“ގެސްޓްރޯ ހެޕް އެޑްވާންސަސް” މަޖައްލާގައި ޝާއިޢުކޮށްފައިވާ ދިރާސާއަކުން ދައްކާގޮތުގައި، ދުވާލަކު މަދުވެގެން އެއްފަހަރު ހަކުރު އެކުލެވޭ ބުއިންތައް ބޭނުންކުރާ މީހުންނަށް، އެފަދަ ބުއިންތަކާ ދުރުހެލިވާ މީހުންނާ އަޅާބަލާއިރު ބަނޑުގެ ކެންސަރު ޖެހުމުގެ ފުރުސަތު 2.45 ގުނަ އިތުރެވެ. އެމެރިކާގެ 112,284 މީހުން ބައިވެރިކޮށްގެން ކުރިއަށްގެންދިޔަ މި ދިރާސާއަކީ “ނާރސަސް ހެލްތު ސްޓަޑީ” އާއި “ހެލްތު ޕްރޮފެޝަނަލްސް ފޮލޯ-އަޕް ސްޓަޑީ” ގެ ތަފާސްހިސާބުތަކުގެ މައްޗަށް ބިނާކޮށް ތައްޔާރުކޮށްފައިވާ ދިރާސާއެކެވެ.
ހާަވަޑް ޔުނިވާސިޓީއާ ގުޅުންހުރި މި ދެ ދިރާސާ 1986 އިން 2022 އަށް ކުރިއަށް ގެންގޮސްފައިވާއިރު، މި މުއްދަތުގެ ތެރޭގައި ބަނޑުގެ ކެންސަރުގެ 278 ކޭސް ވަނީ ފާހަގަކުރެވިފައެވެ. މި ނުރައްކާ ދެ ޖިންސުގެ މީހުންނަށް އޮތް ނަމަވެސް، ފިރިހެނުންނަށްވުރެ ބޮޑަށް އަންހެނުންނަށް މި ނުރައްކާ ބޮޑުކަމަށް ދިރާސާއިން ދައްކައެވެ. އެގޮތުން ފިރިހެނުންނަށް މި ނުރައްކާ ދެގުނަ އިތުރުވާއިރު، އަންހެނުންނަށް ގާތްގަނޑަކަށް ތިންގުނަ އިތުރުވާކަން ފާހަގަކުރެވެއެވެ.
މި ދިރާސާގައި ބަލާފައިވަނީ އާންމުކޮށް ބޭނުންކުރާ ފިޒީ ޑްރިންކްސް ނުވަތަ ގޭސް އެކުލެވޭ ބުއިންތަކާއި، ލެމަނޭޑް، ފުރުޓް ޕަންޗް އަދި ސްޕޯޓްސް ޑްރިންކްސް ފަދަ ހަކުރު ގިނަ ބުއިންތަކަށެވެ. ނަމަވެސް، ކެލޮރީ މަދު ނުވަތަ އާޓިފިޝަލް ހަކުރު ބޭނުންކޮށްގެން ތައްޔާރުކޮށްފައިވާ ބުއިންތަކާއި ބަނޑުގެ ކެންސަރާ ދެމެދު ސީދާ ގުޅުމެއް ހުރިކަން މި ދިރާސާއަކުން ނުދައްކައެވެ.
މި ގުޅުން ހުރެދާނެ ކަމަށް ބެލެވޭ ސަބަބުތައް:
މިއީ އޮބްޒަވޭޝަނަލް ނުވަތަ ބަލައިގެން ކުރި ދިރާސާއަކަށް ވާތީ، މިއީ ސީދާ ސަބަބު ކަމަށް ނުބުނެވުނު ނަމަވެސް، ސައިންސްވެރިން ބަޔާންކުރާ ގޮތުގައި މީގެ ފަހަތުގައި ސިއްހީ ގޮތުން ގަބޫލުކުރެވޭ ސަބަބުތަކެއް އެބަހުއްޓެވެ. ހަކުރު އެކުލެވޭ ބުއިންތަކަކީ ފްރަކްޓޯޒް ގިނަ ބުއިންތަކަކަށް ވެފައި، މި ދިރާސާގައި ބައިވެރިވި މީހުންގެ ތެރެއިން ފްރަކްޓޯޒް ބޭނުންކުރި މިންވަރު އިތުރުވި ވަރަކަށް، ބަނޑުގެ ކެންސަރު ޖެހުނު މިންވަރު އިތުރުވެފައިވާކަން ވަނީ ފާހަގަކުރެވިފައެވެ.
