މާވެލް ސިނަމެޓިކް ޔުނިވަރސް (އެމްސީޔޫ) ގެ އެންމެ އިންތިޒާރުކުރެވޭ އެއް ފިލްމު ކަމަށްވާ “އެވެންޖާރސް: ސީކްރެޓް ވޯރސް” ސިނަމާތަކުގައި ރިލީޒްކުރާނެ ތާރީޚު ރަސްމީކޮށް ހާމަކޮށްފިއެވެ. މި ފިލްމު ދުނިޔޭގެ އެކި ކަންކޮޅުތަކުގެ ސިނަމާތަކަށް ގެނައުމަށް ހަމަޖެހިފައިވަނީ 17 ޑިސެމްބަރ 2027 ވާ ހުކުރު ދުވަހުއެވެ.
މި ފިލްމު ޑައިރެކްޓްކުރުމަށް ހަމަޖެހިފައިވަނީ މާވެލްގެ ކާމިޔާބު ގިނަ ފިލްމުތަކެއް ގެނެސްދީފައިވާ މަޝްހޫރު ރުސޯ ބްރަދާސް (އެންތަނީ އަދި ޖޯ ރުސޯ) އެވެ. “އެވެންޖާރސް: ސީކްރެޓް ވޯރސް” އަކީ އެމްސީޔޫގެ ފޭސް 6 އަދި މުޅި “މަލްޓިވަރސް ސާގާ” ގެ އެންމެ ފަހު އަދި އެންމެ ފުރިހަމަ ނިންމުމުގެ ގޮތުގައި ގެނެސްދޭ ފިލްމެވެ. މި ފިލްމުގެ ކުރިން، މި ސިލްސިލާގެ “އެވެންޖާރސް: ޑޫމްސްޑޭ” 18 ޑިސެމްބަރ 2026 ގައި ރިލީޒްކުރުމަށް ވަނީ ހަމަޖެހިފައެވެ.
މި ފިލްމުގެ އެންމެ ފާހަގަކޮށްލެވޭ އެއް ކަމަކީ، މީގެ ކުރިން އައިރަން މޭންގެ ރޯލުން ފެނިގެންދިޔަ މަޤްބޫލު އެކްޓަރު ރޮބަޓް ޑައުނީ ޖޫނިއަރ، މުޅިން ތަފާތު ރޯލަކުން އެނބުރި އައުމެވެ. އޭނާ މި ފަހަރު ފެނިގެންދާނީ ފިލްމުގެ މައިވިލަން ނުވަތަ ނުބައިބައި ކެރެކްޓަރ، “ވިކްޓަރ ވޮން ޑޫމް” (ޑޮކްޓަރ ޑޫމް) ގެ ރޯލުންނެވެ. އޭނާގެ މި ކެރެކްޓަރ “ޑޫމްސްޑޭ” އަދި “ސީކްރެޓް ވޯރ” ގެ ވާހަކަ ގުޅުވައިދޭ މައިގަނޑު ބާރަކަށް ވެގެންދާނެއެވެ.
މީގެއިތުރުން، މި ފިލްމަކީ މާވެލްގެ ތާރީޚުގައިވެސް އެންމެ ގިނަ ތަރިން އެއްފަސްވާނެ އެއް ކްރޮސްއޯވަރ އިވެންޓެވެ. އެގޮތުން، އެވެންޖާރސްގެ އިތުރުން ފެންޓާސްޓިކް ފޯރ އަދި އެކްސް-މެން ގެ މެންބަރުންނާއެކު އެމްސީޔޫގެ ގިނަ އަދަދެއްގެ މަޝްހޫރު ސުޕަހީރޯއިން އެކުގައި މި ފިލްމުން ފެނިގެންދާނެއެވެ.
މިއީ ފިލްމީ ދާއިރާގެ ރެކޯޑުތައް މުގުރާލާނެ ފަދަ ބޮޑު އުފެއްދުމަކަށް ވާނެ ކަމަށް މާވެލްގެ ފޭނުންނާއި މީޑިއާތަކުން ދަނީ ބުނަމުންނެވެ.
