ހޮލީވުޑްގެ މަޝްހޫރު ތަރި ހިލަރީ ސްވޭންކް (އުމުރުން 52 އަހަރު) އަންނަނީ، އުމުރުން ދުވަސްވީ ފަހުން ދަރިން ހޯދާ އަންހެނުންނަށް މުޖުތަމައުން ކުރިމަތިވާ ފާޑުކިޔުންތަކާއި، އަންހެނުންނާމެދު ގެންގުޅޭ ތަފާތު ތަސައްވުރުތަކަށް ގޮންޖަހަމުންނެވެ.
އެކަޑަމީ އެވޯޑް ދެ ފަހަރަށް ހާސިލްކޮށްފައިވާ ސްވޭންކާއި އޭނާގެ ފިރިމީހާ ފިލިޕް ޝްނައިޑަރަށް، އެޕްރީލް 2023 ގައި އެއްމާބަނޑު ދެކުދިން ކަމަށްވާ އާޔާ އަދި އޯމް ލިބުނީ ސްވޭންކްގެ އުމުރުން 48 އަހަރުގައެވެ. އޭނާގެ މި ތަޖުރިބާގެ ސަބަބުން، އަންހެނުންގެ އަމިއްލަ ނިންމުންތައް އާދަކާދައިގެ މިންގަނޑުތަކާ ތަފާތުވުމުން ކުރިމަތިވާ ދެފުށް ގެެއްލޭ އުސޫލުތަކާ ބެހޭގޮތުން އަލުން ބަހުސްތައް ވަނީ ފެށިފައެވެ.
އެޕްރީލް 8، 2025 ގައި “ވުމަންސް ހެލްތު” މަޖައްލާއަށް ދިން އިންޓަވިއުއެއްގައި ސްވޭންކް ވަނީ، މައިވަންތަކަމުގެ ސަބަބުން އޭނާގެ ދިރިއުޅުމަށް އައި ބަދަލުތަކާ ބެހޭގޮތުން ވާހަކަދައްކާފައެވެ. އޭނާ ބުނި ގޮތުގައި، މުޖުތަމައުން ކަނޑައަޅާފައިވާ ވަގުތުތަކަށް ފިިތިގެން އުޅުމުގެ ބަދަލުގައި، އޭނާ އިސްކަންދިނީ އެ އުފާވެރި ތަޖުރިބާ ފުރިހަމައަށް ބަލައިގަތުމަށެވެ.
އޭނާގެ ވާހަކައިން ފާހަގަވަނީ އާންމުކޮށް ފެންނަ ފުށުއެރުމެކެވެ. އެއީ މާ ޅައުމުރުގައި ދަރިން ހޯދުމުން ނުވަތަ މާ ބޮޑަށް ލަސްކުރުމުން ވެސް، އަދި ކެރިއަރަށް އިސްކަންދިނުމުން ނުވަތަ ދަރިން ނުހޯދުމަށް ނިންމުމުން ވެސް އަންހެނުންނަށް ފާޑުކިޔުންތައް އަމާޒުވާ ކަމެވެ.
އުމުރުން 35 އަހަރުން މަތީގައި ބަލިވެއިނުމަކީ، ދަރިމައިވުމުގެ ފުރުސަތު ކުޑަވުމާއި ސިއްޙީ ގޮންޖެހުންތައް ކުރިމަތިވުމުގެ ފުރުސަތު ބޮޑު ކަމަކަށްވާތީ، އެކަމުގައި ސިއްޙީ މާހިރުންގެ ލަފަޔާއި އިރުޝާދު ހޯދުމަކީ މުހިންމު ކަމެކެވެ. “އެމެރިކަން ކޮލެޖް އޮފް އޮބްސްޓެޓްރިޝަންސް އެންޑް ގައިނަކޮލޮޖިސްޓްސް” އިން ލަފާދެނީ މިފަދަ ހާލަތްތަކުގައި އެކަށީގެންވާ ސިއްޙީ އިރުޝާދާއި ވަކިވަކި ފަރުދުންނަށް ބޭނުންވާ ޚާއްސަ އަޅާލުން ހޯދުމަށެވެ.
ކޮންމެ އަންހެނެއްގެ ވެސް ދިރިއުޅުމުގެ ދަތުރަކީ ތަފާތު ދަތުރެކެވެ. އާއިލާ ރޭވުމަކީ މަޢުލޫމާތު ފުރިހަމައަށް ލިބިގެން ނިންމާ ނިންމުމަކަށް ވާންޖެހެއެވެ. އަދި އެއީ އާންމުންގެ ފާޑުކިޔުންތަކާއި ވަކި މުއްދަތަކަށް ފިތިގެން ނިންމާ ނިންމުމަކަށް ވުމުގެ ބަދަލުގައި، އެހެން މީހުންގެ އިޙުތިރާމާއި އެހީތެރިކަން ލިބެންޖެހޭ ކަމެކެވެ.
މައިވަންތަކަމަކީ ވަގުތާ ދެކޮޅަށް ކުރާ ރޭހެއް ނޫނެވެ. އަންހެނެއްގެ އަގު ވަޒަންކުރެވެނީ އޭނާ މައެއްގެ ޝަރަފު ހޯދި އުމުރަކުން ނުވަތަ އެކަން ކުރި ގޮތަކުން ނޫނެވެ.
