އަންނަ ހޯމަ ވިލޭރޭ 00:00ގައި އޮންނަ ވޯލްޑް ކަޕް ފައިނަލްގައި އާޖެންޓީނާގެ ކެޕްޓަން ލިއޮނަލް މެސީ ހުއްޓުވުމަށް ސްޕެއިންއިން “ޚާއްޞަ ސަމާލުކަމެއް” ދޭން ރާވާފައިވާ ކަމަށް އެ ޓީމުގެ ކޯޗު ލުއިސް ޑިލަ ފުއެންޓޭ ބުނެފިއެވެ. ނަމަވެސް، މެސީ ހުއްޓުވުމަށްޓަކައި ވަކި ކުޅުންތެރިއަކު އޭނާ ފަހަތުން ފޮނުވައިގެން މޭން-ޓު-މޭން މާކިންއެއް ބޭނުންކުރުމުގެ ޚިޔާލު އޭނާ ވަނީ ދޫކޮށްލާފައެވެ.
ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން ޑިލަ ފުއެންޓޭ ބުނީ، އަށް ފަހަރު ބެލޮންޑިއޯ ކާމިޔާބުކޮށްފައިވާ މެސީ ހުއްޓުވުމަށް މޭން-ޓު-މޭން މާކިން ބޭނުންކުރުމަކީ ކިހާ އުނދަގޫ ކަމެއްކަން އަމިއްލަ ތަޖުރިބާއިން އެނގޭ ކަމަށެވެ.
މިކަމާ ގުޅޭގޮތުން އޭނާ ވަނީ ސެވިއްޔާގެ ޒުވާން ޓީމުގެ ކޯޗަކަށް ހުރިއިރު، ބާސެލޯނާގެ ޖޫނިއާ ޓީމަށް ކުޅުނު މެސީއާ ދެކޮޅަށް ކުރި ތަޖުރިބާއެއް ހިއްސާކޮށްފައެވެ. މުޅި މެޗުގައި މެސީ ހިމޭނުން ބެހެއްޓުމަކީ މުސްތަހީލު ކަމެއްކަން އޭނާ ފާހަގަކުރިއެވެ.
“އަހަރެން ފުރަތަމަ އޭނާއާ ބައްދަލުވީ ސެވިއްޔާގެ ޔޫތު ޓީމުގެ ކޯޗަކަށް ހުރިއިރު،” ޑިލަ ފުއެންޓޭ ބުންޏެވެ. “އަހަރެމެން ބާސެލޯނާއަށް ދިޔައިރު، މެސީ ކިޔާ ކުއްޖެއްގެ މޮޅު ވާހަކަ ވަރަށް ބޮޑަށް އަޑުއިވިފައި އޮތް. އެހެންވެ، އޭނާ މާކުކުރުމަށް އަހަރެމެން ކުޅުންތެރިއަކު ޚާއްޞަކުރިން. އެކަމަކު 70 ވަނަ މިނެޓުގައި އެ ކުޅުންތެރިޔާ ރީނދޫ ކާޑެއްގައި ހުރުމުން އަހަރެން އޭނާ ބަދަލުކުރީ. އޭރު ނަތީޖާއަކީ 0-0. ނަމަވެސް، އޭގެ ފަހުން އައި 15 މިނެޓުގެ ތެރޭގައި މެސީ އަހަރެމެން ކޮޅަށް ހަތަރު ލަނޑު ޖެހި.”
އޭނާ އިތުރަށް ބުނީ، މިފަހަރު މޭން-ޓު-މޭން މާކިން ބޭނުން ނުކުރާނެ ކަމަށާއި، ނަމަވެސް ވަރަށް ފަރުވާތެރިވެ، ޚާއްޞަ ސަމާލުކަމެއް ދޭންޖެހޭނެ ކަމަށެވެ.
