ހިތްގައިމު ލަވަތަކަކާއެކު “ކަބީރު ސިންގް” ފަދަ ނުރައްކާތެރި ސިފަތަކެއް
ފިލްމު އުފެއްދުންތެރިޔާ ޔަޝް ޗޯޕްރާ 1989 ވަނަ އަހަރު ނެރުނު ލޯބީގެ ފިލްމް “ޗާންދްނީ” އަކީ ބޮލީވުޑްގައި މާރާމާރީއާއި އެކްޝަން ފިލްމުތަކުގެ ނުފޫޒު ގަދަވެފައިވާ ދުވަސްވަރެއްގައި ނެރުނު ފިލްމެކެވެ. ސްރީދޭވީ، ރިޝީ ކަޕޫރު އަދި ވިނޯދު ކަންނާ މުހިންމު ރޯލުތަކުން ފެނިގެންދިޔަ މި ފިލްމަކީ އިންޑިއާގެ ސިނަމާގެ ލޯތްބާއި، ފެޝަން އަދި މިއުޒިކަށް އިންގިލާބީ ބަދަލެއް ގެނުވި ފިލްމެކެވެ. މަރުހޫމް އެކްޓްރެސް ސްރީދޭވީ މި ފިލްމުގައި ބޭނުންކުރި ޝިފޯން ސާޅީތަކަކީ މިއަދުވެސް ބޮލީވުޑްގެ ލޯބީގެ ފިލްމުތަކުގެ ބަތަލާއިންގެ ހެދުން އެޅުމުގެ މިންގަނޑެއް ކަމުގައި ބެލެވެއެވެ. ޔަޝް ޗޯޕްރާގެ އުފަންދުވަހާ ގުޅުވައިގެން، މި ޖީލުގެ މީހެއްގެ ހައިސިއްޔަތުން އަހަރެން ފުރަތަމަ ފަހަރަށް “ޗާންދްނީ” ބަލައިލީމެވެ.
ފިލްމުގައި ސްރީދޭވީ އަދާކުރީ ޗާންދްނީގެ ރޯލެވެ. ރިޝީ ކަޕޫރަކީ ރޯހިތެވެ. އެ ދެމީހުން މާ ބޮޑަށް ލޯބިވި ނަމަވެސް، ރޯހިތަށް ދިމާވި ހިތާމަވެރި އެކްސިޑެންޓެއްގައި އޭނާ ވާގިނެތުމާ ގުޅިގެން އެ ގުޅުން ކެނޑިގެންދެއެވެ. ރޯހިތު ޗާންދްނީ އޭނާގެ ދިރިއުޅުމާ ދުރަށް ފޮނުވާލުމުން، މުމްބާއީގައި އާ ދިރިއުޅުމެއް ބިނާކުރަމުން ދަނިކޮށް ޗާންދްނީއަށް ލަލިތު (ވިނޯދު ކަންނާ) އާ ބައްދަލުވެއެވެ. ލަލިތުގެ ކައިވެނީގެ ހުށަހެޅުމަށް ޗާންދްނީ އެއްބަސްވާ ފަހުން ރޯހިތުގެ ބަލި ފަސޭހަވެ، އޭނާގެ ކުރީގެ ލޯތްބާއި މިހާރުގެ ދިރިއުޅުމާ ދެމެދު ގޮތެއް ނިންމުމަށް ޗާންދްނީއަށް މަޖުބޫރުވެއެވެ.
