ދުނިޔޭގެ މަޝްހޫރު ދިރާސާކުރާ އިދާރާއެއް ކަމަށްވާ “އެޑެލްމަން” އިން ކޮންމެ އަހަރަކު ނެރޭ “ޓްރަސްޓް ބެރޯމީޓަރު” ރިޕޯޓުގެ ހޯދުންތަކުން ދައްކާގޮތުގައި، މީހުން މަސައްކަތާއި ކާމިޔާބީއާމެދު ދެކޭގޮތަށް ބޮޑު ބަދަލެއް ވަނީ އަންނަން ފަށާފައެވެ. މީގެ ކުރިން ބުރަ މަސައްކަތް ކުރުމަކީ ކާމިޔާބީގެ ތަޅުދަނޑި ކަމުގައި ދެކުނު ނަމަވެސް، މިއަދު އެ ވިސްނުން ވަނީ ބަދަލުވާން ފަށާފައެވެ.
މި ދިރާސާއިން ހާމަވާ އެންމެ ފާހަގަކޮށްލެވޭ އެއް ކަމަކީ، ހަމައެކަނި ބުރަ މަސައްކަތުން ދިރިއުޅުން އުޖާލާވެދާނެ ކަމަށް ގިނަ ބަޔަކު މިހާރު ޤަބޫލު ނުކުރާކަމެވެ. ޚާއްސަކޮށް ދުނިޔޭގެ ކުރިއަރާފައިވާ ޤައުމުތަކުގައި މި ޝުއޫރު ވަނީ ވަރަށް ބޮޑަށް އިތުރުވެފައެވެ. ކުރިއަށް އޮތް ފަސް އަހަރު ދުވަހުގެ ތެރޭގައި އެމީހުންގެ ދިރިއުޅުމުގެ ފެންވަރު ރަނގަޅުވާނެކަމާމެދު ގިނަ ބަޔަކު ތިބީ ޝައްކެއްގެ މަތީގައެވެ. މިއީ މުޖުތަމަޢުގެ މުސްތަޤުބަލާމެދު އޮތް އުންމީދު ކުޑަވަމުންދާކަމުގެ ހެއްކެކެވެ.
މިފަދަ ނުރަނގަޅު ވިސްނުންތަކެއް އުފެދުމުގެ މައިގަނޑު ސަބަބަކީ މުޖުތަމަޢުގައި އިޖުތިމާއީ އަދި އިޤްތިސާދީ ތަފާތުކުރުންތައް ނުވަތަ “އިނިކުއަލިޓީ” ބޮޑުވަމުން ދިއުމެވެ. މިކަމުގެ ނަތީޖާއެއްގެ ގޮތުން، ދައުލަތުގެ މުއައްސަސާތަކާއި، ސަރުކާރުތަކާއި، ވިޔަފާރިތަކުގެ އިތުރުން މީޑިއާއަށް އޮންނަ އިތުބާރު ވަނީ ވަރަށް ބޮޑަށް ދަށަށް ގޮސްފައެވެ. ގިނަ ބަޔަކު ޤަބޫލުކުރާ ގޮތުގައި މި މުއައްސަސާތަކުން މަސައްކަތްކުރަނީ ހަމައެކަނި ވަކި ބައެއްގެ މަންފާއަށެވެ.
މިއަދުގެ ދުނިޔޭގެ އިޤްތިސާދީ ނިޒާމާމެދު އޮތް ނުތަނަވަސްކަން މި ދިރާސާއިން ވަރަށް ރަނގަޅަށް ހާމަވެއެވެ. އެގޮތުން، މުޅި ދުނިޔޭގެ ނިސްބަތުން 56 އިންސައްތަ މީހުން ޤަބޫލުކުރާ ގޮތުގައި “ކެޕިޓަލިޒަމް” ނުވަތަ ރައުސްމާލީ ނިޒާމުގެ ސަބަބުން ފައިދާއަށްވުރެ ބޮޑަށް މުޖުތަމަޢަށް ލިބޭ ގެއްލުން މާ ބޮޑެވެ. މި ހޯދުންތަކުން އެނގިގެންދަނީ، މިއަދުގެ އިޤްތިސާދީ ނިޒާމު އަލުން މުރާޖައާކޮށް، އެންމެންނަށް ހަމަހަމަ ފުރުސަތުތަކެއް ލިބޭނެފަދަ އިންސާފުވެރި ނިޒާމަކަށް މީހުން ބޭނުންވެފައިވާ މިންވަރެވެ.
