އެންޓިއޮކްސިޑެންޓްތަކުން މުއްސަނދި އަދި ހަށިގަނޑަށް ހަކަތަ ލިއްބައިދޭ އެއްޗެއްގެ ގޮތުގައި މަޝްހޫރުވެފައިވާ މަޗާ (ފެހިކުލައިގެ ސައިގެ ބާވަތެއް) ކެއުމުގެ ވަގުތުތަކުގައި ބޭނުންކުރުމަކީ، ހަށިގަނޑަށް ދަގަނޑުގެ ބައި ދަމައިގަތުމުގެ ޤާބިލުކަން ބޮޑުތަނުން ދަށްކޮށްލާ ކަމެކެވެ.
ކާނާއާ ބެހޭ ދިރާސާތަކުން ދައްކާގޮތުގައި، މަޗާގައި ގިނަ އަދަދަކަށް “ޓެނިންސް” އަދި “ކެޓެކިންސް” އެކުލެވިގެންވެއެވެ. މިއީ ގަސްގަހާގެހިން ލިބޭ ކާނާ ކަމަށްވާ ފަތްޕިލާވެއްޔާއި، މުގާއި، އަދި ގޮވާމުގެ ބާވަތްތަކުގައި ހުންނަ “ނޮން-ހީމް” ދަގަނޑުގެ ބަޔާ ގުޅި، އެބައި ހަށިގަނޑަށް ދަމައިގަތުމަށް ހުރަސްއަޅާ މާއްދާތަކެކެވެ. މިގޮތަށް ދަގަނޑުގެ ބަޔާ މި މާއްދާތައް ގުޅުމުން، އެ މާއްދާ ހަށިގަނޑަށް ނެގުމަށް އުނދަގޫވެއެވެ.
އެމެރިކާގެ ނޭޝަނަލް އިންސްޓިޓިއުޓްސް އޮފް ހެލްތު އާއި ހާވާޑް ޓީ.އެޗް. ޗޭން ސްކޫލް އޮފް ޕަބްލިކް ހެލްތު ފަދަ އިދާރާތަކުން ކޮށްފައިވާ ދިރާސާތަކުން ހާމަވާގޮތުގައި، ކެއުމުގެ ތެރޭގައި ނުވަތަ ކައި ނިމޭތަނުން ސައި ބުއިމަކީ ދަގަނޑުގެ ބައި ހަށިގަނޑަށް ދަމައިގަންނަ މިންވަރު ފާހަގަކުރެވޭ ވަރަށް މަދުކޮށްލާ ކަމެކެވެ. ބައެއް ހާލަތްތަކުގައި މި މިންވަރު ވަރަށް ބޮޑަށް ދަށްވެގެންދެއެވެ.
މިކަމުގެ ނުރައްކާ އެންމެ ބޮޑީ ދަރިމައިވުމުގެ އުމުރުގެ އަންހެނުންނަށެވެ. ސަބަބަކީ މައްސަރު ކަންތަކާ ގުޅިގެން ހަށިގަނޑުން ލޭ ބޭރުވާތީ، އެފަދަ ފަރާތްތަކަށް ގިނަ އަދަދަކަށް ދަގަނޑުގެ ބައި ބޭނުންވާތީއެވެ. މީގެ އިތުރުން، ހަށިގަނޑުގައި ދަގަނޑުގެ ބައި މަދު މީހުންނާއި، ތަރުކާރީ އެކަނި ކާ މީހުންނާއި، އަދި ފުރާވަރުގެ ކުދިންނަށް ވެސް މިކަމުގެ ސަބަބުން ދަގަނޑުގެ ބައި މަދުވުމުގެ މައްސަލަ ކުރިމަތިވެދާނެ ކަމަށް ސިއްޙީ މާހިރުން އިންޒާރު ދެއްވައެވެ.
އެހެންނަމަވެސް، މީގެ މާނައަކީ މަޗާ ބޭނުންކުރުން ހުއްޓާލުމެއް ނޫނެވެ. މާހިރުން ވިދާޅުވާ ގޮތުގައި މުހިންމީ އެ ބޭނުންކުރާ ވަގުތަށެވެ. ކެއުމުގެ ވަގުތާ ދުރުކޮށް، ދެ ކެއުން ދޭތެރޭގައި މަޗާ ބުއިމުން މި މައްސަލަ ހައްލުވެއެވެ. އަދި ދަގަނޑުގެ ބައި ގިނަ ކާނާއާއެކު ވިޓަމިން ސީ ހިމެނޭ މޭވާ (ލުނބޯ، އޮރެންޖު ފަދަ) ބޭނުންކުުރުމަކީ ހަށިގަނޑަށް ދަގަނޑުގެ ބައި ދަމައިގަތުމަށް އެހީތެރިވެދޭނެ ކަމެކެވެ.
މި ދެންނެވި ކަންތައްތަކާއެކުވެސް، މަޗާއަކީ އޭގައި ހިމެނޭ އެންޓިއޮކްސިޑެންޓްތަކުގެ ސަބަބުން ހިތުގެ ދުޅަހެޔޮކަމަށާއި، ހަށިގަނޑުގެ މެޓަބޮލިޒަމް ރަނގަޅުކުރުމަށާއި، ސިކުނޑީގެ މަސައްކަތްތަކަށް ވަރަށް ފައިދާހުރި ބުއިމެކެވެ. ކާނާއާ ބެހޭ މާހިރުން އިރުޝާދު ދެއްވަނީ މަޗާ ބޭނުންކުރުން ހުއްޓާލުމުގެ ބަދަލުގައި، އެ ބޭނުންކުރުމުގައި ހޭލުންތެރިވެ، މިންގަނޑެއްގައި ހިފެހެއްޓުމަށެވެ.
ދުނިޔޭގެ ސިއްޙަތު ޖަމިއްޔާ ފަދަ ބައިނަލްއަޤުވާމީ އިދާރާތަކުން ފާހަގަކުރާ ގޮތުގައި، ދަގަނޑުގެ ބައި މަދުވުމަކީ މުޅި ދުނިޔޭގައިވެސް އެންމެ އާންމުކޮށް ދިމާވާ ސިއްޙީ އެއް މައްސަލައެވެ. އެހެންކަމުން، ކެއިންބުއިމުގެ އާދަތައް ބައްޓަންކުރާ ގޮތަކީ މިކަމުން ރައްކާތެރިވުމަށް އެޅޭ މުހިންމު ފިޔަވަޅެކެވެ.
މަޗާއަކީ ސިއްޙަތަށް ފައިދާހުރި ބުއިމެކެވެ. ނަމަވެސް، ހަށިގަނޑަށް ބޭނުންވާ މުހިންމު މިނަރަލްއެއް ކަމަށްވާ ދަގަނޑުގެ ބައި ދަމައިގަތުމަށް ހުރަސްއެޅުނު ނުދިނުމަށްޓަކައި، ކެއުމުގެ ވަގުތުތަކާ ދުރުކޮށް މަޗާ ބޭނުންކުރުމަކީ އެންމެ އެދެވިގެންވާ ގޮތް ކަމަށް ދިރާސާތަކުން ދައްކައެވެ.
