“ދަރިފުޅާ. މަންމަ ބޭނުންވަނީ ދަރިފުޅު އުފަލުގައި ހުންނަން. އެ ރާގު އިވިގެން ދަރިފުޅަށް ޕެނިކް އެޓޭކް އައި ދުވަހު މަންމައަށް ވީގޮތް ބައްޕައަށް ފެނުނު. އަދި ދަރިފުޅަށް އެނގެއެއްނު މަންމައަށް ކޮންމެ ކަމެއްވެސް ވާނީ އާދައިގައި ވާވަރަށްވުރެ ބޮޑަށްކަން. މާބޮޑަށް އުފާވުން، މާބޮޑަށް ރުޅިއައުން، ނޫނީ މާބޮޑަށް ރޮވުން. މަންމަ ދަރިފުޅުދެކެ އެހާ ލޯބިވާތީ އެ ގެލެރީގައި އުޅޭ ކުއްޖާދެކެ ރުޅިއަންނަނީ.” ނަސީރު ވަރަށް ލޯބިން ޒޯޔާއަށް ވިސްނައިދޭން މަސައްކަތްކުރިއެވެ.
“ނޫން ބައްޕާ. މަންމަ އެހެންވެއެއް ނޫން އޭނަދެކެ ރުޅިއަންނަނީ. އޭގެ އެހެން ސަބަބެއް އެބައޮތް. މަންމައަށް މިއަދު ބުނެވުނު އެހެން.” ޒޯޔާ އެހެން ބުނެލުމާއެކު ނަސީރަށް ކުއްލިއަކަށް ޒޯޔާއަށް ބަލައިލެވުނެވެ.
“މަންމަ ކީކޭ ބުނީ؟” ނަސީރު އެހިއެވެ.
“އަޅާނުލާ. މަންމަވެސް ސާފުކޮށް އޮޅުންފިލުވައެއް ނުދިން. ބައްޕަވެސް އަހަންނަކަށް އެކަމެއް ރަނގަޅަށް އޮޅުންފިލުވައެއް ނުދޭނެ. އެހެންވީމަ އެވާހަކަ ދެއްކުމުގެ ބޭނުމެއް ނެތް. އަހަރެން އަމިއްލައަށް އެކަން ހޯދަފާނަން.” ޒޯޔާ މަޑުން ބުނި ނަމަވެސް އޭނާގެ އަޑުގައި ހިތްހަމަނުޖެހުން ވިއެވެ. އޭނާގެ އާއިލާ އޭނާގެ އަމިއްލަ ދިރިއުޅުމާ ގުޅޭގޮތުން އޭނާއަށް ކަންކަން ސިއްރުކުރާތީއެވެ.
“އެންމެ ރަނގަޅު. ތި ރުޅިގަނޑު އެއްފަރާތްކޮށްފައި ކާން ހިނގާ. ނޫނީ ގޭސް ވެދާނެ.” ނަސީރު ޒޯޔާގެ ބޮލުގައި ފިރުމާލިއެވެ. ޒޯޔާ ފުރަތަމަ ނުދާންވެގެން އުޅުނެވެ. ނަމަވެސް ނަސީރު ކުރުނުކޮށް ކިޔަން ފެށުމުން ދާން އެއްބަސްވިއެވެ.
ޒޯޔާ ފާޚާނާއަށް ވަދެލާފައި ދާނަން ކަމަށް ބުނުމުން ނަސީރު ދެން ގޮސް ވަނީ އޭނާގެ ކޮޓަރިއަށެވެ.
އާފިޔާ އިނީ އެނދުގައި އިށީނދެލައިގެން ދެ އަތުން ބާރަށް ގޮދަޑީގައި ހިފަހައްޓައިގެންނެވެ. އޭނާގެ އަތަށް ބާރުވަމުންދާ ގޮތުންނާއި އޭނާގެ ނޭވާ އަވަސްވެފައިވާ ގޮތާއި ބާރުމިނުން އަދިވެސް އޭނާގެ ރުޅި މައިތިރިނުވާކަން ހާމަވެއެވެ. ކޮޓަރިއަށް ވަން ނަސީރު ފެނުމާއެކު އާފިޔާ ފުންމައިގެން ތެދުވިއެވެ.
