ދުބާއީން އިސްރާއީލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓެއްގެ ކޮކްޕިޓް ތެރޭގައި ދެ ޕައިލެޓުންގެ ދެމެދުގައި ހިނގި ނުރައްކާތެރި މާރާމާރީއަކާ ގުޅިގެން، އެ ފްލައިޓް ކުއްލި ހާލަތުގައި ސައުދީ އަރަބިއްޔާގެ ތަބޫކް އެއާޕޯޓަށް ޖައްސައިފިއެވެ.
މި ހާދިސާ ހިނގުމާއެކު ބޯޓުން ކުއްލި ހާލަތުގެ ސިގްނަލް ފޮނުވާފައިވާއިރު، މިއީ ފްލައިޓް ހައިޖެކް ކުރުމުގެ އަމަލެއް ނޫން ކަމަށް އިސްރާއީލުގެ ބޮޑުވަޒީރުގެ އޮފީހުން ވަނީ ކަށަވަރުކޮށްދީފައެވެ. އަދި ބޯޓުގެ ހާލަތު މިހާރު ކޮންޓްރޯލް ކުރެވިފައިވާ ކަމަށާއި، ބޯޓުގައި ތިބި މީހުން އަނބުރާ ގެންދިއުމުގެ މަސައްކަތް ކުރަމުންދާ ކަމަށް ވެސް އެ އޮފީހުން ބުނެފައިވެއެވެ.
ބޯޓުން ދަތުރުކުރި ފަސިންޖަރުން މީޑިއާތަކަށް މައުލޫމާތު ދެމުން ބުނެފައިވަނީ، ދަތުރުގެ ވަކި ހިސާބަކުން ކޮކްޕިޓް ތެރެއިން ހަޅޭކުގެ އަޑު އިވެން ފެށި ކަމަށެވެ. އަދި ކޮކްޕިޓްގެ ދޮރު ހުޅުވުނު ވަގުތު އެތެރޭގައި ލޭ ހުރިތަން ފެނުނު ކަމަށާއި، ކުޑަ ވަޅިއަކުން އެއް ޕައިލެޓަށް ހަމަލާދީ ޒަޚަމްކޮށްލާފައިވާ ކަމަށެވެ. އެ ވަގުތު ބޯޓުގެ ކޮންޓްރޯލް ގެއްލި، ބޯޓު ތިރިއަށް ޑައިވްވާން ފެށުމުން ފަސިންޖަރުންގެ މެދުގައި ބޮޑު ބިރުވެރިކަމެއް އުފެދި، ފުރާނަ ސަލާމަތް ނުވާނެ ކަމަށް ހީވި ކަމަށްވެސް ދަތުރުވެރިން ކިޔައިދީފައިވެއެވެ.
ހަމަލާދިން ފަރާތް ކޮންޓްރޯލް ކުރުމުގައި ބޯޓުގެ ކްރޫއިންނާއި ބައެއް ފަސިންޖަރުން ހަރަކާތްތެރިވެފައިވެއެވެ.
މި ހާދިސާއާ ގުޅިގެން އިސްރާއީލުގެ އިސް އޮފިޝަލަކު ވިދާޅުވީ މިއީ ވަރަށް ނުރައްކާތެރި ބޮޑު ކާރިސާއަކުން ސަލާމަތްވުން ކަމަށެވެ. އަދި ކޯ-ޕައިލެޓް ބޯޓުގެ ކޮންޓްރޯލް އަތުލައި ބޯޓު ވައްޓާލަން އުޅުނު ކަމަށް ބެލެވޭތީ، އޭނާގެ މައްސަލަ މިހާރު ތަހުގީގު ކުރަމުންދާ ކަމަށްވެސް ރިޕޯޓުތައް ބުނެއެވެ.
