އެތަނަކީ ރެސްޓޯރެންޓެއް ނޫނެވެ. ކާ އެއްޗެހީގެ މެނޫއެއް، މަޑުމަޑު މިއުޒިކެއް ނުވަތަ ޒީނަތްތެރިކޮށްފައިވާ ބައްތިތަކެއް އެތަނަކު ނެތެވެ. އަދި ވެއިޓަރަކު ބަހައްޓައިގެން ހުރެ ސާވްކުރާ އަގުބޮޑު ކެއުމެއްވެސް އެތަނަކު ނެތެވެ. އެތަނުގައި ހުރީ ހަމައެކަނި ޕްލާސްޓިކް މޭޒަކާއި، ދެ ގޮނޑިއާއި، ސައި ފްލާސްކެއްގެ އިތުރުން، އެހެން މީހަކަށް ދައްކަންވެގެން އުޅުމުގެ ބަދަލުގައި އަމިއްލަ މިނިވަންކަމާއެކު ވަގުތުކޮޅެއް ހޭދަކޮށްލަން ބޭނުންވެފައި ތިބި ދެމަފިރިއެކެވެ.
އަމީން ކާ އެއްޗެއްސަށް ބަލާލިއެވެ.
“މި ފަހަރު ކަނޑުމަސް ހަދާފައި މިހުރީ މީރުމިރުސް ގިނަކޮށްލައިގެންދޯ؟”
“އެއީ އަމީން އެގޮތަށް ބޭނުންވާތީ.”
“ހަނދާން ހުރީތަ؟”
ފާތުން ހައިރާންކަމާއެކު ބަލާލިއެވެ. “ކައިވެންޏަށް ފަނަރަ އަހަރުވީއިރުވެސް، އަމީން ގަޔާވާ އެއްޗެހި އަދިވެސް އަހަރެން ޖެހެނީ އަންދާޒާކުރަންތަ؟”
އަމީން ހިނިތުންވުމަކާއެކު ތަށްޓަށް ބަލާލިއެވެ. ފާތުންނަށް މުޅިން ނޭނގުނު ކަމަކީ، އެ ކުޑަކުޑަ ވާހަކަކޮޅުން އަމީންގެ ހިތަށް ބަޔާންކުރަންދަތި އުފާވެރިކަމެއް ލިބުނުކަމެވެ.
އަމީން ބަތް ސަމުސަލެއް އަނގައަށް ލުމަށްފަހު، ކުޑަ ވަގުތުކޮޅަކަށް ލޯ މަރާލިއެވެ. “އާނ، ވަރަށް މީރު.”
“މީރުވާނެތާ، އެއީ އަހަރެން ކެއްކި އެއްޗެއްވިއްޔާ.”
“މިހާރު ތިހުރީ ވަރަށް އިތުބާރު ބޮޑުވެފައިދޯ؟”
“އަހަރެންގެ ކެއްކުން އަބަދުވެސް މީރުވާނެ. އަމީންގެ ރަހަބަލާ މިންގަނޑު މިހާރު ތަންކޮޅެއް ތަރައްގީވީ.”
ދަރިންގެ ވާހަކައާއި، އަވަށްޓެރިއެއްގެ ބުޅާ ފުރާޅުމައްޗަށް އެރި ވާހަކައާއި، އާއިލީ ބައްދަލުވުމެއް އޮންނަ ކޮންމެ ފަހަރަކު އާ ގެއެއް ގަންނަނީ ކޮން އިރަކުންތޯ އަހާ ތިމާގެ މީހެއްގެ ވާހަކަ ދައްކަމުން އެމީހުން މަޑުމަޑުން ކަމުންދިޔައެވެ.
މަރިޔަމްގެ ސްޕެލިން ޓެސްޓުން ލިބުނު ނަތީޖާގެ ވާހަކަ ފާތުން ބުނުމާއެކު، އަމީން ވަރަށް ސަމާލުވިއެވެ. “ފުލް މާކްސްތަ؟”
“އާނ.”
“އެ މަންޖެ ކޮންމެވެސް ދުވަހަކުން ވާނީ މޮޅު މުދައްރިސަކަށް.”
“ނޫނީ ވަކީލަކަށް.” ފާތުން ބުންޏެވެ. “އޭނާ މިހާރުވެސް ވާހަކަދައްކަނީ ވަކީލެއްހެން.”
އަމީން ހީނލިއެވެ. އެ ވަގުތުކޮޅު ދުނިޔެ ވަރަށް އުފާވެރިހެން ހީވިއެވެ. ނަމަވެސް ކުއްލިއަކަށް އަމީން ކެއުން ހުއްޓާލިކަން ފާތުންނަށް ފާހަގަވިއެވެ.
“ކިހިނެއްވީ؟”
“ކަމެއް ނުވޭ.”
