މަސްތުގެ ދުނިޔެ
ވަޝިއްޔާ އެރޭ ހުރީ އޭނާގެ އަމިއްލަ އިޚުތިޔާރުގައެއް ނޫނެވެ. ވަޝިއްޔާއަށް އެންމެ ފުރަތަމަ ފާހަގަކުރެވުނީ ބޮކިތަކުގެ އަލިތަކަށް އައިސްފައިވާ އާދަޔާ ޚިލާފު ބަދަލެވެ. ލޮލުގެ ކުރިމަތިން ފެންނަމުންދިޔަ ދަނބު، ނޫ އަދި ރަންކުލައިގެ ރިބަންތަކެއް ފަދަ އެ އަލިތައް ދެމެމުން ގޮސް، ކުއްލިއަކަށް ކުދިކުދި ކަނިތަކަކަށް ބަދަލުވެއެވެ. އަދި އަނެއްކާވެސް ފުޅާވެގެންދެއެވެ. އެއީ ހީވާގޮތުން އޭނާއާއި ވަށައިގެންވާ އެއްޗެއްސާ ދެމެދު ހުރި ދުރުމިނާ މީހަކު ކުޅެމުންދާ ކަހަލަ ގޮތަކަށެވެ.
ކުރިމަތީގައި ތިބި މީހުންގެ މޫނުތައް އާދަޔާ ޚިލާފަށް ސާފުކޮށް ފެންނައިރު، އެމީހުންގެ މޫނުމަތިން ފެންނަ އަސަރުތައް ހުރީ ތަމްސީލީ ސިފައެއްގައެވެ. ހަމައެއާއެކު، އެ ތަނުގެ ފާރުތައް މަޑުމަޑުން ހެލެމުންދާހެން ހީވާއިރު، އެއްވެސް އެއްޗެއް ހުންނަންވާ ތަނުގައި ހަރުލާފައި ހުންނަހެނެއް ހީއެއް ނުވެއެވެ.
އޭނާ އެތައް ފަހަރަކު ލޯ މަރާލާފައި ހުޅުވާލިއެވެ. ނަމަވެސް މަންޒަރުތައް އާދައިގެ ހާލަތަކަށް ނައެވެ. އޭގެ ބަދަލުގައި، ކުލަތައް އިތުރަށް ގަދަވެ، ޑިސްކޯ ބޮކިތަކުގެ އަލި ގަދަވެ، މީގެ ކުޑަ އިރުކޮޅެއް ކުރިން ކްލަބު ތެރޭގައި ގުގުމަމުންދިޔަ މިއުޒިކްގެ އަޑު ރާޅުތަކެއްގެ ސިފައިގައި އޭނާގެ ހަށިގަނޑު ތެރޭގައި ދައުރުވާކަމުގެ އިޙުސާސް ކުރެވެން ފެށިއެވެ.
އޭނާ ހުރީ ދާހިއްލާ ފޯވެފައެވެ. ނޫނެކެވެ. އޭނާ ހުރީ ގަނޑުވާ ވަރަށް ފިނިވެފައެވެ. ކަރުދޮށުން ދާހިއްލަމުން ދިޔަ ނަމަވެސް، އަތްތިލަ އޮތީ އާދަޔާ ޚިލާފަށް ތެތްވެފައެވެ. އަދި އަތުގެ އިނގިލިތައް ވަނީ ގަނޑުވެފައެވެ. މުޅި ހަށިގަނޑަށް ލުއިކަމެއް އިޙުސާސް ކުރެވެމުން ދިޔައިރު، ހީވަނީ އޭނާ ކޮޅަށް ހުރި ބިންގަނޑު ކޮންމެ ވަގުތެއްގައިވެސް ފައިދަށުން ދަމައިގެންފާނެހެންނެވެ.
