ބޮލީވުޑްގެ މަޝްހޫރު އެކްޓަރު އާމިރު ޚާން، 2009 ވަނަ އަހަރު ނެރުނު ކާމިޔާބު ފިލްމު “3 އިޑިއަޓްސް” ގައި އޭނާ ކުޅުނު ރަންޗޯގެ ކެރެކްޓަރާ ގުޅޭގޮތުން ގިނަ ދުވަސްތަކެއް ވަންދެން ދެކެވެމުން އައި ވާހަކަތަކަށް ނިމުން ގެނެސްފިއެވެ. އާމިރު ބުނި ގޮތުގައި އެ ކެރެކްޓަރަކީ އިންޑިއާގެ ތަޢުލީމީ އިސްލާހީ މަސައްކަތްތެރިޔާ ސޯނަމް ވަންގްޗުކްގެ ދިރިއުޅުމުން އިންސްޕަޔަރވެގެން އުފައްދާފައިވާ ކެރެކްޓަރެއް ނޫނެވެ.
އާމިރު އިތުރަށް ހާމަކުރި ގޮތުގައި، ފިލްމު އުފެއްދި ފަރާތްތަކަށް އެ ދުވަސްވަރު ސޯނަމް ވަންގްޗުކްގެ މަސައްކަތްތަކާ ބެހޭ އެއްވެސް މަޢުލޫމާތެއް އެނގިފައެއް ނެތެވެ. އަދި ރަންޗޯގެ ކެރެކްޓަރާއި ވަންގްޗުކްގެ ހަޤީޤީ ދިރިއުޅުމުގެ މަސައްކަތްތަކާ އެއްވެސް ގުޅުމެއް ނެތް ކަމަށްވެސް އޭނާ ބުންޏެވެ.
“3 އިޑިއަޓްސްގެ އެ ކެރެކްޓަރަކީ ސޯނަމް ވަންގްޗުކްއާ އެއްވެސް ގުޅުމެއް އޮތް ކެރެކްޓަރެއް ނޫން. އަހަރެމެން ފިލްމު ޝޫޓްކުރިއިރު އޭނާއަކީ ކާކުކަންވެސް ނޭނގޭ. މިކަން އޭނާ އަމިއްލައަށްވެސް ވަނީ ޤަބޫލުކޮށްފައި.” އާމިރު ބުންޏެވެ.
މި ކަމާ ބެހޭގޮތުން އާމިރު މިފަދަ ތަފްސީލެއް ދީފައި މިވަނީ، ރަންޗޯގެ އާދަޔާ ޚިލާފު ވިސްނުމާއި ސޯނަމް ވަންގްޗުކްގެ އީޖާދީ އުނގަންނައިދިނުމުގެ ގޮތްތަކާ ދެމެދު އެއްގޮތް ކަންތައްތަކެއް ހުރިކަމަށް ބުނެ ގިނަ ބަޔަކު ބަހުސްކުރާތާ އަހަރުތަކެއް ވެފައިވަނިކޮށެވެ.
ރާޖްކުމާރު ހިރާނީ ޑައިރެކްޓްކުރި “3 އިޑިއަޓްސް” އަކީ ބޮލީވުޑްގެ ތާރީޚުގައި އެންމެ ކާމިޔާބު އެއް ފިލްމެވެ. މި ފިލްމަކީ ތަޢުލީމީ ނިޒާމުގެ ތެރޭގައި ހުންނަ ފިއްތުންތަކާއި، އުފެއްދުންތެރިކަމާއި، އަދި އަމިއްލަ ޝައުޤުވެރިކަން ހުރި ދާއިރާއަކުން ކުރިއަށް ދިއުމުގެ މުހިންމުކަމުގެ މައްޗަށް ބިނާކޮށް އުފެއްދި ފިލްމެކެވެ. މި ފިލްމުގެ ވާހަކަ ނަގާފައިވަނީ ޗެތަން ބަގަތުގެ “ފައިވް ޕޮއިންޓް ސަމްވަން” މި ފޮތުންނެވެ.
ރަންޗޯގެ ކެރެކްޓަރަކީ ޚިޔާލީ ކެރެކްޓަރެއް ނަމަވެސް، އެއީ ކާކުގެ ފަރާތުން އައިސްފައިވާ އިންސްޕިރޭޝަނެއްތޯ ކުރެވޭ ބަހުސްތަކަށް އަދިވެސް ހުއްޓުމެއް ނާދެއެވެ. އާމިރުގެ މި ބަހާއެކު، ފިލްމީ ވާހަކަތަކާއި ހަޤީޤީ ދިރިއުޅުމުގެ ނުފޫޒުތަކާ ދެމެދު ހުންނަ ފަރަގާ ބެހޭގޮތުން އަނެއްކާވެސް އާ ވާހަކަތަކެއް ވަނީ ފެށިފައެވެ.
