ހދ. މަކުނުދޫ ކައުންސިލުން އިންތިޒާމުކޮށްގެން އެ ރަށުގެ މުއައްސަސާތަކަށް އަމާޒުކޮށް ބޭއްވި ފުރަތަމަ ސްޓޭޖް ޑްރާމާ މުބާރާތުގެ ފަޚުރުވެރި އެއްވަނަ މަކުނުދޫ ސިއްހީ މަރުކަޒުގެ ޓީމުން ހޯދައިފިއެވެ.
މަކުނުދޫ ކައުންސިލުން އިސްނަގައިގެން ބޭއްވި މި މުބާރާތަކީ ރަށުގެ މުއައްސަސާތަކުގެ މެދުގައި ގުޅުން ބަދަހިކޮށް، އެކުވެރިކަން އާލާކުރުމުގެ އިތުރުން މުވައްޒަފުންގެ ފަންނީ އަދި ތަމްސީލީ ހުނަރުވެރިކަން ދައްކައިލުމަށް ފުރުސަތު ފަހިކޮށްދިނުމުގެ މަގުސަދުގައި ކުރިއަށްގެންދިޔަ މުބާރާތެކެވެ. މިއީ ރާއްޖޭގެ އެހެން އެއްވެސް ކައުންސިލަކުން މިހާތަނަށް މިފަދަ ގޮތަކަށް ސްޓޭޖް ޑްރާމާ މުބާރާތެއް ބޭއްވިކަން އެނގިފައިނުވާ، ތާރީޚީ އަދި ތަފާތު ހަރަކާތެކެވެ.
“މުއައްސަސާތަކުގެ ޑްރާމާ މުބާރާތް 2026″ގެ ނަމުގައި ކުރިއަށް ގެންދިޔަ މި މުބާރާތުގައި މަކުނުދޫގެ ތިން މުއައްސަސާއަކުން ބައިވެރިވިއެވެ. އެއީ އެއްވަނަ ހޯދި މަކުނުދޫ ސިއްހީ މަރުކަޒުގެ އިތުރުން މަކުނުދޫ ކައުންސިލް އަދި މަކުނުދޫ ސްކޫލުގެ ޓީމެވެ.
މި މުބާރާތުގައި މަކުނުދޫ ސިއްހީ މަރުކަޒުން ހުށަހަޅައިދިނީ “އުފާވެރި ހަޔާތަކަށްޓަކައި” މި ނަމުގައި ތައްޔާރުކުރި ޑްރާމާއެކެވެ. މި ޑްރާމާއަކީ އިބްރަތްތެރި މެސެޖުތަކާއި، މަޖާ ހާދިސާތަކުގެ އިތުރުން މުޖުތަމައަށް ބޭނުންތެރި ސީރިއަސް މެސެޖުތަކެއް ހިމަނައިގެން ވަރަށް ފުރިހަމައަށް ގެނެސްދިން ހުށަހެޅުމެކެވެ.
“މުއައްސަސާތަކުގެ ޑްރާމާ މުބާރާތް 2026″ގެ އެއްވަނަ ހޯދި މަކުނުދޫ ސިއްހީ މަރުކަޒު ޓީމު – މަކުނުދޫ ކައުންސިލް އިދާރާ ފޭސްބްކް
ހުނަރުން ފުރިގެންވާ 20 ބައިވެރިން ހިމެނުނު ސިއްހީ މަރުކަޒުގެ މި ޑްރާމާގެ އޯޑިއޯ މިކްސިން އަދި އެޑިޓިންގެ މަސައްކަތްތައް ފަންނީ ގޮތުން ފުރިހަމަކޮށްދީފައިވަނީ “މުނިއަވަސް އޮންލައިން” އިންނެވެ.
މުބާރާތުގައި ވާދަކުރި ހުރިހާ ޓީމަކުން ވެސް ފާހަގަކޮށްލެވޭ ފަދަ މޮޅު ހުނަރުތަކެއް ދައްކާފައިވާއިރު، މި މުބާރާތަކީ ރަށުގެ ރައްޔިތުންނާއި މުއައްސަސާތަކުގެ ބޮޑު ތަރުހީބެއް ލިބިގެންދިޔަ ކާމިޔާބު ހަރަކާތެކެވެ.
މުބާރާތުގެ ވަކިވަކި ވަނަތަކަށް ބަލާއިރު:
އެންމެ މޮޅު ސަޕޯޓިން އެކްޓަރު ފިރިހެން: މުޙައްމަދު ނަސީރު – މަކުނުދޫ ސިއްހީ މަރުކަޒު
އެންމެ މޮޅު ސަޕޯޓިން އެކްޓަރު އަންހެން: އާމިނަތު ރާޔާ – މަކުނުދޫ ސިއްހީ މަރުކަޒު
އެންމެ މޮޅު ޑައިރެކްޓަރުން: ޚަދީޖަތު ސަނާ އަދި ތަސްލީމާ ޢަބްދުލްޣަނީ – މަކުނުދޫ ސިއްހީ މަރުކަޒު
އެންމެ މޮޅު އެކްޓަރު ފިރިހެން: ޠާހާ ޒުބައިރު – މަކުނުދޫ ސްކޫލް
އެންމެ މޮޅު އެކްޓަރު އަންހެން: ޢާއިޝަތު މީރާ – މަކުނުދޫ ކައުންސިލް
އެންމެ މޮޅު ސްކްރިޕްޓް ލިޔުންތެރިޔާ: ޒަމީރު ޢަބްދުލްކަރީމް – މަކުނުދޫ ސްކޫލް ޑްރާމާ