ވަށައިގެން ތިބި މީހުންގެ މޫނުތަކަށް ސަމާލުކަން ދެވޭތޯ އޭނާ މަސައްކަތް ކުރިއެވެ. މީހަކު ހެމުން ދިޔައެވެ. އަނެއް މީހަކު އޭނާގެ ނަމުން ގޮވަމުން ދިޔައެވެ. ރިހިކުލައިގެ ބަބުޅާ ހެދުމެއް ލައިގެން ހުރި އަންހެނަކު އޭނާގެ ކުރިމަތިން ހުރަސްކުރިއެވެ. އެ ހެދުމުގައި އަލި ބީހެމުންދިޔަ ގޮތް ފެނިފައި، އެއީ އާދައިގެ ކަމެއް ނަމަވެސް، ވަޝިއްޔާއަށް އެ މަންޒަރަށް ބެލުނީ އާދަޔާ ޚިލާފު ޝައުޤުވެރިކަމަކާއެކުގައެވެ. ހެދުމުން ފެންނަ ކޮންމެ ވިދުމެއް، އާދައިގެ ވަގުތަށްވުރެ ގިނައިރު ވަންދެން އޭނާގެ ލޮލަށް ފެންނަމުން ދިޔައެވެ.
ސަބަބެއް ނޭނގި އޭނާއަށް ހިނިތުންވެވުނެވެ. ދެން އެ ހިނިތުންވުން ފަނޑުވެގެން ދިޔައެވެ. ކޮންމެވެސް ކަމެއް ގޯސްވެއްޖެއެވެ. އާދައިގެ ވިސްނުމަކަށް ވާސިލުވުމަށް އުނދަގޫވެފައިވާ ފުސްގަނޑެއްގެ ތެރެއިން، މި ހަޤީޤަތް އޭނާއަށް އިޙުސާސްވާން ފެށީ ވަރަށް ލަހުންނެވެ.
އޭނާ ހުރީ ކޮންތަނެއްގައިކަން އޭނާއަށް އެނގެއެވެ. އެހެން މީހުންނާއެކު އެ ކްލަބަށް އައި ހަނދާން އެބަހުއްޓެވެ. ބޭރުގައި ހުރި އަޑުގަދަ މާހައުލާއި، ވަންނަން ކިއޫގައި ހުރި ހަނދާނާއި، އަދި އެތެރެއަށް ވަނުމުގެ ކުރިންވެސް އިވެމުންދިޔަ މިއުޒިކްގެ އަޑު އޭނާ ހަނދާން އެބަހުއްޓެވެ.
އޭނާ ޖޫސްތަށްޓަކަށް އޯޑަރުކުރި ހަނދާން އެބަހުއްޓެވެ. އެ ގްރޫޕުގައި ހިމެނޭ އަންހެނަކާ ވާހަކަދެއްކި ހަނދާން އެބަހުއްޓެވެ. ނަށާ ތަނަށް މީހަކު ގޮވުމުން، އަތުގައި ހުރި ތަށި ބެހެއްޓި ހަނދާންވެސް އެބަހުއްޓެވެ. ނަމަވެސް އޭގެ ފަހުގެ ހަނދާންތައް ވަނީ ބުރިބުރިވެފައެވެ.
އޭނާ މިތަނުގައި ކޮޅަށް ހުންނަތާ ކިހާ އިރެއް ވެއްޖެބާވައެވެ؟ ބިންގަނޑު އެހާ ދުރުގައި ހުރިހެން ހީވަނީ ކީއްވެބާވައެވެ؟ އަދި އަތްތިލަ އެހާ ފިނިވެފައިވާއިރު، މުޅި ހަށިގަނޑުން ދާހިއްލަނީ ކީއްވެބާވައެވެ؟
އޭނާގެ އަމިއްލަ އިނގިލިތަކަކީ އެހެން މީހެއްގެ އެއްޗެއް ފަދައިން، އޭނާ އަތް އުފުލާލައި ބަލާލިއެވެ. އެ އިނގިލިތައް ފެންނަނީ ހަމަ އާދައިގެ ގޮތަށެވެ. އެކަމުން އޭނާ އިތުރަށް ބިރުގަތެވެ. އޭނާއަށް ވެފައި ހުރި ގޮތަށް އެއްވެސް ފަރުވާލެއް ނެތި، ވަށައިގެންވާ މާހައުލުގައި ޕާޓީ ކުރިއަށް ދަނީއެވެ. މިއުޒިކްގެ ބާރު އަޑާއެކު ބިންގަނޑު ހެލެމުންދާއިރު، އެނބުރޭ އަލިތަކުގެ ދަށުގައި މީހުން ނަށަމުންދެއެވެ.
