ތަމަޅަ ސިނަމާގެ މަޝްހޫރު ސުޕަރސްޓާރު ތަލަޕަތީ ވިޖޭ، ފިލްމީ ދާއިރާއިން ވަކިވުމުގެ ކުރިން ކުޅޭ އެންމެ ފަހު ފިލްމު “ޖަނަ ނާޔަގަން” ރިލީޒްކުރާ ތާރީޚު ރަސްމީކޮށް އިޢުލާންކޮށްފިއެވެ.

އެޗް. ވިނޯދު ޑައިރެކްޓްކޮށްފައިވާ މި ފިލްމު ސިނަމާތަކަށް އަންނާނީ 23 ޖުލައި 2026 ގައެވެ. ފިލްމު ރިލީޒްކުރުން މަސްތަކަކަށް ލަސްވުމަށްފަހު، މި ތާރީޚު އިޢުލާންކޮށްފައިވަނީ ފިލްމުގެ ޕްރޮޑަކްޝަން ޓީމުން ސޯޝަލް މީޑިއާގައި ހިއްސާކުރި ޕޯސްޓެއްގައެވެ.

މި ފިލްމާ ގުޅޭގޮތުން ޕްރޮޑިއުސަރު ވެންކަޓް ކޭ. ނާރާޔަނާ ބުނީ، މިއީ ސިނަމާގެ ތާރީޚުގައި ފާހަގަކޮށްލެވޭނެ މުހިންމު ވަގުތެއް ކަމަށެވެ. އަދި ވިޖޭގެ ފިލްމީ ކެރިއަރުގެ މި ފަހު ދަތުރުގައި ބައިވެރިވުމަކީ ލިބުނު ބޮޑު ޝަރަފެއް ކަމަށް އޭނާ ފާހަގަކުރިއެވެ. މި ފިލްމަކީ ވިޖޭގެ ކާމިޔާބު ކެރިއަރާ ގުޅޭ ފަދަ ފުރިހަމަ ވަދާޢީ ފިލްމަކަށް ވާނެ ކަމަށްވެސް އޭނާ ބުންޏެވެ.

“ޖަނަ ނާޔަގަން” ބިނާވެފައިވަނީ ކުރީގެ އޮފިޝަލެއް ކަމަށްވާ ތަލަޕަތީ ވެޓްރީ ކޮންޑަންގެ މައްޗަށެވެ. އޭނާ ކުޑަ އަންހެން ކުއްޖަކު (ވިޖީ) އެޑޮޕްޓްކޮށް، އެ ކުއްޖާއަކީ މިނިވަން ވަރުގަދަ އަންހެނެއްގެ ގޮތުގައި ބޮޑުކުރަން މަސައްކަތް ކުރެއެވެ. އެ ކުއްޖާ އަނިޔާވެރިކަމަށް ބިރުގަތް ނަމަވެސް، ސިފައިންގެ ޚިދުމަތާ ގުޅުމަށް ވެޓްރީ ބާރުއަޅައެވެ. މި ދަނޑިވަޅުގައި ޤައުމަށް ކުރިމަތިވާ ބޮޑު ނުރައްކަލަކުން ސަލާމަތްވުމަށް ކުރާ މަސައްކަތުގެ ތެރެއިން، ވެޓްރީގެ އަމިއްލަ ދިރިއުޅުމާ ގުޅޭ ބަދަލުހިފުމުގެ ކަންތައްތަކެއްވެސް ފިލްމުން ފެނިގެންދާނެއެވެ.

މި ފިލްމުގެ މުހިންމު ރޯލުތަކުން ވިޖޭގެ އިތުރުން ޕޫޖާ ހެގްޅޭ، ބޮބީ ޑިއޯލް، މަމީތާ ބައިޖޫ، ގޯތަމް ވަސޫދޭވް މެނަން، ޕްރަކާޝް ރާޖް އަދި ޕްރިޔާމަނީ ފެނިގެންދާނެއެވެ. ފިލްމުގެ މިއުޒިކް ތައްޔާރުކޮށްފައިވަނީ އަނިރޫދް ރަވިޗަންދަރެވެ.

މި ފިލްމަކީ ވިޖޭ ސިޔާސީ ދާއިރާއަށް ފުރިހަމައަށް ވަނުމުގެ ކުރިން ފޭނުންނަށް ގެނެސްދޭނެ އެންމެ ފަހު ހަދިޔާއެވެ. އެހެންކަމުން މި ފިލްމަށް އޮތް އިންތިޒާރު ވަނީ ވަރަށް ބޮޑުވެފައެވެ.