ރޯހިތުގެ އާދަޔާ ޚިލާފު ޝުއޫރުތައް
ފިލްމު ފެށޭ މަންޒަރުގައި ރޯހިތަށް ޗާންދްނީ ފެންނަނީ ރައްޓެއްސެއްގެ ކައިވެނީގެ ހަފުލާއަކުންނެވެ. ފެންނަ ހިނދުން ފެށިގެން އޭނާ ޗާންދްނީދެކެ ލޯބިވެއެވެ. އަދި ބައްދަލުވިތާ މަދު މިނެޓުކޮޅެއްގެ ތެރޭގައި ލޯބި ހުށަހަޅަން ނިންމައެވެ. އެންމެ ހައިރާންވާ ކަމަކީ އެއެއް ނޫނެވެ. އޭގެ ފަހުން ކަންތައް ހިނގައިދިޔަ ގޮތެވެ. އޭނާގެ އިޙުސާސްތައް ބަޔާންކުރުމަށްޓަކައި ބޮކިތައް ނިވާލައި، ޗާންދްނީގެ އަތުގައި ބާރަށް ހިފައި، ޗާންދްނީވެސް ހަމަ އެގޮތަށް އަމަލުކުރާނެ ކަމަށް އޭނާ އުއްމީދު ކުރެއެވެ.
މީގެ އިތުރުން، ޗާންދްނީ ރޯހިތަށް ފުރުސަތެއް ދޭން އުޅުމުން، އޭނާގެ ކައިވެނީގެ ހުށަހެޅުމަށް އާނބަސް ބުނުވުމަށާއި ޗާންދްނީ އޭނާގެ ގައިގައި ބާރަށް ބައްދާލުމަށް މަޖުބޫރުކުރުވުމުގެ ގޮތުން ނުރައްކާތެރިކޮށް ސައިކަލު ދުއްވައެވެ. ފިލްމު އުފެއްދި ފަރާތްތަކުން މިއީ “ލޯބިވެތި ގޮތްދޫނުކުރުމެއް” ކަމަށް ދައްކަން އުޅުނަސް، މިއަދުގެ ޒުވާން ޖީލުގެ ނަޒަރުގައި މިއީ ބަލައިގަނެވޭނެ ކަންކަމެއް ނޫނެވެ.
ވިހަގަދަ މޮޔަވުމެއް
އާދަޔާ ޚިލާފަށް ލޯބީގެ ނަމުގައި މޮޔަވެގެން އުޅޭ މަންޒަރުތައް ފެންނަ “ކަބީރު ސިންގް” އާއި “އެނިމަލް” ފަދަ ފިލްމުތައް ބަލާފައިވީ ނަމަވެސް، “ޗާންދްނީ” މިކަމުގައި އުޅެނީ މާ ކުރީގައެވެ. ޔަޝް ޗޯޕްރާ ބޮލީވުޑްގެ އުސޫލުން އަހަރެމެންނަށް ޤަބޫލުކޮށްދޭން މަސައްކަތްކުރަނީ، މީހަކު ތިމާގެ މައްޗަށް މާ ބޮޑަށް ބާރުފޯރުވައި މޮޔަވެގެން އުޅުމަކީ ހަޤީޤީ ލޯބި ކަމަށެވެ. ރޯހިތު މެދުނުކެނޑި ކުރާ ފޯނު ކޯލްތަކުން ފެށިގެން، އޭނާގެ ކޮޓަރީގެ ފާރުތަކުގައި ހުރި ޗާންދްނީގެ ފޮޓޯތަކަށް ބަލާއިރު، އެއީ ލޯބިކަން ނުވަތަ ބަލިމަޑުކަމެއް ފަދަ މޮޔަވުމެއްކަން ވަކިކުރަން އުނދަގުލެވެ. މިއީ ހަމަގައިމުވެސް ނުރައްކާތެރި ސިފައެކެވެ.