މޭޒުތައް ދޮށުގައި ތިބި ގްރޫޕުތަކުން ހޭ އަޑު އިވެމުންދެއެވެ. އޭނާގެ ރަހުމަތްތެރިން ތިބީ ނަށާ ސަރަހައްދުގައެވެ. ކުލަ އަލިތަކުގެ ތެރެއިން އެމީހުންގެ ހިޔަނިތައް ހަރަކާތްތެރިވަމުން ދެއެވެ.
މީގެ ކުޑައިރުކޮޅެއް ކުރިން އޭނާ ހުރީ އުފަލާއެކު އެމީހުންނަށް ބަލާށެވެ. ނަމަވެސް މިހާރު އެ މާހައުލުގައި ވަމުންދާ ގޮތް އޭނާއަށް ދެނެގަންނަންވެސް އުނދަގުލެވެ.
އޭނާ ނަށާ ސަރަހައްދުން ބޭރަށް ނިކުންނަން މަސައްކަތް ކުރިއެވެ. ނަމަވެސް ހިނގުމަށްޓަކައި އާދަޔާ ޚިލާފަށް ސަމާލުކަން ދޭންޖެހުނެވެ. އެއް ފިޔަވަޅާއި އަނެއް ފިޔަވަޅާ ދެމެދު ހުރި ދުރުމިން އޮޅުންބޮޅުންވެ، އަމިއްލަ ނަފްސު ކޮންޓްރޯލްކުރުމަށްޓަކައި ކައިރީގައި ހުރި ގޮނޑިއެއްގެ އަތްގަނޑުގައި ހިފަހައްޓާލިއެވެ.
އޭނާގެ ހިތް އާދަޔާ ޚިލާފަށް ބާރަށް ތެޅެމުން ދިޔައެވެ. އަނގަ ހިކިފައި ހުރުމުން ކުޅުބޮއެލުމަށް މަސައްކަތްކުރަމުން، އެއީ މާބޮޑަށް ވަރުބަލިވުމުން ނުވަތަ އެތަން ހޫނުވުމުން ނުވަތަ އެރޭ ރަނގަޅަށް ކެވިފައި ނެތުމުން ވާގޮތެއް ކަމަށް އަމިއްލަ ނަފްސަށް ވިސްނައިދޭން މަސައްކަތް ކުރިއެވެ. ނަމަވެސް އެއިން އެއްވެސް ކަމަކީ ހަޤީޤަތް ކަމަކަށް އޭނާގެ ހިތެއް ނުބުނެއެވެ.
މީގެ ކުރިން އޭނާ ހުރީ މުޅިން ރަނގަޅަށެވެ. އެކަން އޭނާއަށް ޔަގީނެވެ. އަދި އޭނާގެ ހަށިގަނޑަށް މިފަދަ ބަދަލެއް އަންނަންޖެހޭ ފަދަ އެއްވެސް އެއްޗެއް ބޭނުންކޮށްފައި ނުވާނެކަންވެސް އޭނާއަށް އެނގެއެވެ.
މިއުޒިކްގެ އަޑުގެ ތެރެއިން ދަންނަ އަޑެއް އިވުނެވެ.