“ޒޯޔާ ކީކޭ ހިތަށް އަރައިގެންތަ އެ އުޅެނީ؟ އަހަރެން އޭނާ ކައިރިން މާފަށް އެދޭށޯ! އަހަރެން ކީއްކުރަން އޭނަ ކިބައިން މާފަށް އެދެންވީ؟ އަހަރެން ދުވަހަކުވެސް އެ ފިރިހެންކުއްޖާ ކިބައިން މާފަކަށް ނޭދޭނަން. އަހަރެން ގަސްތުގައި އެ ގިޓާ ހަލާކެއް ނުކުރަން. އަހަރެން ބޭނުންވީ ވީހާވެސް އަވަހަކަށް އެ ރާގު ހުއްޓުވަން. އަހަރެން ދޮރު ހުޅުވާލި ވަގުތު އޭނަ ގައިގައި ޖެހިފައި ގިޓާ ވެއްޓި ހަލާކުވީ. އެއީ ވީގޮތަކީ.” އާފިޔާ ފައްޗަކަށް އަމުނާލިއެވެ.
“އެންމެ ރަނގަޅު އާފިޔާ. ކުޑަމިނުން ކަލޭ ކަލޭގެ ކުށް ޤަބޫލުކޮށްފީމެއްނު.” އާފިޔާ ނަސީރާ ދިމާލަށް ލޯ އަޅާލިއެވެ.
“އަމިއްލަ ދަރިފުޅުގެ އުފަލަށް އެދުމަކީ ކުށަކަށްވާނަމަ، އަހަރެން އެ ކުށް ކޮށްފިން.” އާފިޔާ ހަށަން ބަނދެލަމުން ބުނެލިއެވެ.
“އަހަންނަށް ވިސްނެޔޭ ކަލޭ ތި އިޙުސާސްކުރާ ކަންތައްތައް. އަދި ކަލޭގެ ވިސްނުމުގައި ކަލޭ ތިހިރީ ރަނގަޅަށް ކަމަށްވެސް ވެދާނެ. އެކަމަކު އަހަރެން ކަލޭގެ ސަމާލުކަމަށް ކަމެއް ގެންނަން ބޭނުން. މީ އިންޒާރެއް ކަމަށް ބަލާ. ބަލާބަލަ އާފިޔާ ކަންތައް މިވާގޮތް. ކަލެއާއި ޒޯޔާ ތި ޒުވާބު ކުރަނީ އަޔާންއާ ހެދި. އަދި އެކަނި އެވަރަކުން ނުނިމޭ، ޒޯޔާ އެހުރީ އަޔާންގެ ދިފާއުގައި ކަލެއާ ދެކޮޅަށް ނުކުމެ. ޒޯޔާއަށް ހީވަނީ އަޔާންއަކީ ރަނގަޅު މީހާ ކަމަށް، އަދި ކަލޭ ގޯސްކަމަށް. ކަލޭގެ ތި ގޮތްދޫނުކުރުމުގެ ސަބަބުން ޒޯޔާއާއި އަޔާންގެ ދުރުކަން ނެތި، ކަލޭ ބޭނުންވާ ގޮތާ އިދިކޮޅަށް ކަންތައް ވެދާނެ. ވިސްނިއްޖެތަ މިބުނާ ވާހަކަ؟” ނަސީރުގެ ހިތުގައި ޒޯޔާއާއި އަޔާން ދުރުކުރަން ނެތްނަމަވެސް އޭނާ ވާހަކަދެއްކީ އާފިޔާ މިހާރު އެ ކުރާ ކަންތައްތައް ހުއްޓުވޭނެ ހަމައެކަނި ގޮތަކީ އެގޮތަށް ވާހަކަދެއްކުންކަން އެނގޭތީއެވެ.
“އެހެންވީމަ އަހަރެން މި ބުނަނީ ރުޅި މަޑުކޮށްފައި ޒޯޔާއާ ސުއްޙަވާށޭ. ތިކަހަލަ އޭނަގެ ހިތުގައި ސުވާލު އުފެދޭ ކަހަލަ ކަންތައްތައް ނުކުރާށޭ. ނޫނީ އެންމެ ފަހުން އަހަރެމެންނަށް އޭނަ ގެއްލޭނީ.” ނަސީރު އެންމެ ފަހުން ބުނެލީ އާފިޔާއަށް ކެތްކުރެވޭނެ ވާހަކައެއް ނޫނެވެ. ޒޯޔާ އޭނާގެ ލޯމަތިން ގެއްލޭނެ ކަމެއް ވާކަށް އޭނާ ނުކުރާނެއެވެ. ޚާއްސަކޮށް އަޔާންގެ ގާތަށް ޒޯޔާ ގޮސްފާނެ ފަދަ ކަމެކެވެ.
