ފޭސްބުކްގައި “މެޖިކް ސްވެޕް ޕަޒަލް” ވައިރަލްވަމުން އަންނަތަން ފެނުމުން އަހަރެންވެސް ޓްރައިކޮށްލީމެވެ. ލިބޭ ނަތީޖާ ފޮޓޯ ވަރަށް ހިތްގައިމެވެ. މިކަން ކޮށްލީ، މިކަމުން އެއްވެސް ރިސްކެއް (ހިރާސް އެއް) ނުލިބޭނެކަމަށް ކޮންމެވެސް ވަރަކަށް ބަލައި ހޯދުމަށްފަހުގައެވެ.

ފޭސްބުކްގައި “މެޖިކް ސްވެޕް ޕަޒަލް” އާންމުވެފައިވަނީ، މިއީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ފޮޓޯތަކަށް ބަދަލު ގެނައުމަށް ލިބޭ މަޖާ، ހިލޭ އަދި ފަސޭހަ ވަސީލަތަކަށް ވާތީއެވެ. މި އެޕްލިކޭޝަން މެދުވެރިކޮށް މޫނު ބަދަލުކުރުމާއި، އޭއައި ބޭނުންކޮށްގެން ޖޯޑުތަކުގެ ފޮޓޯ އުފެއްދުމާއި، ހެދުމާއި އިސްތަށިގަނޑުގެ ސްޓައިލް ބަދަލުކުރުން ފަދަ ތަފާތު ކަންކަން ކުރެވެއެވެ.

މި ޓްރެންޑަށް މިލިއަނުން މީހުން ޝައުގުވެރިވާ މައިގަނޑު ސަބަބުތަކަކީ:

1- މަޖާކުރުމާއި އޮޅުންފިލުވުން: ތަފާތު އުމުރުފުރާތަކެއްގައި ނުވަތަ ތަފާތު ސިފަތަކެއްގައި ތިމާ ފެންނާނެ ގޮތް ބަލާލުމަކީ ގިނަ ބަޔަކު ހިތްހަމަޖެހުން ހޯދާ ކަމެކެވެ. މީގެ އިތުރުން، ތަފާތު ސްޓައިލްތަކެއްގައި ތިމާގެ ސިފަ ހުންނާނެ ގޮތް ތަސައްވަރު ކޮށްލުމަށް މިއީ މަޖާ ގޮތެކެވެ.

2- ވައިރަލް ޓްރެންޑްސް: ގާތް ރައްޓެހިންނާއި އާއިލާގެ މީހުން މިފަދަ ފޮޓޯތައް ސޯޝަލް މީޑިއާގައި ހިއްސާކުރާތަން ފެނުމުން، އަމިއްލަ ފޮޓޯ ބޭނުންކޮށްގެން ނަތީޖާ ބަލާލުމުގެ ޝައުގުވެރިކަން މީހުންގެ މެދުގައި އުފެދެއެވެ.

3- ސޯޝަލް މީޑިއާގައި ހިއްސާކުރުން: މި އެޕް ފަރުމާކޮށްފައިވަނީ އެހެން މީހުންނާ ގުޅުން ބަދަހިކޮށް، ކޮމެންޓާއި ރިއެކްޝަންތައް ހޯދުމަށް ފަސޭހަވާ ގޮތަށް ކަމަށްވުމުން، މިއީ މީހުންގެ މެދުގައި ވަރަށް ބޮޑަށް މަގުބޫލުވެފައިވާ ކަމެކެވެ.

އެއްވެސް ހިރާސްއެއް އެބަ އޮތްތަ؟

ނަމަވެސް، މިފަދަ އެޕްލިކޭޝަންތައް ބޭނުންކުރުމުގައި ސަމާލުވުމަށް ކަމާބެހޭ މާހިރުން އިރުޝާދުދެއެވެ. އަމިއްލަ ފޮޓޯ މިފަދަ ޕްލެޓްފޯމްތަކަށް އަޕްލޯޑް ކުރުމަކީ ޒާތީ މައުލޫމާތުގެ ސިއްރުވެރިކަން ގެއްލި، ފިޝިން ހަމަލާތަކާއި، ޑޭޓާ އެއްކުރުމާއި، އަދި މީހެއްގެ ވަކިވަކި ސިފަތައް ބޭނުންކޮށްގެން މަކަރާއި ހީލަތް ހެދުން (އައިޑެންޓިޓީ ތެފްޓް) ފަދަ ސަލާމަތީ ނުރައްކާތަކަށް މަގުފަހިވެދާނެ ކަމެކެވެ.

