ލޯތްބަކީ އިންސާނީ ފިޠުރަތާ ގުޅިފައިވާ، ބަޔާންކުރަން ދަތި ފުން އިޙްސާސެކެވެ. މިއީ ހިތުގެ އެންމެ ފުންމިނުން އުފެދޭ ކުލުުނާއި، ގާތްކަމާއި، އަޅާލުމުގެ މަތިވެރި ސިފައެކެވެ. ދުނިޔޭގައި އިންސާނަކަށް ކުރެވޭނެ އެންމެ މާތް އަދި އެންމެ ބާރުގަދަ އިޙްސާސަކީ ލޯތްބެވެ. މިއީ ހަމައެކަނި ދުލުން ބުނެލާ ބަހެއް ނޫނެވެ. އަދި ކުއްލިއަކަށް މެދުވެރިވާ ހާދިސާއެއްވެސް ނޫނެވެ. އޭގެ ބަދަލުގައި، ލޯތްބަކީ އިންސާނާގެ މުޅި ނަފްސު އެކަމެއްގެ ތެރެއަށް ޣަރަޤުވެގެންދާ، “ވެވޭ” އިޙްސާސެކެވެ.
ލޯބީގެ ތަފާތު ބާވަތްތަކާއި ދަރަޖަތައް ވެއެވެ. އޭގެ ތެރެއިން އެންމެ މަތިވެރި ލޯތްބަކީ ﷲ ސުބުޙާނަހޫ ވަތަޢާލާއާއި އެކަލާނގެ ރަސޫލާ ﷺ ދެކެވާ ލޯތްބެވެ. މީގެ އިތުރުން މައިންބަފައިންނާއި ދަރިންގެ މެދުގައިވާ ލޯތްބާއި، އެކުވެރިކަމުގެ ލޯތްބަކީ އިންސާނީ މުޖުތަމަޢުގެ ބަދަހިކަމުގެ އަސާސެވެ. ނަމަވެސް، އާންމު ގޮތެއްގައި “ލޯބި” މި ބަސް އިވުމުން ގިނަ ބައެއްގެ ސަމާލުކަން ހުއްޓެނީ ދެ ޖިންސުގެ ދެމެދުގައި އުފެދޭ އިޝްޤީ ލޯތްބަށެވެ.
އިޝްޤީ ލޯތްބަކީ އިންސާނާގެ ޖިސްމާއި ރޫޙަށް ބޮޑެތި ބަދަލުތަކެއް ގެނުވާ ކަމެކެވެ. މިފަދަ ލޯތްބެއް ވެވުމުން، އިންސާނާގެ ފިކުރުތައް އެމީހަކު ލޯބިވާ ފަރާތަކަށް ހުސްވެގެންދެއެވެ. އުފަލާއި ހިތާމަ ބިނާވަނީ އެ ފަރާތަކާ ގުޅިގެންނެވެ. ހިތުގެ ތެޅުން އަވަސްވުމާއި، ނިދިން މަޙްރޫމްވުމާއި، އަބަދުމެ އެ ފަރާތެއްގެ ހިޔާލުގައި ހުރުމަކީ އިޝްޤީ ލޯބީގެ އަސަރުތަކެވެ. މި އިޙްސާސަކީ އިންސާނާގެ ކިބައިގައިވާ ކެތްތެރިކަމާއި، ތެދުވެރިކަން އިމްތިޙާން ކުރާ ކަމެއްވެސް މެއެވެ.
އިޝްޤީ ލޯބި ޙާޞިލުކުރުމަކީ ހަމައެކަނި ހުވަފެނަކުން ވާނެ ކަމެއް ނޫނެވެ. އެކަމަށްޓަކައި އިޚްލާޞްތެރިކަމާއި، ތެދުވެރިކަން ބޭނުންވެއެވެ. އަދި އިސްލާމީ ރިވާޖުތަކާއި މުޖުތަމަޢުގެ އަދަބުތަކުގެ ތެރެއިން، އެކަކު އަނެކަކަށް އިޙްތިރާމްކުރުމާއި، އެކަކު އަނެކަކުގެ އުނިސިފަތަކާއެކު ބަލައިގަތުމަކީ ލޯބި ހާސިލުކޮށް ދެމެހެއްޓުމަށް ކުރެވިދާނެ އެންމެ މުހިންމު ކަންކަމެވެ. ހަގީގީ ލޯބި ހާސިލުވަނީ ދެމީހުންގެ މެދުގައި އޮންނަ އިތުބާރާއި، އެކަކު އަނެކަކަށްޓަކައިވާ ގުރުބާނީގެ ސަބަބުންނެވެ.
“ލޯބި އެއީ ވާ އެއްޗެއް ނޫން، ވެވޭ އެއްޗެއް” މި ބުނުމުގެ ފުން މާނައަކީ، ލޯތްބަކީ އިންސާނާގެ އިޚްތިޔާރުން ބޭރުގައި، އޭނާގެ ހިތް އެކަމަކަށް މަޖުބޫރުކުރުވާ ކަމެއް ކަމެވެ. އަޅުގަނޑުމެންނަށް ވަކި މީހަކު ދެކެ ލޯބިވާން ނިންމައިގެން ލޯތްބެއް ނުވެވޭނެއެވެ. އެއީ ހިތުގެ އަޑީގައި އަމިއްލައަށް އުފެދި، މުޅި މީހާ އޭގެ ބާރުގެ ދަށަށް ގެންދާ ފުން އިޙްސާސެކެވެ. އިންސާނާގެ މާބޮޑު ބާރަކާއި އިޚްތިޔާރަކާ ނުލައި، އެ އިޙްސާސެއްގެ ތެރެއަށް އިންސާނާގެ ފުރާނަ ފީނައިގަތުމުން، އެއަށް ކިޔަނީ “ލޯބި ވެވުމެވެ”.
ލޯތްބަކީ ދިރިއުޅުމުގެ ފޮނިކަމެވެ. އެއީ އިންސާނާގެ ރޫޙަށް ދިރުންދޭ، އުންމީދުތައް އާކޮށްދޭ މަތިވެރި ނިޢުމަތެކެވެ. އެހެންކަމުން، ލޯބި ވެވުމުން އެކަމުގެ މަތިވެރިކަން ދަނެ، ތެދުވެރިކަމާއި އިޚްލާޞްތެރިކަމާއެކު އެ ގުޅުން ދެމެހެއްޓުމަކީ އުފާވެރި ދިރިއުޅުމެއްގެ ތަޅުދަނޑިއެވެ.