“އަމީން.”
“މިއަދު ސުޕަވައިޒަރު އަހަންނާ ވާހަކަދެއްކި.”
ފާތުން ކަނުލާ އަޑުއަހަން އިނެވެ.
“އަންނަ މަހު ސެކިއުރިޓީގެ ކަންތައްތަކަށް ބަދަލުތަކެއް އަތުވެދާނެ ކަމަށް އޭނާ ބުނި. ކުންފުނިން ދަނީ ކޮންޓްރެކްޓް މުރާޖައާ ކުރަމުން.”
ފާތުންގެ އަތް ހުއްޓުނެވެ. “އޭގެ މާނައަކީ ކޮބާ؟”
“އޭގެ މާނައަކީ ގާޑުންގެ އަދަދު މަދުކޮށްފާނެ ނޫނީ ޝިފްޓްތަކަށް ބަދަލު ގެނެސްފާނެ. އަދި ވަކި ގޮތެއް ނުނިންމާ.”
“އަދި އަމީންގެ ވަޒީފާއަށް ވާނީ ކިހިނެއް؟”
“ނޭނގޭ.”
އަމީން އެ ވާހަކަދެއްކީ ވަރަށް އާދައިގެ ކަމެއްގެ ގޮތުގައެވެ. ނަމަވެސް އެ އަޑުގައިވާ ބިރުވެރިކަން ފާތުންނަށް އިޙުސާސްކުރެވުނެވެ.
“މިއަދު ހެނދުނު ތިވާހަކަ ނުބުނީ ކީއްވެ؟”
“ބުނާނެ ވަކި އެއްޗެއް އޭރު ނެތީމަ.”
“މިހާރު ބުނާނެ އެއްޗެއް އެބައޮތެއްނު.”
އަމީން ފާތުންނަށް ބަލާލިއެވެ. އޭނާގެ މޫނުމަތިން ފެންނަން ހުރީ އާންމުކޮށް ފެންނަ ކަންބޮޑުވުމާއި އާއިލާ ރައްކާތެރިކުރުމުގެ އިޙުސާސެވެ. އޭނާ ޤަބޫލުކުރާ ގޮތުގައި ދެރަ ޚަބަރުތައް ސިއްރުކުރުމަކީ އާއިލާ އުފަލުގައި ބޭތިއްބުމެވެ.
“އަހަރެން ބޭނުންނުވީ ފާތުން ކަންބޮޑުކުރަން.”
ފާތުން ސަމުސާ ބޭއްވިއެވެ. “އަމީން، އަހަރެން މިއީ އަމީންގެ އަންހެނުން. ހަޤީޤަތް ސިއްރުކޮށްގެން އަހަރެން ކަންބޮޑުވުމުން ދުރެއް ނުކުރެވޭނެ.”
އަމީން އެއްވެސް އެއްޗެއް ނުބުނެއެވެ. ފާތުން މޭޒުމަތިން އަތް ދިއްކޮށްލާ އަމީންގެ އަތުގައި ހިފާލިއެވެ.
“ކަމެއް ދިމާވެއްޖެނަމަ އަހަރެމެން އެކަމާ ކުރިމަތިލާނީ. މީގެ ކުރިންވެސް އަހަރެމެން ދަތި ކަންތައްތަކާ ކުރިމަތިލިން.”
“އަހަރެން ބޭނުންވަނީ މާދަމާއާމެދު ބިރުވެރިކަމެއް ނެތި ފާތުންނަށް އުފާވެރި ދިރިއުޅުމެއް ހޯދައިދޭން.”
“އަދި އަހަރެން ބޭނުންވަނީ އަމީންގެ ދިރިއުޅުމުގައި ބޭރު މީހެއްގެ ބަދަލުގައި، އަމީންގެ ގާތުގައި ސާބިތުވެ ހުންނަން.”
މި ބަސްތަކަކީ މަޑުމައިތިރި ބަސްތަކެއް ނަމަވެސް، އެއީ ވަރަށް ކުރިއްސުރެ ބުނަން ބޭނުންވެފައިވާ މުހިންމު ވާހަކަތަކެކެވެ.
އަމީން އިސްދަށަށް ޖަހާލިއެވެ. ފިރިއެއްގެ ހައިސިއްޔަތުން އޭނާގެ އަގުވަޒަންކުރެވެނީ އަނބިމީހާއަށް ފޯރުކޮށްދެވޭ މާއްދީ ތަކެތީގެ މައްޗަށް އެކަނި ކަމަށް ޤަބޫލުކޮށްގެން އޭނާ ހޭދަކުރި ގިނަ އަހަރުތަކުގެ ތެރޭގައި، ކައިވެނީގެ އެހެނިހެން ޒިންމާތަކުގެ މަތިން އޭނާ ހަނދާން ނެތުނު ކަހަލައެވެ. އެއީ އެކަކު އަނެކަކާ ވާހަކަދެއްކުމާއި، އިތުބާރު ކުރުމާއި، ބިރުގަންނަ ހިނދު ގާތުގައި ހުރި ބައިވެރިޔާއާ އެކަން ހިއްސާކުރުމެވެ.