“ހޫނ. ކޮންމެގޮތެއް ވިޔަސް އަހަންނަކަށް ޒޯޔާދެކެ ރުޅިއައިސްފައެއް މާ ގިނައިރަކު ނުހުރެވޭނެ.” އާފިޔާ ރުޅިގަނޑު މުޅިން މައިތިރި ނުވި ނަމަވެސް އޭނާ ރުޅިގަނޑު ބޭރަށް ނުފެންނަވަރު ކުރެވޭތޯ އިރުކޮޅެއް ވަންދެން ފުންކޮށް ނޭވާލިއެވެ.
“އެހެންވިއްޔާ އަވަހަށް ގޮސް އެންމެން އެކުގައި ކާން ހިނގާ. މިހާރު ގޮހޮރު ވަޔާ ތަޅަން ފަށައިފި.” ނަސީރު އެހެން ބުނެލަމުން އާފިޔާގެ ކޮނޑަށް އަތް ވައްޓާލައިގެން ކޮޓަރިން ނުކުތެވެ.
ކެއުމުގެ ވަގުތުގައި އާފިޔާއާ ޒޯޔާގެ ދެމެދުގައި އޮތް ހިތްހަމަނުޖެހުން އެއްފަރާތްކޮށްލިއެވެ. ހަމައެކަނި ލޯތަކަށެވެ. ޒޯޔާގެ ހިތުގައި އޮތް ހިތްހަމަނުޖެހުން މުޅިން ފިލައިގެން ނުދިޔައިރު އޭނާ އަދިވެސް ދެކޭގޮތުގައި އާފިޔާ އަޔާން ކިބައިން މާފަށް އެދެން ޖެހޭނެއެވެ. ހަމައެއާއެކު އޭނާގެ ސިކުނޑީގައި ކޮންމެވެސް ކަމެއް ރޭވެމުން ދިޔައެވެ.
*********
އެދުވަހު އަޔާންއަށް ގެލެރީގައި އެއްވެސް މަސައްކަތެއް ރަނގަޅަކަށް ނުކުރެވުނެވެ. އެއީ ހަމައެކަނި ގިޓާ ހަލާކުވުމުގެ ސަބަބުން ވީ ދެރައަކުން ނޫނެވެ. ދޮރުން އޭނާގެ އަތުގައި ޖެހުނުލެއް ބާރުކަމުން އެ އަތުގައިވެސް ރިއްސާތީއެވެ. ޖެހުނު ގޮތުން މަސްގަނޑަށް މާބޮޑަށް ތަދުވީހެން ހީވެއެވެ. އެހެންކަމުން ގެލެރީގައި ތަޅު އެޅުވުމަށްފަހު ނަތާޝާއާ ދެމީހުން ގެއަށް ދިޔައެވެ.
އަޔާން ގެއަށް ދިޔައިރު އޭނާގެ ކުލަ އޮއްސިފައިވާ މޫނު ފެނުމާއެކުވެސް އަފްޒާއަށް ކަމެއް ގޯސްވެއްޖެކަން އެނގުނެވެ. ނަމަވެސް އޭނާ އެއްވެސް ސުވާލެއް ކުރުމުގެ ކުރިން އަޔާން އޭނާ ހުއްޓުވުމަށްފަހު ފަހުންނޭ ބުނެ ގޮސް ކޮޓަރިއަށް ވަދެ ތަޅުލިއެވެ. އަފްޒާ ބަލައިލީ ނަތާޝާއަށެވެ. ނަތާޝާ އަފްޒާއަށް ވީގޮތް ކިޔައިދިނެވެ. އަފްޒާއަށް އަތް މުށްކަވާލެވުނީ އާފިޔާދެކެ އައި ރުޅިއަކުންނެވެ.
އަފްޒާ އިރުކޮޅެއް ފަހުން ގޮސް ދޮރުގައި ޖަހާލާފައި އަޔާންއަށް ގޮވިއެވެ. އަނގައަކުން ނުބުންޏެވެ. އަފްޒާ ތަންކޮޅެއް ބާރަށް ދޮރުގައި ޖަހާލިއެވެ. ދެތިން ފަހަރަކު ޖަހާލުމުން އަޔާން ދޮރު ހުޅުވީ ކުޑަކޮށް ހިތްހަމަނުޖެހިފައި ހުރެއެވެ.