“ވަޝިއްޔާ؟”
އޭނާ އެ އަޑު އައި ދިމާލަށް އެނބުރުނެވެ.
އެމީހަކު އެހާ ބޮޑަށް ހަރަކާތް ނުކުރި ނަމަވެސް، ކުރިމަތީގައި ހުރި މޫނު ކުއްލިއަކަށް ކައިރިވެފައި އަނެއްކާވެސް ދުރުވާހެން ހީވިއެވެ.
“ބަލީތަ؟”
ވަޝިއްޔާ ޖަވާބެއް ދޭން މަސައްކަތް ކުރިއެވެ.
“އަހަރެން..”
ޖުމްލަ ފުރިހަމަ ނުވަނީސް އެ ބަސްތައް ގެއްލިއްޖެއެވެ.
ވާހަކަ ދައްކަން އުނދަގޫވުމުން، ލަދުން ހުރެ އޭނާ މަޑުމަޑުން ހިނިތުންވެލިއެވެ. ނަމަވެސް އޭނާގެ އަނގައިން ނިކުތް އަޑު އިވެނީ ވަރަށް ދުރުން އިވޭ އަޑެއްގެ ގޮތުގައެވެ.
ކައިރީގައި ހުރި އަންހެން މީހާގެ މޫނުމަތިން ނުތަނަވަސްކަން ފެނުނެވެ.
“ވަޝިއްޔާ، އަހަންނަށް ބަލާބަލަ.”
އޭނާ އެކަމަށް މަސައްކަތް ކުރިއެވެ. ކުޑަހިނދުކޮޅަކަށް އެ މޫނު ސާފުކޮށް ފެނުމުން ވަޝިއްޔާއަށް ކުޑަ ހިތްހަމަޖެހުމެއް ލިބުނެވެ. ނަމަވެސް އަނެއްކާވެސް އަލިތައް އެނބުރިގަތުމާއެކު، އެ ސާފުކަން ގެއްލިގެން ދިޔައެވެ.
“އަހަންނަށް ގޮތްގޮތް އެބަވޭ.” އޭނާ ސިއްރުސިއްރުން ބުންޏެވެ.
އެ އަންހެން މީހާ ގާތްވެލިއެވެ.
“ކީކޭ ތިބުނީ؟”
“ނޭނގެ.”
އަދި އެއީ ބިރުވެރި ހަޤީޤަތެވެ.
އޭނާއަށް އެވަނީ ކީއްކަމެއް ވަޝިއްޔާއަކަށް ނޭނގެއެވެ. އޭނާއަށް އެނގޭހާވެސް ކަމަކީ، ކަންކަން ދެނެގަތުމަށް އޭނާގެ ހަށިގަނޑުގައި ހުރި ބާރު ކެނޑެމުންދާ ކަމެވެ.
*****
ގިނަ މީހުންނަށް އެކަން ފާހަގަވުމުގެ ކުރިން މިރުޒާއަށް އެ ބަދަލު ފާހަގަކުރެވިއްޖެއެވެ. އޭނާ ހުރީ ރަހުމަތްތެރިންތަކަކާއެކު، ދެން އޮންނަ ހަފުލާއަކާ ބެހޭގޮތުން ދެކެވެމުންދިޔަ ވާހަކަތަކަށް މާބޮޑު ސަމާލުކަމެއް ނުދީއެވެ. ނަމަވެސް، ކުއްލިއަކަށް އޭނާގެ ސަމާލުކަން ނެށުމުގެ ސަރަހައްދަށް ހުއްޓުނެވެ.