އުމުރުން 39 އަހަރުގެ މެސީ މިފަހަރުގެ ވޯލްޑް ކަޕްގައި އާޖެންޓީނާ ފައިނަލަށް ގެންގޮސްދިނުމުގައި ދައްކަމުންދަނީ ހައިރާންކުރުވަނިވި ކުޅުމެކެވެ. މިއީ އޭނާގެ އެންމެ ފަހު ވޯލްޑް ކަޕް ކަމަށް ބެލެވެއެވެ. “މެސީއަކީ އެވަރެއް ނެތް ކުޅުންތެރިއެއް،” ޑެލަ ފުއެންޓޭ ބުންޏެވެ. “އޭނާގެ އުމުރާ އަޅާބަލާއިރު މި މުބާރާތުގައި ދައްކަމުންދާ ކުޅުމާއި، އޭނާގެ އަޚްލާގަކީ ޒުވާން ކުޅުންތެރިންނަށް ހުރި ނަމޫނާއެއް.”
މި ފައިނަލަކީ ޑެލަ ފުއެންޓޭ އާއި އާޖެންޓީނާގެ ކޯޗު ލިއޮނަލް ސުކަލޯނީގެ ދެމެދުގައި އޮތް ގާތް އެކުވެރިކަމުގެ ކުރިމަތިލުމެއްވެސް މެއެވެ. ސުކަލޯނީ ކޯޗިންގ ލައިސަންސް ހޯދުމަށް ކިޔެވި ދުވަސްވަރު ޑެލަ ފުއެންޓޭއަކީ އޭނާގެ އިންސްޓްރަކްޓަރެކެވެ.
މެޗު ކާމިޔާބުކުރުމަށް އާޖެންޓީނާއިން މަކަރުވެރި ނުވަތަ ނޭދެވޭ އުކުޅުތަކެއް ބޭނުންކޮށްފާނެ ކަމަށް ދެކެވޭ ވާހަކަތަކަށް ޑެލަ ފުއެންޓޭ ވަނީ ރައްދުދީފައެވެ. އޭނާ ބުނީ އާޖެންޓީނާގެ ގައުމީ ޓީމަށް އޭނާގެ ހިތުގައި އޮތީ ނުހަނު ބޮޑު އިހުތިރާމެއް ކަމަށާއި، އެއީ ވޯލްޑް ކަޕާއި، ދެ ކޮޕާ އެމެރިކާ އަދި ފިނަލިސިމާ ކާމިޔާބުކޮށްފައިވާ މޮޅު ޓީމެއް ކަމަށެވެ. އަދި ދެ ޓީމުންވެސް ފެނިގެންދާނީ ހުނަރާއި ރީތި ފުޓުބޯޅަ އިސްކުރާ މަންޒަރު ކަމަށް އޭނާ ގަބޫލުކުރެއެވެ.
މީގެ އިތުރުން، ފައިނަލް މެޗުގެ ހާފް-ޓައިމް ބްރޭކް އާދަޔާ ޚިލާފަށް ދިގުވުމާ ގުޅިގެން ޓީމު ތައްޔާރުކޮށްފައިވާ ކަމަށްވެސް އޭނާ ބުންޏެވެ. ފައިނަލްގެ މެދުކެނޑުމުގައި ބާއްވާ ޝޯއަށް ވަގުތު ދިނުމަށްޓަކައި، އާންމުކޮށް އޮންނަ 15 މިނެޓުގެ ބަދަލުގައި މިފަހަރު 30 މިނެޓުގެ މެދުކެނޑުމެއް އޮންނާނެއެވެ. ޑިލަ ފުއެންޓޭ ދެކޭގޮތުގައި، މިފަދަ ދިގު މެދުކެނޑުންތަކާއި، ފެންބޯން ދޭ ވަގުތުތަކަކީ ކުރިއަށް އޮތް ތަނުގައި ފުޓުބޯޅައިގެ އާންމު ކަމަކަށް ވެގެންދާނެ ކަންކަމެވެ. އޭނާ ބުނީ ފުޓުބޯޅަ ކުރިއަރަމުންދާ ގޮތުން މި ބަދަލުތަކަށް ހޭނެންޖެހޭ ކަމަށެވެ.
