ދުނިޔޭގެ މަޝްހޫރު ވިޔަފާރި މަޖައްލާއެއް ކަމަށްވާ “އިންކް” އިން ޝާއިޢުކޮށްފައިވާ ރިޕޯޓެއްގައި، އެހެން މީހުންނަށްވުރެ ފާހަގަކޮށްލެވޭ ފަދަ ކާމިޔާބު ލީޑަރުންގެ ކިބައިގައި ހުންނަ އިމޯޝަނަލް އިންޓެލިޖެންސް ނުވަތަ ޖަޒުބާތުތަކުގެ މުހިންމު އާދަތަކެއް ވަނީ ތަފްސީލުކޮށްދީފައެވެ.
މި ރިޕޯޓުގައި ބަޔާންކޮށްފައިވާ ގޮތުގައި، ހަމައެކަނި ތަޢުލީމަށްވުރެ ބޮޑަށް، މީހުންގެ އިޙްސާސްތައް ދެނެގަތުމުގެ ގާބިލުކަން ހުންނަ ލީޑަރުންނަކީ މަސައްކަތުގެ މާހައުލުގައި ބޮޑެތި ކާމިޔާބީތައް ހޯދާ ބައެކެވެ. މާސެލް ޝްވާންޓޭޒް ލިޔުއްވާފައިވާ މި ރިޕޯޓުގައި ފާހަގަކޮށްފައިވާ މުހިންމު 6 އާދައަކީ:
1- އަމިއްލަ ނަފްސު ދެނެގަތުން: ކާމިޔާބު ލީޑަރުންނަކީ އެމީހުންގެ އަމިއްލަ އިޙްސާސްތަކާއި، އެ އިޙްސާސްތަކުގެ ސަބަބުން އެހެން މީހުންނަށް ކުރާނެ އަސަރު ރަނގަޅަށް ދަންނަ ބައެކެވެ.
2- އެހެން މީހުންގެ އަޑުއެހުން: މިއީ ހަމައެކަނި ބުނާ އެއްޗެއް އަޑުއެހުމެއް ނޫނެވެ. އެއީ މީހާ ބުނަން ބޭނުންވާ މާނަ ދެނެގަނެ، އެކަމަށް އިޙްތިރާމްކުރުމެވެ.
3- އިޙްސާސްތައް ކޮންޓްރޯލްކުރުން: އުނދަގޫ ހާލަތްތަކުގައި ކުއްލި ނިންމުންތައް ނިންމުމުގެ ބަދަލުގައި، މަޑުމައިތިރިކަމާއެކު ކަންކަމަށް އިޖާބަދިނުމަކީ މިއާދައިގެ ތެރޭގައި ހިމެނޭ ކަމެކެވެ.
4- ހަމްދަރުދީވުން: އެހެން މީހުންގެ މަގާމުގައި ހުރެ ކަންކަމާ މެދު ވިސްނާލުމުގެ ގާބިލުކަން ހުރުމަކީ ޓީމެއް ބިނާކުރުމަށް ކޮންމެހެން ބޭނުންތެރި ކަމެކެވެ.
5- ނަމޫނާ ދެއްކުން: ލީޑަރުންނަކީ އެމީހުންގެ އަމަލާއި ބަހުން އެހެން މީހުންނަށް ނަމޫނާ ދައްކާ ބަޔަކަށް ވާންޖެހެއެވެ.
6- މުޢާމަލާތް ކުރުމުގެ ހުނަރު: ސާފުކޮށް އަދި އިޙްތިރާމާއެކު މުޢާމަލާތް ކުރުމަކީ މުވައްޒަފުންގެ އިތުބާރު ހޯދުމަށް އެހީތެރިވެދޭ ކަމެކެވެ.
މި ދިރާސާއިން ދައްކާގޮތުގައި، އިމޯޝަނަލް އިންޓެލިޖެންސް މަތި ލީޑަރުން ތިބޭ ކުންފުނިތަކުގައި މުވައްޒަފުންގެ ހިތްހަމަޖެހުން އިތުރުވެ، މަސައްކަތުގެ ފެންވަރު ރަނގަޅުވެގެންދެއެވެ. މިއީ މިއަދުގެ ވާދަވެރި ދުނިޔޭގައި ކޮންމެ ލީޑަރަކުވެސް އަށަގަންނުވަންޖެހޭ މުހިންމު ސިފަތަކެއް ކަމަށް މި ރިޕޯޓުގައި ފާހަގަކޮށްފައިވެއެވެ.