ލަވަތައް
އާނަންދު ބަކްޝީ ލިޔެ، ޝިވް-ހަރީ މިއުޒިކް ތައްޔާރުކޮށްފައިވާ މި ފިލްމުގެ ލަވަތަކަކީ ފިލްމުގެ އެންމެ ބޮޑު އެއް ކާމިޔާބީއެވެ. “ތެރޭ މޭރޭ ހޯޓޯން ޕޭ”، “މޭރޭ ހާތޯން މޭ ނައު ނައު ޗޫޅިޔާން” އަދި “ޗާންދްނީ” ފަދަ ލަވަތަކަކީ އަދިވެސް ގިނަ ބައެއްގެ ހިތްތަކުން ޖާގަ ހޯދާފައިވާ ލަވަތަކެވެ. ނަމަވެސް، “މޭ ސަސުރާލް ނެހީ ޖާއޫންގީ” މި ލަވަޔަކީ މިއަދުގެ ޒުވާނުންނަށް ބަލައިގަންނަން އުނދަގޫވާނެ ލަވަޔެކެވެ. މި ލަވައިގައި ޗާންދްނީ ނަށަނީ އޭނާގެ ކުރިމަގުގެ ފިރިމީހާގެ އާއިލާގެ ކުރިމަތީގައެވެ.
މި ލަވައިގެ ބައެއް ބަސްތަކުން ދޭހަވަނީ އަންހެނެއްގެ މުޅި ދިރިއުޅުމަކީ ހަމައެކަނި އޭނާގެ ފިރިމީހާގެ ގެކަމަށް ބުނާ ބޯދާ ޚިޔާލެވެ. މި ފިލްމު މިއަދު ނެރުނުނަމަ، އަންހެނެއްގެ މުޅި ޝަޚުސިއްޔަތު ފިރިމީހާގެ ގެޔަށް ބަދަލުވާންވީ ކީއްވެގެންތޯ ޒުވާނުން ސުވާލު އުފައްދާނެއެވެ. ލަވައިގެ ބައެއް ތަންތަނުގައި ބުނަނީ އޭނާ އެނބުރި މަންމަގެ ގެޔަށް ނުދާނެ ކަމަށާއި، ފިރިމީހާގެ ޚިދުމަތުގައި ދެމިހުންނާނެ ކަމަށެވެ.
ބަސްމަގު
ދެމަފިރިން ނުވަތަ ލޯބިވެރިން އެކަކު އަނެކަކާ ވާހަކަދައްކާ ގޮތަށްވެސް މިހާރު ވަނީ ބޮޑެތި ބަދަލުތަކެއް އައިސްފައެވެ. ރޯހިތާއި ޗާންދްނީ ވާހަކަދައްކާ ގޮތް މިއަދުގެ ޒުވާނަކަށް ފެނިއްޖެނަމަ އޭނާ ހައިރާންވާނެއެވެ. އެކަކު އަނެކަކަށް ދޭ ބައެއް ކުދިކުދި އަދި ބޭއަދަބީ ބަސްތަކަކީ މިއަދުގެ މުޖުތަމައުގައި ބަލައިގަނެވޭނެ ކަންކަމެއް ނޫނެވެ. މީގެ އިތުރުން، ރޯހިތު އަބަދުވެސް ޖިސްމާނީ ގުޅުމަކަށް ބާރުއަޅާ އެޅުމަކީވެސް އުނދަގޫވާ ކަމެކެވެ. ފިލްމުގައި ޖިސްމާނީ ގާތްކަމަކީ ލޯބީގެ ޤުދުރަތީ ބައެއްގެ ގޮތުގައި ތަކުރާރުކޮށް ދައްކުވައިދެއެވެ.
މި ހުރިހާ ކަމަކާއެކުވެސް، ޔަޝް ޗޯޕްރާގެ “ޗާންދްނީ” އަކީ ބާވެފައިވާ ފިލްމެއްގެ ގޮތުގައި އިޙުސާސް ކުރެވުނަސް، އެ ފިލްމުގެ ނުފޫޒު މިހާ ގަދަވީ ކީއްވެގެންކަން ދެނެގަނެވުނެވެ. ސްވިޒަލޭންޑުގެ ރީތި މަންޒަރުތަކާއި، މާތަކާއި، ޝިފޯން ސާޅީތަކާއި، ފުރިހަމަ ގެތަކާއި އަދި އަސަރުގަދަ މިއުޒިކުގެ ސަބަބުން އަހަރެންވެސް އެ ޚިޔާލީ ދުނިޔެއަށް ގެނބިގެންދިޔައެވެ.