ފާތުން އަމީންގެ އަތަށް ބާރުކޮށްލިއެވެ. “ކޮންމެ ދުވަހަކު ތިޔައީ ބޮޑު ގަދަފަދަ މީހަކަށް ވާކަށް ނުޖެހޭ.” އޭނާ މަޑުމަޑުން ބުންޏެވެ. “ބައެއް ފަހަރު، ހަމައެކަނި އަހަރެންގެ ފިރިމީހާގެ ގޮތުގައިވެސް ހުރެވިދާނެ.”
އަމީން ވަރަށް ގިނައިރު ވަންދެން ފާތުންގެ މޫނަށް ބަލަން ހުއްޓެވެ. އެއަށްފަހު، ފާތުންގެ އަތުގެ ދަށުން އޭނާގެ އަތް އަނބުރާލައި، އެ އަތުގައި ބާރަށް ހިފަހައްޓާލިއެވެ.
އެ ދެމީހުންގެ ފަހަތުން ބޭންކުގެ ދޮރުތައް ހުރީ ލައްޕާފައެވެ. މަގުމަތީގެ ބައްތިތަކުގެ އަލި އެ ދޮރުތަކަށް އެޅިފައިވާއިރު، ކައިރިން ހިނގާފައިދާ މީހުންގެ ހިޔަނިތައް ފެންނަން ހުއްޓެވެ. އެކަމަކު އެ ދެމަފިރިން އެތަނުގައި އިށީނދެގެން ތިބެ ކަމުން ދިޔައީ ބަތާއި މަހެވެ. އެއީ އެއްވެސް އަގަކަށް ގަނެވޭނެ އެއްޗެއް ނޫންފަދަ ތެދުވެރި ލޯތްބަކާ އެކުގައެވެ.
މަގުގެ އަނެއް ފަރާތުގައި ފޯނު ހިފައިގެން ހުރި ޒުވާނާ އެމީހުންނަކަށް ފާހަގައެއް ނުކުރެވުނެވެ. އޭނާ އެތަނުގައި ރަހުމަތްތެރިއަކަށް އިންތިޒާރު ކުރަނިކޮށް އޭނާގެ ސަމާލުކަން އެ ދިމާއަށް ހުއްޓުނީއެވެ. ޔުނީފޯމުގައި ހުރި ސެކިއުރިޓީ ގާޑަކު، އޭނާގެ އަނބިމީހާ ގެއިން ގެނައި ކާތަކެތި ކާން އިން މަންޒަރު ފެނުމުންނެވެ.
އެއީ މާ ބޮޑު ކަމެއް ނޫނެވެ. އެއްވެސް ޒުވާބެއް ނެތެވެ. އަސަރުގަދަ ބަސްތަކެއް ނެތެވެ. އަގުބޮޑު ހަދިޔާއެއްވެސް ނެތެވެ. އޮތީ ހަމައެކަނި، ލޯބިވާ ފިރިމީހާއަށްޓަކައި ވަގުތު ހުސްކުރި އަންހެނެކެވެ.
އެ ޒުވާނާ އެ މަންޒަރުކޮޅު ރެކޯޑުކޮށްލީ، އާދައިގެ ލޯތްބެއްގެ ފުރިހަމަކަމާ ބެހޭ ކުރު ލިޔުމަކާއެކު ހިއްސާކޮށްލުމުގެ ނިޔަތުގައެވެ. އެހެންނަމަވެސް، އެ ވީޑިއޯ އޭނާ ހީކުރި ވަރަށްވުރެ މާ ދުރަށް ފެތުރިގެންދާނެ ކަމެއް އޭނާއަށް އޭރަކު ނޭނގެއެވެ.
*****
ޖެހިގެން އައި ދުވަހު ހެނދުނު، ރޭގަނޑުގެ ޑިއުޓީ ނިންމާފައި އަމީން ނިދާފައި އޮއްވައި، ރާއްޖޭގެ މަޤުބޫލު ސޯޝަލް މީޑިއާ ޕޭޖަކުން އެ ވީޑިއޯ އާއްމު ކުރިއެވެ. އެއިން ފެންނަނީ ފާތުން ކާން ތައްޔާރުކޮށްދޭ މަންޒަރެވެ. ފާތުން ދެއްކި ވާހަކައަކަށް އަމީން ހީނލި މަންޒަރެވެ. އަދި ބޭންކުގެ ލައްޕާފައިވާ ދޮރުތަކުގެ ދަށުގައި ތިބެގެން އެކަކު އަނެކަކަށް ލެނގިލައިގެން ތިބެ ކާން ތިބި މަންޒަރެވެ.