“ފަހުންނޭ ބުނީމަވެސް..”
“ފަހުންނޭ ބުންޏަކަސް ހުރިހާ ކަމެއް ރަނގަޅެއް ނުވާނެ. އަން. ތިތާ މި ބޭސް އުނގުޅާލައިގެން އޮވޭ. ނޫނީ ފަހުން މާބޮޑަށް ތަދުވެދާނެ.” އަޔާންގެ ވާހަކަ މެދުކަނޑާލަމުން އަފްޒާ ބުނެލިއެވެ.
“ނަތާ މިހާރު ހުރިހާ ވާހަކައެއް ބުނީ ދޯ.” ބޯހޫރާލަމުން އަޔާން އަފްޒާ ދިން ބޭސް ފުޅީގައި ހިފިއެވެ.
“ކޮން ހުރިހާ ވާހަކައެއް؟ އެހެން ކަމެއްވެސް ވީތަ؟ ނަތާ ބުނި އަތަށް ތަދުވެގެން މަސައްކަތް ނުކުރެވިގެން އައީއޭ.” އަފްޒާ ގަސްތުގައި ދޮގުހެދިއެވެ.
“އުހުނ. އިތުރު ކަމެއް ނުވޭ.” އަޔާން އެހެން ބުނެލާފައި ހިނިތުންވެލިއެވެ. އަފްޒާވެސް ހިނިތުންވެލާފައި ދިޔައެވެ.
“ދޮގެއްވެސް ހަދާކަށް ނޭނގެ. އެކަމަކު ހަދަންވެސް ވޭ.” އަޔާންއަށް ނީވޭވަރަށް މަޑުމަޑުން އަފްޒާ ބުނެލީ ހީނފައި ހުރެއެވެ.
**********
ރޭގަނޑުގެ ވަގުތެވެ. ފައިސަލްއާއެކު ޒޯޔާ ކާރުގައި ދިޔައީ ފިހާރައަކަށެވެ.
“އަހަރެމެން މިއުޅެނީ މިއުޒިކް އިންސްޓްރޫމެންޓް ފިހާރައެއް ހޯދަން. ސަބަބަކީ އަހަރެންގެ ރަހުމަތްތެރިޔާ މީހަކަށް ގިޓައެއް ހަދިޔާކުރަން ބޭނުންވާތީ. އަދި އޭނަގެ ސިކުނޑިއަށް އައި އެންމެ މޮޅު ޚިޔާލަކީ ނިއުރޯސާޖަންއަކު ޑްރައިވަރަކަށް ހަދައިގެން ގޮވައިގެން އައުން. އެވެސް ގިޓާ ގަންނަން އެހީ ހޯދަން.” ފައިސަލް ބުންޏެވެ.
“ފައިސަލް…” ޒޯޔާ ރާގުލާފައި ގޮވާލިއެވެ.
“މަޑުކުރޭ. އަދި އަހަރެންގެ ވާހަކަ ނުނިމޭ. މިބުނާ ނިއުރޯސާޖަންއަކީ މިއަދާ ހަމައަށް ގިޓައެއްގައި އަތްލި މީހެއްވެސް ނޫން. މިބުނީ ގިޓައެއް ކުޅުނު މީހެއް ނޫނޭ. އެހެންވީމަ ގިޓައެއް އިޚްތިޔާރުކުރަން އަހަންނަށްވުރެ ވަކިން މޮޅު މީހަކު ހުންނާނެތަ؟ ދޯ؟” ފައިސަލް ޒޯޔާއަށް ދޯ ދިނެވެ.
“އޭތް މަޑުކުރޭ. އެހެރީ އޭގެ ފިހާރައެއް.” ޒޯޔާ ކުއްލިއަކަށް ބުންޏެވެ.
ކާރު ޕާކުކޮށްލާފައި ފައިސަލް ޒޯޔާއާއެކު ގޮސް އެ ފިހާރައަށް ވަނެވެ. އެތާނގައި ތަފާތު ވައްތަރުގެ މިއުޒިކް ކުޅޭ ސާމާނުތައް ހުއްޓެވެ. ޒޯޔާ ވަށައިގެން ބަލައިލިއެވެ.
“ފައިސަލް. އަހަތެން ބޭނުމީ މި ގަންނަ ގިޓާ އެ ރަތް ޓީޝާޓަށް ހަދިޔާކުރަން.”