ފުރަތަމަ އޭނާ ހޯދަމުން ދިޔައީ ވަޝިއްޔާއެވެ. ވޭތުވެދިޔަ ހަފުތާތަކުގައި މިއީ އޭނާއަށް އާދަވެފައިވާ ކަމެކެވެ. އެއީ އިއްތިފާޤެއް ކަމަށް ހެދުމުގެ ބޭނުމެއް މިހާރު ނެތެވެ. ކޮންމެ ތަނަކަށް ވަދެވުނަސް، ގަސްދުގައި ނޫން ނަމަވެސް، އޭނާގެ ލޯ އެންމެ ފުރަތަމަ ހޯދަނީ ވަޝިއްޔާއެވެ. ދެކެވޭ ވާހަކައެއް ފޫހިވާ ކޮންމެ ފަހަރަކު، އޭނާ ހުންނަނީ ކައިރީގައިތޯ ބަލައިލެވެއެވެ. އަދި އޭނާ ހީނލާ އަޑު އިވޭ ކޮންމެ ފަހަރަކު، މިރުޒާއަށް އެދިމާލަށް ބަލައިލެވެއެވެ.
ނަމަވެސް، މިރޭ އެ ގުރޫޕު އައިއިރު ވަޝިއްޔާ ހުރީ އާދަޔާ ޚިލާފަށް ހިމޭނުންނެވެ. އޭނާ އިނީ މޭޒުތަކާ ކައިރީގައި، އެހެން މީހުން މިއުޒިކާ ބެހޭގޮތުން ދައްކަމުންދިޔަ ވާހަކަތަކާއި، ރަހުމަތްތެރިއަކު ނަށަން އުޅުނު ގޮތަކަށް މަލާމާތްކުރި އަޑު އަހާށެވެ. އޭނާގެ ފަރާތުން ފެންނަ ސާދާކަމާއެކުވެސް އޭނާ ފެންނަނީ ނުހަނު ފުރިހަމަކޮށެވެ. މިރުޒާގެ ހުރިހާ ސަމާލުކަމެއް ވަނީ އޭނާއަށް ހުއްޓިފައެވެ. ވަޝިއްޔާގެ ދިގު އިސްތަށިގަނޑު ވަނީ މޫނުމަތިން އެއްފަރާތްކޮށް އައްސާލެވިފައެވެ. އޭނާގެ މޫނުމަތިން ފެންނަނީ ޝައުޤުވެރިކަމާއި މަޑުމައިތިރި ހިނިތުންވުމެކެވެ.
އޭނާ ނަށަން ބޭނުންވާހެނެއް ހީއެއް ނުވެއެވެ. މިރުޒާ ހީކުރީ ވަޝިއްޔާ މުޅި ރޭ ހޭދަކުރާނީ އެހެން މީހުންގެ ހަރަކާތްތައް ބަލަން ކަމަށެވެ. ފަހުން އޭނާގެ ނޫޓުފޮތުގައި ލިޔުމަށްޓަކައި ބައެއް ކަންކަން ހިތުގައި ނޯޓުކުރަމުންދާނެ ކަމަށެވެ. ނަމަވެސް، މިއުޒިކަށް ބަދަލެއް އައި ވަގުތެއްގައި، އޭނާ ނަށާ ސަރަހައްދަށް ނުކުމެއްޖެއެވެ. އަދި މިރުޒާއަށް އޭނާއާ ދިމާލަށް ބަލަން ހުރެވުނެވެ.
އާންމުކޮށް ކަންކަމުގައި ބައިވެރިވުމުގެ ބަދަލުގައި ބަލަން ހުންނަ މީހަކު، މިފަދަ މާހައުލަކުން ފެނުމުން ހިތްގައިމު ގޮތެއް ހުއްޓެވެ. އެއްވެސް ޖެހިލުންވުމެއް ނެތި އޭނާ ހަރަކާތްތެރިވަމުން ދިޔައެވެ. ރަހުމަތްތެރިއަކު އޭނާގެ އަތުގައި ހިފާ އެއްވުމުގެ ތެރެއަށް ގެންދިއުމުން އޭނާ ހިނިތުންވެލިއެވެ.
(ނުނިމޭ)
