⏱️ ތައްޔާރުކުރަން ނަގާނެ ވަގުތު: 15 މިނެޓް
⏱️ ކައްކަން ނަގާނެ ވަގުތު: 25–30 މިނެޓް
🍽️ ތައްޔާރުކުރެވޭ މިންވަރު: 4 މީހުންނަށް

🛒 ބޭނުންވާ ތަކެތި

ކުކުޅު ތައްޔާރުކުރުމަށް:

● 4 ކުކުޅު މޭމަތި މަސް (ކަށިނެތް، ހަންނެތް)
● 1 ޖޯޑު މަޝްރޫމް (ހިމުންކޮށް ކޮށާފައި)
● ½ ޖޯޑު ކްރީމް ޗީޒް (މަޑުކޮށްފައި)
● ½ ޖޯޑު މޮޒަރެއްލާ ޗީޒް (ގާނާފައި)
● 3 ސައިސަމުސާ ބަޓަރު
● 3 ލޮނުމެދު (ގާނާފައި ނުވަތަ ހިމުންކޮށްފައި)
● 1 ސައިސަމުސާ އިޓަލިއަން ސީޒަނިންގް
● ½ ސައިސަމުސާ ޕެޕްރިކާ
● ލޮނު (ރަހަލާވަރަށް)
● އަސޭމިރުސް (ރަހަލާވަރަށް)
● 1 ސަމުސާ އޮލިވް އޮއިލް

ޒީނަތްތެރިކުރުމަށް (އިޚްތިޔާރީ):

● ކޮށާފައި ހުރި ކޮތަނބިރި ފަތް
● އިތުރު މޮޒަރެއްލާ ޗީޒް
● ކުޑަ މިރުސް ކޮޅެއް (ޗިލީ ފްލޭކްސް)

👩‍🍳 ތައްޔާރުކުރާނެ ގޮތް:

1 – މަޝްރޫމް ފިލިންގް ތައްޔާރުކުރުން

އުނދުން މެދު ގިނީގައި ބަހައްޓައިގެން ތަވާއަކަށް 1 ސަމުސާ ބަޓަރު އަޅައި ހޫނުކޮށްލާށެވެ.
ކޮށާފައި ހުރި މަޝްރޫމްތައް އަޅައި، 4-5 މިނެޓް ވަންދެން ނުވަތަ މަޝްރޫމްތައް މަޑުވެ އޭގައި ހުރި ފެންފޮދު ހިކެންދެން ކައްކާލާށެވެ.
ތައްޔާރުކުރި ލޮނުމެދުގެ ދެބައިކުޅަ އެއްބައި އަޅައި އިތުރު 30 ސިކުންތު ވަންދެން ކައްކާލާށެވެ.
އުނދުން މަތިން ބޭލުމަށްފަހު މަޝްރޫމްތައް ކުޑަކޮށް ހިހޫވަންދެން ބަހައްޓާށެވެ.
ދެން ކްރީމް ޗީޒް އަދި މޮޒަރެއްލާ ޗީޒްއާ މަޝްރޫމް ރަނގަޅަށް އެއްކޮށްލުމަށްފަހު ބަހައްޓާށެވެ.

2 – ކުކުޅު ތައްޔާރުކުރުން

ކުކުޅު މަސްގަނޑުގައި ހުރި ފެންފޮދު ޓިޝޫއަކުން ފޮހެލައި ހިއްކާލާށެވެ.
ތޫނު ވަޅިއެއް ބޭނުންކޮށްގެން ކުކުޅު މަސްގަނޑުގެ އެންމެ ބޯ ފަރާތުން ހުރަހަށް ކޮށާލައި ޖީބެއް ފަދަ ހުސްތަނެއް ހަދާށެވެ. (މަސްގަނޑު މުޅިން ވަކިވެގެން ނުދާނެހެން ސަމާލުވާށެވެ.)
ކުކުޅުގެ ދެފަރާތުގައި ލޮނު، އަސޭމިރުސް، ޕެޕްރިކާ އަދި އިޓަލިއަން ސީޒަނިންގް އުނގުޅާލާށެވެ.