ޒޯޔާގެ ޖުމްލައިން ފައިސަލްގެ ތުންފަތްމަތީގައިވާ ހިނިތުންވުން ފިލައި ހައިރާންކަމަށް ބަދަލުވިއެވެ. ޒޯޔާ އޭނައާ ބެހޭގޮތުން ދައްކާފައިވާ ވާހަކަތައް ފައިސަލްގެ ހަނދާނުގައި ވަރަށް ރަނގަޅަށް އެބަހުއްޓެވެ.
“ރަތް ޓީޝާޓަށް؟ އެ ކީއްކުރަން؟ ކޮޓަރީގައި ބަންދުކުރީމަތަ ނޫނީ ފުރާޅުމައްޗަށް އެކަނި ދޫކޮށްލީމަތަ؟” ފައިސަލް އެހިއެވެ.
ޒޯޔާގެ ބައެއް ކަންތައްތަކަކީ އޭނައަށް އަރަތެކެވެ. އެ ރަތް ޓީޝާޓުލީ މީހާއަށް ވަރަށް ނަފުރަތުކުރާ ކަމަށް ޒޯޔާގެ ވާހަކަތަކުން ހާމަވެއެވެ. އެންމެ ދުވަހަކުން އޭނާގެ ހިތް މަޑު ކަފަކޮޅަކަށް ވުމަކީ ވާނެ ކަމެއް ނޫނެވެ. އަނެއްކޮޅުން އެ ރަތް ޓީޝާޓާއި ބެހޭގޮތުން ޒޯޔާ ބުނި އެހެން ވާހަކައެއްވެސް އޭނާ ހަނދާން އެބަހުއްޓެވެ. އެއީ އޭނަޔާ ކުރާ ޒުވާބުތަކުންވެސް ގާތްކަމެއް އިޙުސާސްކުރެވޭ ވާހަކައެވެ.
“ނޫން. އަހަންނާއި މަންމަގެ ސަބަބުން އޭނަގެ ގިޓާ ހަލާކުވީ. އެހެންވެ އަހަރެން ނިންމީ އޭނައަށް ހަމަ އެކަހަލަ ގިޓައެއް ހަދިޔާކުރަން.” ޒޯޔާ ކިޔައިދިނެވެ.
“އާނ. ޒޯޔާގެ ސަބަބުން ހަލާކުވީމަ ހަދިޔާކުރަން ޖެހޭނެ.” ފައިސަލްވެސް އެކަމަށް ތާއީދުކުރިއެވެ.
ޒޯޔާ ފިހާރައިގައި ހުރި ގިޓާތަކަށް ބަލަމުން ދަނިކޮށް އޭނައަށް އަޔާން ގެންގުޅުނު ގިޓައާ އެއްވެސް ތަފާތެއް ނެތް ގިޓައެއް ފެނުނެވެ. އޭނާގެ މޫނުމައްޗަށް ހިނިތުންވުމެއް ވެރިވިއެވެ.
“ތި ހިނިތުންވުމުން އެބަ އެނގޭ ބޭނުންވާ ކަހަލަ ގިޓައެއް ފެނިއްޖެކަން. ދޯ؟” ފައިސަލް ބުނެލިއެވެ.
ޒޯޔާ “އާނއެކޭ” ބުނުމަށްފަހު ގޮސް އެ ގިޓާ ކައިރީ މަޑުކޮށްލިއެވެ. އަދި އެ ގިޓާ ބަންދުކޮށްލަދިނުމަށް އެދުނެވެ.
ގިޓާ ހިފައިގެން ޒޯޔާ އާއި ފައިސަލް ދިޔައީ ޒޯޔާގެ ކެފޭއަށެވެ. އޭނާ އަޔާންގެ ގެލެރީއަށް ބަލައިލިއެވެ. ނަމަވެސް އެތަން ހުރީ ބަންދުކޮށްފައެވެ.
“ފައިސަލް. ގިޓާ ގަނެވިއްޖެ. އެކަމަކު ތި އޭނައަށް ދޭން ކިހިނެއް ހަދާނީ؟ ގެލެރީވެސް އެހެރީ ބަންދުކޮށްފައި.” ޒޯޔާ ބުނެލިއެވެ.
“ހަމަ މިރޭ ދޭންތަ؟” ފައިސަލް އެހިއެވެ.
