އިންޑިއާގެ މުނިފޫހިފިލުވުމުގެ ދާއިރާގައި ބޮޑު މަޤުބޫލުކަމެއް ހޯދާފައިވާ ރިއަލިޓީ ޝޯވ “ލޮކް އަޕް” ގެ ދެވަނަ ސީޒަން ފޯރިއާއެކު ކުރިއަށްދާއިރު، ބެލުންތެރިންނަށް ލިބުނު އެންމެ ބޮޑު އުފަލަކީ ޝޯވގެ ކުރީގެ ހޯސްޓް، ބޮލީވުޑްގެ މަޝްހޫރު ބަތަލާ ކަންގަނާ ރަނާވަތު އަލުން މި ޝޯއިން ފެންނަން އުޅޭކަމުގެ ޚަބަރެވެ.
މި ހަފުތާ ބަންދުގައި ދެއްކުމަށް ހަމަޖެހިފައިވާ މި ސީޒަނުގެ ފުރަތަމަ “ޓާމިނޭޝަން” ނުވަތަ ބައިވެރިއަކު ވަކިކުރާ އެޕިސޯޑުގައި ކަންގަނާ ފެނިގެންދާނީ ވަރަށް ތަފާތު ރޯލަކުންނެވެ. އޭނާ މިފަހަރު ޝޯވއާ ގުޅެނީ “ޖަންތާ ކީ އަވާޒް” ނުވަތަ ރައްޔިތުންގެ އަޑުގެ ގޮތުގައެވެ. މިއީ ޝޯވގެ ބައިވެރިންނަށް އާންމު ރައްޔިތުންގެ ފަރާތުން ހުރި ސުވާލުތަކާއި، ޝަކުވާތައް އަދި ޚިޔާލުތައް ފޯރުކޮށްދިނުމަށް ހަމަޖެހިފައިވާ ޚާއްސަ ދައުރެކެވެ.
“ލޮކް އަޕް” ސީޒަން 2 ގައި މިހާރު ވެސް ޓީވީ ދާއިރާ އާއި، ސޯޝަލް މީޑިއާ އިންފްލުއެންސަރުން އަދި މުނިފޫހިފިލުވުމުގެ ދާއިރާގެ ތަފާތު މިޒާޖުތަކުގެ 15 ބައިވެރިއަކު ދަނީ އެކަހެރިކޮށް ބަންދުކޮށްފައިވާ މާހައުލެއްގައި ވާދަކުރަމުންނެވެ. ޝޯވގެ ފުރަތަމަ ސީޒަނާ ޚިލާފަށް މިފަހަރުގެ ސީޒަން ފެށުނުއިރު ކަންގަނާ ހޯސްޓެއްގެ ގޮތުގައި ނުފެނުމުން ގިނަ ބައެއްގެ ސުވާލުތައް ވަނީ އަމާޒުވެފައެވެ.
މިކަމާ ގުޅޭގޮތުން ޝޯވގެ މަޝްހޫރު ޕްރޮޑިއުސަރު އެކްތާ ކަޕޫރު ބުނެފައިވަނީ، ކަންގަނާ ޝޯވގެ ކުރީކޮޅު ނުފެނުނީ ޝޯވގެ ފޯމެޓަށް ވަރަށް ބޮޑު ބަދަލެއް ގެނައުމަށް ނިންމާފައިވާތީ ކަމަށެވެ. އެކްތާ ހާމަކުރި ގޮތުގައި، މި ބަދަލުތަކަކީ ބެލުންތެރިންނަށް ޝޯވ އިތުރަށް ޝައުޤުވެރިކުރުވުމަށާއި، ކަންގަނާގެ ދައުރު މުޅިން އާ ގޮތަކަށް ދައްކާލުމަށް ގެނައި ބަދަލުތަކެކެވެ.
މިހާރު ޝޯވގެ މައިގަނޑު ހޯސްޓުންގެ ގޮތުގައި ފެންނަނީ ފަރާ ޚާން އަދި ރިތޭޝް ދޭޝްމުކްއެވެ. ނަމަވެސް، މި ހަފުތާ ބަންދުގައި ކަންގަނާ އެ ދެ މީހުންނާ ގުޅިގެން ޝޯވގެ ފޯރި އިތުރަށް ގަދަކޮށްލާނެކަމަށް ބެލެވެއެވެ. “ޖަންތާ ކީ އަވާޒް” ގެ ގޮތުގައި ކަންގަނާ ބައިވެރިންނާ ކުރިމަތިލާއިރު، ބައިވެރިންނަށް އެކަމުގެ ސަބަބުން ކުރިމަތިވާނެ ގޮންޖެހުންތަކާއި، ޝޯވއަށް އަންނާނެ ބަދަލުތަކަށް ބެލުންތެރިން މިހާރު ތިބީ ކެތްމަދުވެފައެވެ.
ކަންގަނާ ފެނިގެންދާ މި ފޯރިގަދަ އެޕިސޯޑު ނެޓްފްލިކްސް މެދުވެރިކޮށް ދެއްކުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ރޭ ރާއްޖޭ ގަޑިން 7:30 ގައެވެ. މިއީ މި ސީޒަނުގެ ފުރަތަމަ ބައިވެރިއަކު ޝޯއިން ވަކިވެގެންދާ އެޕިސޯޑަށް ވުމުން، ކަންގަނާގެ ހަރުކަށި އަދި ސީދާ ސުވާލުތަކުން ބައިވެރިންގެ މެދުގައި ބޮޑު ނުތަނަވަސްކަމެއް އުފެދިގެންދާނެކަމަށް މުނިފޫހިފިލުވުމުގެ ޚަބަރުތައް ގެނެސްދޭ ފަރާތްތަކުން ލަފާކުރެއެވެ.
