ދުނިޔޭގެ މަޝްހޫރު ކޭ-ޕޮޕް ގްރޫޕް “ބްލެކްޕިންކް” ގެ މެންބަރު ޖެނީ، އޭނާގެ ދެވަނަ ސޯލޯ އަލްބަމް މި އޯގަސްޓް މަހުގެ ފަހުކޮޅު ނެރުމަށް ތައްޔާރުވަމުން އަންނަކަން ހާމަކޮށްފިއެވެ.
މިކަން ރަސްމީކޮށް ކަށަވަރުކޮށްދީފައިވަނީ އޭނާގެ އެޖެންސީ، އޯއޭ އެންޓަޓެއިންމަންޓް (އޮޑެޓެލިއާ) އިން މިއަދުއެވެ. މިއީ އޭނާގެ ފުރަތަމަ ސޯލޯ އަލްބަމް “ރޫބީ” ނެރުނުތާ ގާތްގަނޑަކަށް ދޮޅު އަހަރު ފަހުން ނެރޭ އަލްބަމެކެވެ. އުމުރުން 30 އަހަރުގެ މި ލަވަކިޔުންތެރިޔާ ދާދިފަހުން ބޭއްވި ބައެއް މިއުޒިކް ފެސްޓިވަލްތަކުގައި ވަނީ މި އަލްބަމުގައި ހިމެނޭ ބައެއް އާ ލަވަތައް ކަމަށްވާ “ލެސް ދޭން އަ ލަވާ”، “ފޯލަން އެންޖެލް” އަދި “ލޮކިޓްޑައުން” ފަދަ ލަވަތަކުގެ ކުޑަ މިންވަރެއް ސަޕޯޓަރުންނަށް އިއްވާލާފައެވެ.
ޖެނީ މިހާރު ވެސް ދަނީ ދުނިޔޭގެ އެކި ކަންކޮޅުތަކުގައި ބޮޑެތި މިއުޒިކް ފެސްޓިވަލްތަކުގައި ޕާފޯމް ކުރަމުންނެވެ. އޭގެ ތެރޭގައި އެމެރިކާގެ ނިއުޔޯކުގައި ބޭއްވި “ދަ ގަވަނާސް ބޯލް މިއުޒިކް ފެސްޓިވަލް”، ޑެންމާކުގެ “ރޮސްކިލްޑޭ ފެސްޓިވަލް”، ޕޮލެންޑުގެ “އޯޕަންއާ ފެސްޓިވަލް”، ސްޕެއިންގެ “މެޑް ކޫލް ފެސްޓިވަލް” އަދި ޖަޕާނުގެ ޓޯކިޔޯގައި ބޭއްވި “ސަމާ ސޮނިކް ފެސްޓިވަލް” ހިމެނެއެވެ. ޖެނީ ވަނީ އޭނާގެ އިންސްޓަގްރާމް މެދުވެރިކޮށް، މި ޝޯވތަކަށް ސަޕޯޓަރުންގެ ފަރާތުން ލިބުނު ތަރުހީބަށް ޝުކުރު އަދާކޮށްފައެވެ.
ޖެނީގެ ފުރަތަމަ ސޯލޯ އަލްބަމް “ރޫބީ” އަކީ ބޮޑު ކާމިޔާބީއެއް ހޯދި އަލްބަމެކެވެ. ޖުމްލަ 15 ލަވަ ހިމެނޭ އެ އަލްބަމް ވަނީ އެމެރިކާގެ ބިލްބޯޑް 200 ޗާޓުގެ 7 ވަނައިގައި ޑެބިއު ކޮށްފައެވެ. މީގެ އިތުރުން، ބިލްބޯޑްގެ ޓޮޕް އަލްބަމް ސޭލްސް ޗާޓުގެ 2 ވަނަ އަދި އިނގިރޭސިވިލާތުގެ އަލްބަމް ޗާޓުގެ 3 ވަނަ ވެސް މި އަލްބަމް ވަނީ ހޯދާފައެވެ.
މި އަލްބަމްގައި ޗައިލްޑިޝް ގެމްބީނޯ، ޑުއާ ލީޕާ، ޑޮމިނިކް ފައިކް، ޑޯޗީ، އެފްކޭޖޭ އަދި ކާލީ އޫޗިސް ފަދަ ދުނިޔޭގެ ނުފޫޒުގަދަ ފަންނާނުންނާއެކު އޭނާ މަސައްކަތް ކޮށްފައިވާއިރު، އެލް ގުއިންޗޯ، ޑިޕްލޯ އަދި މައިކް ވިލް މޭޑް އިޓް ފަދަ މަޝްހޫރު ޕްރޮޑިއުސަރުންނާއި ޅެންވެރިން ވެސް މި އަލްބަމް އުފެއްދުމުގައި ހިއްސާވެފައިވެއެވެ.