“އަވަހަށް ދެވުނިއްޔާ އަހަރެންގެ ހިތަށް ހަމަޖެހުމެއް ލިބޭނީ.” ޒޯޔާ ބުންޏެވެ.
“އެހެންވީމަ އެބައޮތް ގޮތެއް. އެގެއަށް ދާންވީނު.” ފައިސަލް ބުންޏެވެ.
“އެގެއަށޭ! އެކަމަކު އަހަންނަކަށް ނޭނގެ އެ ގެއެއްވެސް.”
“މިޒަމާނުގައި ގެ ހޯދުމަކީ މާބޮޑު ކަމެއް ނޫނެއްނު. ގެލެރީ ބޭރުގައި ޖަހާފައި އެހެރަ ނަންބަރަށް ގުޅާނީ. ގުޅީމަ އެ ގެ ހޯދިދާނެތާ.” ފައިސަލް ބުންޏެވެ.
ފައިސަލް ގެލެރީގެ ބޭރުގައި ޖަހާފައިވާ ނަންބަރަށް ގުޅުމުން ފޯނު ނެގީ އަޔާންއެވެ. އަދި ވަރަށް އަވަސް ގޮތަކަށް އޭނައާ ހަވާލުކުރަން ބޭނުންވާ މުހިންމު އެއްޗެއް އޮތްކަމަށް ބުނެ އެޑްރެސް ހޯދިއެވެ.
“ކޮބާ މިކަންވެސް މި ހަމަޖެހުނީ.” ފައިސަލް ހިނިތުންވެލަމުން ބުނެލިއެވެ.
“ފައިސަލް. އަހަންނަށް ކަމެއް ކޮށްދީފާނަންތަ؟” ޒޯޔާ އިނީ އޭނާގެ އަތުގެ ނިޔަފަތިތަކާ ކުޅޭށެވެ.
“ކޮން ކަމެއް؟”
“މި ގިޓާ އެ ރަތް ޓީޝާޓުގެ ގެއަށް ގެންގޮސްދީބަލަ.” ޒޯޔާ އާދޭހުގެ ރާގެއްގައި ބުންޏެވެ.
“ކީކޭ؟ ކީއްވެ؟ ކިހިނެއް؟ މިބުނީ ކީއްވެ އަހަރެން؟ ކަލެއާ ކަލޭގެ މަންމަ ގޮސް އޭނަގެ ގިޓާ ހަލާކުކޮށްލީ، އެއީ ވަރަށް ގޯސް ކަމެއް. އަހަރެމެން ދެމީހުން އެކުގައި ގޮސް އާ ގިޓައެއް ގަތީ، އެއީ ވަރަށް ރަނގަޅު ކަމެއް. އެކަމަކު އަހަރެން މީގެ ތެރެއަށް ވަނީ ކޮންތާކުން؟ އަހަރެން ކީއްކުރަން އޭނައަށް ގިޓާ ދޭން ދާންވީ؟ ސޮރީ، އަހަންނެއް ނުދާނަން.” ފައިސަލް ދެކޮޅު ހެދިއެވެ.
“އަޅެ ޕްލީޒް. އަހަންނަށްޓަކައި މިކަންވެސް ކޮށްލަދީބަލަ. އޭނަ ހުރީ ކިހާ ރުޅިއައިސްފައިކަން ފައިސަލްއަކަށް ނޭނގޭނެ. އޭނައަށް އަހަރެން ފެނިއްޖެއްޔާ ފަހަރެއްގައި މި ގިޓާވެސް ހަލާކުކޮށްލަފާނެ. ޕްލީޒް، އަހަރެންގެ ފަރާތުން މާފަށް އެދެން ގޮސްދީބަލަ.” ޒޯޔާ އާދޭހުގެ ރާގުގައި އަނެއްކާވެސް ބުނެލިއެވެ.
“ނޫން. އަހަރެން އެކަންޏަކުން ނުދާނަން. ހަމަ ޒޯޔާ ދާން ޖެހޭނީ. އަހަންނަށް ޒޯޔާއާއެކު ދެވިދާނެ. ހިނގާ ދާން.” ފައިސަލް ޒޯޔާއާއެކު ދާން ހިނގައިގަތެވެ.
**********
ގޭގެ ބެލް ޖަހާލި އަޑަށް ދޮރު ހުޅުވާލީ އަޔާންއެވެ.
(ނުނިމޭ)
