ޕާކިސްތާނުގެ މިނިވަން ދުވަހުގެ މުނާސަބަތަށް ޚާއްސަކޮށް އުފައްދާފައިވާ ޓެލެފިލްމު “ބާރޭ ވަފާ” މި ހިނގާ އޮގަސްޓް މަހުގެ 14 ވަނަ ދުވަހު ދައްކަން ނިންމައިފިއެވެ.

“ބާރޭ ވަފާ” ގެ ވާހަކަ ބިނާވެފައިވަނީ އާންމުކޮށް ފެންނަ އާއިލީ މައްސަލަތަކުގެ މައްޗަކަށް ނޫނެވެ. އޭގެ ބަދަލުގައި، ބޯޑަރު ސަރަހައްދުގައި ހިނގާ ކުރިމަތިލުންތަކުގެ ސަބަބުން އިންސާނުންނަށް ކުރިމަތިވާ ހިތްދަތި ކަންކަމާއި، ހަނގުރާމައިގެ ސަބަބުން އާންމު ދިރިއުޅުމަށް އަންނަ ބަދަލުތައް މި ފިލްމުގައި ވަރަށް ފުރިހަމައަށް ދައްކުވައިދޭނެއެވެ.

މި ފިލްމުގެ މައިގަނޑު މެސެޖަކީ ހަނގުރާމައާ ދެކޮޅު މެސެޖެކެވެ. “މި ބިމަކީ އަހަރެމެންގެ މަންމަ، އަދި އެއްވެސް މަންމައަކު ހަނގުރާމައެއް ބޭނުމެއް ނުވާނެ” މި ޝިއާރުގެ ދަށުން، ލޯތްބާއި، އިންސާނިއްޔަތާއި، އުންމީދުގެ މައްޗަށް މި ފިލްމުގައި އަލިއަޅުވާލާފައިވެއެވެ. ޚާއްސަކޮށް “ލައިން އޮފް ކޮންޓްރޯލް” ސަރަހައްދުގައި ދިރިއުޅޭ މީހުން ހަނގުރާމައިގެ ހިޔަނިދަށުގައި އުފުލާ ތަކުލީފުތައް މި ފިލްމުން ފެނިގެންދާނެއެވެ.

މި ޓެލެފިލްމުގެ މުހިންމު ރޯލުތަކުން ފެނިގެންދާނީ މަޝްހޫރު ލަވަކިޔުންތެރިޔާ އަދި އެކްޓްރެސް ހަދީގާ ކިއާނީ، އުސްމާން ޚާލިދު ބަޓް، ސިދްރާ ނިއާޒީ، ސައްޔިދު ޖިބްރާން އަދި އަސްމާ އައްބާސްއެވެ. މި ފިލްމުގެ ސްކްރިޕްޓް ލިޔެފައިވަނީ ނޫރުލް ހުދާ ޝާހްއެވެ. ސައިފީ ޙަސަން ޑައިރެކްޓްކޮށްފައިވާ މި ފިލްމަކީ ސުލްތާނާ ސިއްދީޤީގެ ޕްރޮޑަކްޝަނެކެވެ.

ހަމް ޓީވީން މި ފިލްމު ދެއްކުމަށް ހަމަޖެހިފައިވަނީ މިމަހުގެ 14 ވާ ބުދަ ދުވަހުގެ ރޭ ރާއްޖެ ގަޑިން 9:00 ގައެވެ.