ބޮލީވުޑްގެ މަޝްހޫރު ތަރި ސަލްމާން ޚާން އަދި ދެކުނު އިންޑިއާގެ މަޤުބޫލު ބަތަލާ ނަޔަންތާރާ ލީޑް ރޯލުން ފެނިގެންދާ އާ އެކްޝަން ފިލްމު “މޮންސްޓަރ” (އެސްވީސީ63) ގެ ކާސްޓާ އިންޑިއާގެ ކުޅަދާނަ ދެ އެކްޓަރުން ކަމަށްވާ ރޯނިތު ރޯއީ އާއި ސީމާ ބިސްވާސް ގުޅިއްޖެއެވެ.
މަޝްހޫރު ޑައިރެކްޓަރު ވަމްޝީ ޕައިޑިޕަލީ ޑައިރެކްޓްކުރާ މި ފިލްމުގެ ޝޫޓިން މިހާރު މުމްބާއީގައި ވަރަށް ބާރަށް ކުރިއަށްދާ ކަމަށް ޕިންކްވިލާއިން ވަނީ ކަށަވަރުކޮށްދީފައެވެ.
ޚަބަރުތައް ބުނާގޮތުގައި، ފިލްމުގައި ރޯނިތު ރޯއީ ފެނިގެންދާނީ ވަރަށް މުހިންމު، ޕޮޒިޓިވް އަދި ބޮޑު ރޯލަކުންނެވެ. އޭނާގެ ކެރެކްޓަރަކީ ފިލްމުގެ ވާހަކައަށް ވަރަށް ވަރުގަދަ ބަދަލުތަކެއް ގެނެސްދޭނެ ކެރެކްޓަރެކެވެ. ނަމަވެސް، މަޝްހޫރު ބަތަލާ ސީމާ ބިސްވާސްގެ ރޯލާ ބެހޭ އެއްވެސް މަޢުލޫމާތެއް ފިލްމު އުފައްދާ ޓީމުން އަދި ހާމަކޮށްފައެއް ނުވެއެވެ. އޭނާގެ ރޯލުގައި ބެލުންތެރިން ހައިރާންކޮށްލާނެ ފަދަ ކަންތައްތަކެއް ހުރުމުން، އެ މަޢުލޫމާތު މިވަގުތު ސިއްރުކޮށްފައި ބޭއްވުމަށް ވަނީ ނިންމާފައެވެ.
މި ފިލްމުގައި ސަލްމާން ޚާން ފެނިގެންދާނީ މީގެ ކުރިން ދުވަހަކުވެސް ނުފެންނަ ފަދަ ތަފާތު އެކްޝަން ރޯލަކުންނެވެ. އަދި ނަޔަންތާރާ ވެސް މި ފިލްމުގައި ފެންނާނީ ވަރުގަދަ އެކްޝަން ރޯލަކުންނެވެ. ފިލްމުގެ މުމްބާއީ ޝެޑިއުލް ނިންމުމަށްފަހު، އަންނަ އޮކްޓޯބަރު މަހުގެ ތެރޭގައި ޤައުމުން ބޭރުގައި ކުރިއަށްގެންދާ ކުރު ޝެޑިއުލެއް ފެށުމަށް ވެސް ވަނީ ހަމަޖެހިފައެވެ.
ރޯނިތު ރޯއީ އަދި ސީމާ ބިސްވާސްގެ އިތުރުން، މި ފިލްމުގެ ކާސްޓުގައި އަރަވިންދު ސްވާމީ، ޖެކީ ޝްރޮފް، އަބިމަންޔޫ ސިންގް އަދި ރާހުލް ދޭވް ފަދަ މަޝްހޫރު ގިނަ ތަރިންތަކެއް ހިމެނެއެވެ.
މި ފިލްމު ތާވަލުކޮށްފައިވާ ގޮތަށް ސިނަމާތަކަށް ގެނައުމަށް ފިލްމު އުފައްދާ ޓީމުން ދަނީ މަސައްކަތް ކުރަމުންނެވެ. އެގޮތުން، މި ފިލްމު ރަސްމީކޮށް ރިލީޒްކުރުމަށް ހަމަޖެހިފައިވަނީ 2027 ވަނަ އަހަރުގެ ފިތުރު ޢީދުގައެވެ. ފިލްމުގެ މަސައްކަތްތައް ދަނީ ޕްލޭންކޮށްފައިވާ ތާވަލާ އެއްގޮތަށް ކަމަށާއި، ރިލީޒްކުރާ ތާރީޚަށް އެއްވެސް ބަދަލެއް ނާންނާނެ ކަމަށް މަސްދަރުތަކުން ބުނެއެވެ.
