މަޝްހޫރު ފިލްމީ ތަރިން ކަމަށްވާ ކީރްތީ ސުރޭޝް އަދި ރާދިކާ އަޕްޓޭ ލީޑް ރޯލުން ފެނިގެންދާ، ގިނަ ބަޔަކު އިންތިޒާރުކުރަމުން އަންނަ ރިވެންޖް ތުރިލާ ސީރީޒް “އައްކާ” ނެޓްފްލިކްސް މެދުވެރިކޮށް ރިލީޒްކުރާ ތާރީޚު އިޢުލާނުކޮށްފިއެވެ. މި ސީރީޒް ޕްރީމިއާ ކުރުމަށް ހަމަޖެހިފައިވަނީ އަންނަ އޮކްޓޯބަރު މަހުގެ 30 ވަނަ ދުވަހުއެވެ.
ބޮލީވުޑް ހަންގާމާއިން ރިޕޯޓްކޮށްފައިވާ ގޮތުގައި، މި ސީރީޒް ބިނާކޮށްފައިވަނީ 1980 ގެ އަހަރުތަކުގެ ތެރޭގައި ދެކުނު އިންޑިއާގެ ޚިޔާލީ ސިޓީއެއްގައި އަންހެނުން އިސްވެ ހިންގާ މުޖުތަމައެއްގެ މައްޗަށެވެ. ވާހަކަ ކުރިއަށްދަނީ އެ ސަރަހައްދު ކޮންޓްރޯލްކުރާ ދެ ގޭންގްސްޓާރުން ކަމަށްވާ ދެ އަންހެނުންގެ ވެރިކަމަށް، ބޭރުން އަންނަ ނުރައްކާތެރި މީހެއްގެ ފަރާތުން ކުރިމަތިވާ ނުފެންނަ ގޮންޖެހުންތަކާއި ކުރިމަތިލުންތަކުގެ މައްޗަށެވެ. މިއީ ބާރާއި ނުފޫޒު ދެއްކުމުގެ ވަރުގަދަ ކުރިމަތިލުންތަކެއް ފެނިގެންދާނެ ސީރީޒެކެވެ.
މިއީ ކީރްތީ ސުރޭޝް ސްޓްރީމިން ޕްލެޓްފޯމަކުން ފެންނާނެ ފުރަތަމަ ފަހަރެވެ. މި ސީރީޒްގައި އޭނާ ފެނިގެންދާނީ ރާދިކާ އަޕްޓޭއާ ދެކޮޅަށް ކުރިމަތިލާ ވަރުގަދަ ރޯލަކުންނެވެ. އަލަށް ޑައިރެކްޝަނަށް ނުކުތް ދަރުމަރާޖް ޝެޓީ ޑައިރެކްޓްކޮށްފައިވާ މި ސީރީޒްގައި މަޝްހޫރު ބަތަލާ ތަންވީ އަޒްމީވެސް މުހިންމު ރޯލަކުން ފެނިގެންދާނެއެވެ.
މި ސީރީޒަކީ އަދިތުޔަ ޗޯޕްރާގެ ޔަޝް ރާޖް އެންޓަޓެއިންމަންޓުން މިހާތަނަށް ސްޓްރީމިން ޕްލެޓްފޯމަކަށް އުފައްދާ އެންމެ ބޮޑު ޕްރޮޖެކްޓެވެ. ގާތްގަނޑަކަށް ތިން އަހަރުގެ މަސައްކަތަށްފަހު ނިންމާލި މި ސީރީޒްގެ ޕްރޮޑަކްޝަން މަސައްކަތް ފަށާފައިވަނީ 2023 ވަނަ އަހަރުގެ ނޮވެމްބަރު މަހުގައެވެ.
“އައްކާ” އަކީ ޔަޝް ރާޖް އެންޓަޓެއިންމަންޓާއި ނެޓްފްލިކްސް ގުޅިގެން ގެނެސްދޭ ތިންވަނަ ވެބް ސީރީޒެވެ. މީގެ ކުރިން މި ދެ ކުންފުނި ގުޅިގެން ވަނީ އާރް މާދަވަން އާއި ކޭ ކޭ މެނަން ހިމެނޭ “ދަ ރޭލްވޭ މެން” އަދި ވާނީ ކަޕޫރާއި ސުރްވީން ޗައުލާގެ “މަންޑާލާ މާޑާސް” ގެނެސްދީފައެވެ. މީގެ އިތުރުން، 2023 ވަނަ އަހަރު އުއްތަރަކަންޑުގެ ޓަނަލް ރެސްކިއު އޮޕަރޭޝަނަށް ބިނާކޮށް އުފައްދާ “ޓަނަލް މެން” އާއެކު މި ޕާޓްނާޝިޕް އިތުރަށް ފުޅާކުރުމަށް ވަނީ ހަމަޖެހިފައެވެ.
މި ސީރީޒްގެ އިތުރުންވެސް، ކީރްތީ ސުރޭޝް އޮކްޓޯބަރު 16 ގައި ރިލީޒްކުރާ “ރަފްތާރު” އިން ފެންނާނެއިރު، ރާދިކާ އަޕްޓޭ އެންމެ ފަހުން ފެނިގެން ގޮސްފައިވަނީ “ލަސްޓް ސްޓޯރީޒް 3” އިންނެވެ.