މީގެ އިތުރުން ހަށިގަނޑުގެ ބަރުދަން އިތުރުވުމާއި، އިންސިއުލިން ރެސިސްޓަންސް (ހަށިގަނޑުގެ ސެލްތަކުން އިންސިއުލިންއަށް އިޖާބަދޭ މިންވަރު ދަށްވުން) އާއި، ހޯރމޯންތަކަށް އަންނަ ބަދަލުތަކާއި، ދާއިމީކޮށް ހަށިގަނޑުގެ އެތެރޭގައި އިންފްލެމޭޝަން އުފެދުމާއި، ޑީ.އެން.އޭ އަށް ލިބޭ ގެއްލުންތަކަކީވެސް މީގެ ސަބަބުތަކަށް ވެދާނެއެވެ.
މެސެޗުސެޓްސް ޖެނެރަލް ހޮސްޕިޓަލްގެ ގެސްޓްރޯއެންޓްރޮލޮޖިސްޓް އެންޑްރޫ ޓީ. ޗޭން ވިދާޅުވި ގޮތުގައި، މިއީ އެމެރިކާގެ އާބާދީގެ މެދުގައި ހަކުރު އެކުލެވޭ ބުއިންތަކާއި ބަނޑުގެ ކެންސަރާ ހުރި ގުޅުން ދެނެގަތުމަށް ކުރެވުނު ފުރަތަމަ ދިރާސާއެވެ.
މި ނަތީޖާއިން ދޭހަވަނީ ކޮން ކަމެއް؟
އެމެރިކާގައި ބަނޑުގެ ކެންސަރަކީ އެންމެ އާންމު ކެންސަރަކަށް ނުވީތީ، “ދެގުނަ އިތުރުވުން” މި ލަފުޒު މާނަކުރަންޖެހެނީ ބަލި ޖެހުމުގެ އަސްލު ފުރުސަތަށް ބަލައިގެންނެވެ. އެމެރިކާގެ ކެންސަރު ސޮސައިޓީން އަންދާޒާކުރާ ގޮތުގައި 2026 ވަނަ އަހަރު ބަނޑުގެ ކެންސަރުގެ 31,510 އާ ކޭސް ފެންނާނެ ކަމަށް ބެލެވޭއިރު، މިއީ އާބާދީގެ ނިސްބަތުން ބަލާއިރު މަދު މިންވަރެކެވެ. ނަމަވެސް، މި ދިރާސާގެ މުހިންމުކަން ބޮޑީ އެމެރިކާގެ ބޮޑު އާބާދީއެއް (ގާތްގަނޑަކަށް ތިންބައިކުޅަ ދެބައި މީހުން) ކޮންމެ ދުވަހަކުވެސް ހަކުރު އެކުލެވޭ ބުއިންތައް ބޭނުންކުރާތީއެވެ.
މި ދިރާސާގެ ބައެއް އުނިކަންކަންވެސް އެބަހުއްޓެވެ. އެގޮތުން ބަނޑުގެ ކެންސަރަށް އެންމެ ބޮޑަށް މަގުފަހިވާ ‘ހެލިކޯބެކްޓަރ ޕައިލޯރީ’ އިންފެކްޝަނާ ބެހޭ ފުރިހަމަ މައުލޫމާތު މި ދިރާސާގައި ނެތްކަން ފާހަގަކުރެވެއެވެ.
ބަނޑުގައި ރިއްސުން، އަވަހަށް ބަނޑުފުރުން، މޭނުބައިކުރުން ނުވަތަ ނޭނގި ބަރުދަން ލުއިވުން ފަދަ އަލާމާތްތައް ދިގުލައިގެންދާނަމަ، އަމިއްލައަށް ކަންކަން ނިންމުމުގެ ބަދަލުގައި ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ. ސިއްހީ މާހިރުންގެ އިރުޝާދަކީ ކޮންމެ ދުވަހަކު ބޭނުންކުރާ ހަކުރު ގިނަ ބުއިންތަކުގެ ބަދަލުގައި ފެން ނުވަތަ ހަކުރު ނާޅާ ސައި ފަދަ ބުއިންތަކަށް އާދަކުރުމެވެ.