އޭގެ ސުރުޚީގައި ވަނީ މިފަދައިންނެވެ. “ދިރިއުޅުން ދަތިވާ ހިނދު، ތިބާއަށް ކާން ގެނެސްދޭނެ ބައިވެރިއަކު މިންވަރު ކުރައްވާށިއެވެ.”
މަދު ގަޑިއިރުތަކެއްގެ ތެރޭގައި، އެތައް ހާސް ބަޔަކު އެ ވީޑިއޯ ހިއްސާކުރިއެވެ. އެ މަންޒަރުގެ ސާދާކަމަށް ގިނަ ބަޔަކު ތަޢުރީފު ކުރިއެވެ. ފިރިމީހާގެ މަތިން ހަނދާން ބެހެއްޓި ކަމަށްޓަކައި އަނބިމީހާއަށް ތަޢުރީފު ކުރިއިރު، އަނބިމީހާގެ އެ އެހީތެރިކަން އުފަލާއެކު ބަލައިގަތް ކަމަށްޓަކައި ފިރިމީހާއަށްވެސް ސަނާ ކިޔެވެ. ބައެއް މީހުން އެމީހުންގެ އަމިއްލަ ބައިވެރިންގެ ވާހަކަ ލިޔުނުއިރު، އަނެއް ބަޔަކު ހަނދާން އައުކުރީ އާއިލާއަށްޓަކައި ބުރަ މަސައްކަތްކުރި މައިންބަފައިންނާއި ގާތްތިމާގެ މީހުންގެ ވާހަކައެވެ.
އަންހެނަކު ލިޔެފައިވަނީ، އޭނާގެ ނިޔާވި ބައްޕައަކީ ބަނދަރުމަތީގައި ރޭގަނޑު މަސައްކަތްކުރި މީހެއް ކަމަށާއި، ކޮންމެ ރެއަކުވެސް އޭނާގެ މަންމަ ބައްޕައަށް ސައިފޮދާއި ރޮށި ގެންގޮސްދޭ ކަމަށެވެ.
ޒުވާނަކު ކޮމެންޓު ކުރި ގޮތުގައި، އޭނާގެ ކާފައަކީ ކުރިން ވޮޗަރަކަށް އުޅުނު މީހެކެވެ. އަދި އޭނާގެ މާމަ އަބަދުވެސް ކާފަގެ މަސައްކަތްކުރާ ތަނަށް ކާތަށި ހިފައިގެން ގޮސް އިންތިޒާރުގައި އިންނަ ކަމަށް އޭނާ ބުންޏެވެ.
އެހެން މީހަކު ލިޔެފައިވެއެވެ. “ބޭންކް އެކައުންޓް ފުރިފައި އޮތުމަކީ ނިއުމަތެކެވެ. ނަމަވެސް ތިބާ ކައިފިތޯ ބަލާނެ މީހަކު ހުރުމަކީ މުޅިން ތަފާތު މުއްސަނދިކަމެކެވެ.”
ގިނަ ބަޔަކަށް އެ ވީޑިއޯ ވެގެންދިޔައީ، ލޯތްބަކީ އަބަދު އަގުބޮޑު ކެއުންތަކާއި، ރާއްޖެއިން ބޭރުގެ ދަތުރުތަކާއި، ގަހަނާ ނުވަތަ ބޮޑެތި ހަފުލާތަކުން އެކަނި ފެންނަ އެއްޗެއް ނޫންކަން ހަނދާންކޮށްދިން ކަމަކަށެވެ.
ބައެއް ފަހަރު، ލޯބި ފެންނަނީ ކާތަށްޓަކުންނެވެ. ބައެއް ފަހަރު، އެއީ އަބާޔާއެއް ލައިގެން ސައި ފްލާސްކެއް ހިފައިގެން ހުންނަ އަންހެނެކެވެ. އަދި ބައެއް ފަހަރު، ވަރުބަލިވެފައިވާ ފިރިމީހާ ކައި ނިމެންދެން، އޭނާގެ ހާލު އަހާލުމަށް ކެތްތެރިކަމާއެކު މަޑުކޮށްލައިގެން ހުންނަ ހުރުމެވެ. ނަމަވެސް، ދިރިއުޅުމުގެ އެހެން ކަންކަމެކޭ އެއްފަދައިން، ސޯޝަލް މީޑިއާގައިވެސް ރީތި މަންޒަރެއް އޭގެ ސާފުކަންމަތީގައި ދެމިއޮތުމަކީ ނާދިރު ކަމެކެވެ.
(ނުނިމޭ)
