކު ނިންމާލެވޭނެއެވެ. މީގެ އިތުރުން، ޔޫޒަރުގެ އީމެއިލް، މެސެޖް، ފޮޓޯ، ފައިލް އަދި ކަލަންޑަރު ފަދަ މައުލޫމާތުތަކަށް ރިޢާޔަތްކޮށް، ކަންކަމުގައި އެހީތެރިކަން ފޯރުކޮށްދިނުމުގެ ގާބިލްކަން ސިރީއަށް ލިބިގެންދާނެ ކަމަށް ރިޕޯޓްތައް ބުނެއެވެ.
ހަމައެއާއެކު، ސްކްރީނުން ފެންނަ މައުލޫމާތުތައް ދެނެގަނެ، އެއާ ގުޅޭގޮތުން ފިޔަވަޅު އެޅުމުގެ ގާބިލްކަން ވެސް ސިރީއަށް ލިބިގެންދާނެ ކަމަށް ބެލެވެއެވެ. މީގެ އިތުރުން، ޗެޓްބޮޓްގެ އެހީގައި ސުވާލުތަކަށް ޖަވާބު ހޯދުމާއި، ތަަސްވީރު އުފެއްދުމާއި، ލިޔުންތަކުގެ ހުލާސާ ތައްޔާރުކުރުން ފަދަ ޒަމާނީ ފީޗާތައް އެޕަލްއިން ތައާރަފްކުރާނެ ކަމަށް ލަފާކުރެވެއެވެ.
ޖެމިނައި އާއެކު ގުޅުން ގާއިމްކުރުން
އެޕަލްގެ ކުރިއަށް އޮތް “އެޕަލް އިންޓެލިޖެންސް” ޕްލެޓްފޯމްގެ ތެރެއިން ގޫގުލްގެ “ޖެމިނައި އޭއައި” މޮޑެލްތައް ބޭނުންކުރުމަށް އެޕަލްއިން ގޫގުލްއާ އެކު މަސައްކަތް ކުރަމުންދާ ކަމަށްވެއެވެ. މިއީ ޓެކްނޮލޮޖީގެ ދާއިރާގައި އެޕަލްގެ ވާދަވެރިންނަށްވުރެ ކުރިއަރައި ދިއުމަށް އެޅޭ މުހިންމު ފިޔަވަޅަކަށް ވެގެންދާނެއެވެ.
އެޕްތަކަށް އަންނަ ބަދަލުތައް
އެޕަލްގެ އަމިއްލަ ގިނަ އެޕްލިކޭޝަންތަކަކަށް އޭއައި ފީޗާތައް އިތުރުކުރާނެ ކަމަށް ބެލެވެއެވެ. މިގޮތުން، ކެމެރާ އެޕްގެ “ވިޒުއަލް އިންޓެލިޖެންސް” ވަރުގަދަވެގެންދާނެއެވެ. އަދި ފޮޓޯސް އެޕްގައި އޭއައި ބޭނުންކޮށްގެން ފޮޓޯ އެޑިޓްކުރެވޭނެ އާލާތްތަކެއް ތައާރަފްކުރާނެ ކަމަށް ބެލެވެއެވެ.
ޑަބްލިޔު.ޑަބްލިޔު.ޑީ.ސީ 2026 ބަލާނީ ކިހިނެއް؟
އެޕަލްގެ މައިގަނޑު ހަރަކާތް (ކީނޯޓް) ފެށުމަށް ހަމަޖެހިފައިވަނީ ޕެސިފިކް ގަޑިން ޖޫން 8ގެ ހެނދުނު 10:00 (ރާއްޖޭ ގަޑިން 22:00) ގައެވެ. މި ހަރަކާތް އެޕަލްގެ ވެބްސައިޓް، އެޕަލް ޓީވީ އެޕް އަދި އެޕަލްގެ ރަސްމީ ޔޫޓިއުބް ޗެނަލް މެދުވެރިކޮށް ވަގުތުން ބަލާލެވޭނެއެވެ.
ކޮންފަރެންސަށްފަހު ޑިވެލޮޕަރުންނަށް ޚާއްސަ “ބީޓާ” ވާރޝަންތައް ދޫކޮށްލާނެއެވެ. އަދި އާންމުންނަށް ބޭނުންކުރެވޭނެ “ޕަބްލިކް ބީޓާ” ޖުލައި މަހު ނެރުމަށްފަހު، މި އަހަރުގެ ފަހުކޮޅު ހުރިހާ ޔޫޒަރުންނަށް މި އަޕްޑޭޓްތައް ރަސްމީކޮށް ލިބިގެންދާނެއެވެ.