3 – ކުކުޅަށް ފިލިންގް އެޅުން

ކުރިން ތައްޔާރުކުރި މަޝްރޫމް އަދި ޗީޒްގެ މިކްސްޗަރު، ކުކުޅު މަސްގަނޑު ތެރޭގައި ހެދި ޖީބުތަކަށް އެއްވަރަކަށް އަޅާށެވެ.
ފިލިންގްތައް ބޭރަށް ނުނިކުންނާނެހެން މަސްގަނޑުގެ އަރިމަތިތައް ބާރުކޮށްލާށެވެ. ބޭނުންނަމަ ދަތްކޮށްޓާ އިލޮށިކޮޅެއް ބޭނުންކޮށްގެން ލައްޕާލެވިދާނެއެވެ.

4 – ގާލިކް ބަޓަރު ތައްޔާރުކުރުން

ތަވާއަކަށް ބާކީ ހުރި 2 ސަމުސާ ބަޓަރު އަޅައި މެދު ގިނީގައި ވިރުވާލާށެވެ.
ބާކީ ހުރި ލޮނުމެދުކޮޅު އަޅައި، މީރުވަސް ދުވަންދެން ގާތްގަނޑަކަށް 30 ސިކުންތު ކައްކާލާށެވެ.

5 – ކުކުޅު ތަވައިގައި ފިހުން

އެ ތަވާއަށް އޮލިވް އޮއިލްކޮޅު އަޅައި ހޫނުކޮށްލާށެވެ.
ކުކުޅުތައް ތަވައަށް ލައި، ދެފަރާތް ރަން މުށިކުލަ އަރަންދެން ކޮންމެ ފަރާތެއް ގާތްގަނޑަކަށް 3-4 މިނެޓް ވަންދެން ފިހެލާށެވެ.

6 – އަވަނުން ފިހެ ނިންމުން

190 ޑިގްރީ ސެލްސިއަސް (375 ޑިގްރީ ފެރެންހައިޓް) އަށް ހޫނުކޮށްފައިވާ އަވަނަށް ތަވާ ލައި، 15-20 މިނެޓް ވަންދެން ފިހާށެވެ.
ކުކުޅު ރަނގަޅަށް ރޯފިލާފައިވާކަން ޔަގީންކުރުމަށް، ކުކުޅުގެ އެންމެ ބޯ ހިސާބުގެ ހޫނުމިން 74 ޑިގްރީ ސެލްސިއަސް (165 ޑިގްރީ ފެރެންހައިޓް) އަށް ހުންނަންވާނެއެވެ.
ކުކުޅު ފިހެ ނިމެން ކުޑަ ވަގުތުކޮޅަކަށް ވުމުން، ބޭނުންނަމަ މައްޗަށް އިތުރު ޗީޒް ކޮޅެއް ބުރުވާލެވިދާނެއެވެ.

7 – ސާރވްކުރުން

އަވަނުން ނެގުމަށްފަހު، ކެއުމުގެ ކުރިން 5 މިނެޓް ވަންދެން މަޑުކޮށްލާށެވެ.
މައްޗަށް ކޮތަނބިރި ފަތާއި މިރުސްކޮޅެއް ބުރުވާލުމުން ރަހަ އިތުރަށް ފުރިހަމަވާނެއެވެ.

އިރުޝާދު:

● ފިލިންގް މީރުކުރުމަށްޓަކައި ކްރީމް ޗީޒް ބޭނުންކުރުމުގެ ކުރިން މަޑުކޮށްލާށެވެ. އަދި މަޝްރޫމް ކައްކާއިރު އޭގައި ހުންނަ ފެންފޮދު މުޅިން ހިކެންދެން ކައްކާށެވެ. މިއީ ފިލިންގް ތެތްކޮށް ހުރުން ހުއްޓުވައިދޭނެ ކަމެކެވެ.

● މި ކެއުން ފިހުނު ތަރުކާރީ، އަލުވި ، ބަތް ނުވަތަ ފްރެޝް ސަލަޑަކާ އެކު އިންސާފު ކުރެއްވިދާނެއެވެ.