ފޭސްބުކްގައި މިފަދަ ގޭމް ކުޅުމުން ކުރިމަތިވެދާނެ ނުރައްކާތައް: އަމިއްލަ މައުލޫމާތުގެ ރައްކާތެރިކަމާއި ޑޭޓާ ލީކުވުން

ފޭސްބުކް މެދުވެރިކޮށް ގޭމް ކުޅުމަކީ މުނިފޫހިފިލުވުމަށް ކުރާ ކަމެއްގެ ގޮތުގައި ފެނުނު ނަމަވެސް، މީގެ ސަބަބުން ބޭނުންކުރާ ފަރާތްތަކަށް ސަމާލުވާންޖެހޭ އެތައް ނުރައްކާތަކެއް ކުރިމަތިވެއެވެ. މީގެ ތެރެއިން އެންމެ ބޮޑު އެއް މައްސަލައަކީ އަމިއްލަ ސިއްރު މައުލޫމާތުތައް ރައްކާތެރިނުވުމާއި، މައުލޫމާތުތައް ނުބައި ފަރާތްތަކުގެ އަތްމައްޗަށް ދިއުމެވެ.

ފޭސްބުކްގައި ގޭމް ކުޅޭއިރު، އާންމުކޮށް އެ ގޭމް އެޕްލިކޭޝަންތަކަށް ބައެއް ހުއްދަތައް ދޭންޖެހެއެވެ. މީގެ ތެރޭގައި ޕްރޮފައިލްގެ މައުލޫމާތާއި ރައްޓެހިންގެ ލިސްޓަށް ވަނުމުގެ ހުއްދަ ހިމެނެއެވެ. ނުބައި ނިޔަތެއް އޮންނަ ޑިވެލޮޕަރުން މި މައުލޫމާތުގެ ނާޖާއިޒު ފައިދާ ނަގައި، ނުވަތަ ބޭނުންކުރާ ފަރާތުގެ ހުއްދައަކާ ނުލައި ތިންވަނަ ފަރާތްތަކަށް މި މައުލޫމާތު ވިއްކާލުމުގެ ފުރުސަތު އޮވެއެވެ. މިއީ އަމިއްލަ ދިރިއުޅުމުގެ ސިއްރުތަކަށް އޮތް ބޮޑު ނުރައްކަލެކެވެ.

މީގެ އިތުރުން، ޑޭޓާ ބްރީޗް ނުވަތަ މައުލޫމާތު ވަގަށް ނެގުމަކީ ވެސް ފޭސްބުކް ގޭމްތަކާ ގުޅިފައިވާ ބޮޑު ބިރެކެވެ. ފާއިތުވި އަހަރުތަކުގައި ގޭމް އުފައްދާ ބައެއް ކުންފުނިތަކުގެ ޑޭޓާބޭސްތައް ހެކްކޮށް، ބޭނުންކުރާ ފަރާތްތަކުގެ ޔޫޒަރނޭމް، ޕާސްވޯޑް އަދި އަމިއްލަ މައުލޫމާތުތައް ލީކުވެފައިވާ އެތައް ހާދިސާތަކެއް ހިނގާފައިވެއެވެ. ހެކަރުން މި މައުލޫމާތު ބޭނުންކޮށްގެން މީހުންގެ ވަކިވަކި މައުލޫމާތު ވަގަށް ނެގުމާއި ހުއްދައާ ނުލައި އެކައުންޓްތަކަށް ވަނުން ފަދަ ގެއްލުންދެނިވި އަމަލުތައް ހިންގައެވެ.

މިފަދަ ނުރައްކާތަކުން ސަލާމަތްވުމަށްޓަކައި، ފޭސްބުކް ގޭމްތަކަށް ހުއްދަ ދިނުމުގައި ބޭނުންކުރާ ފަރާތްތަކުން ވަރަށް ބޮޑަށް ސަމާލުވާންޖެހެއެވެ. އެޕްލިކޭޝަނުން އެދޭ ހުއްދަތަކަކީ އެ ގޭމް ކުޅުމަށް ކޮންމެހެން ބޭނުންތެރި މައުލޫމާތެއްތޯ ބަލައި ދެނެގަތުން މުހިންމެވެ. އަދި ފޭސްބުކްގެ ޕްރައިވެސީ ސެޓިންގްސް ގަވާއިދުން ޗެކްކޮށް، ގޭމް އެޕްލިކޭޝަންތަކާއި އެހެނިހެން ފަރާތްތަކަށް ފެންނަ މައުލޫމާތުތައް ކޮންޓްރޯލް ކުރަންވާނެއެވެ.

މިކަންކަމަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމުން، އަމިއްލަ މައުލޫމާތަށް ލިބިދާނެ ގެއްލުންތައް ކުޑަކޮށް، ރައްކާތެރިކަމާއެކު ފޭސްބުކްގައި ގޭމް ކުޅުމުގެ ފުރުސަތު ލިބިގެންދާނެއެވެ.