އަންހެނުންގެ ސިއްހީ މައްސަލަތަކުގެ ތެރެއިން އެންޑޯމެޓްރިއޯސިސް އަކީ ދުނިޔޭގެ ނިސްބަތުން ގިނަ ބަޔަކަށް ދިމާވާ، ނަމަވެސް އެކަމާ ބެހޭގޮތުން ހޭލުންތެރިކަން ކުޑަ ބައްޔެކެވެ. މިއީ ގިނަ ފަހަރަށް ދިގު މުއްދަތަކަށް ތަޙައްމަލް ކުރަންޖެހޭ، ދިރިއުޅުމުގެ ފެންވަރަށް ނޭދެވޭ އަސަރުތަކެއް ކުރާ ވޭންދެނިވި ބައްޔެކެވެ.

އެންޑޯމެޓްރިއޯސިސް އަކީ ކޮބާ؟

އެންޑޯމެޓްރިއޯސިސް އަކީ ރަހިމުގެ އެތެރޭގެ ފަށަލައިގައި ހުންނަ ސެލްތަކާ އެއްގޮތް ސެލްތަކެއް، ރަހިމުން ބޭރުގައި ހުންނަ ގުނަވަންތަކުގައި އުފެދި ބޮޑުވުމެވެ. އާންމުކޮށް މި ސެލްތައް އުފެދެނީ ބިސްއުފައްދާ ގުނަވަން (އޯވަރީޒް)، ފެލޯޕިއަން ޓިއުބު، އަދި އުކުޅުވަޅުގެ އެކި ހިސާބުތަކުގައެވެ. ކޮންމެ މަހަކު މައްސަރު ކަންތައް ޖެހުމުން، ރަހިމުގެ އެތެރެފަށަލައެކޭ އެއްފަދައިން މި ސެލްތައް ވެސް ބޯވެ، ލޭ އަންނަން މަސައްކަތް ކުރެއެވެ. ނަމަވެސް، ރަހިމުން ބޭރުގައި ހުންނަ މި ސެލްތަކަށް ހަށިގަނޑުން ބޭރުވާނެ މަގެއް ނޯވެއެވެ. މީގެ ސަބަބުން އެތަންތަން ދުޅަވެ، “ސްކާ ޓިޝޫ” އުފެދި، ގުނަވަންތައް އެކި ތަންތަނުގައި ތަތްވުމަށް މަގުފަހިވެއެވެ.

އެންޑޯމެޓްރިއޯސިސްގެ އަލާމާތްތައް

މި ބަލީގެ އަލާމާތްތައް އެކި މީހުންނަށް ދިމާވަނީ އެކި މިންވަރަށެވެ. ބައެއް މީހުންނަށް ވަރަށް ބޮޑަށް ވޭން އަޅާއިރު، އަނެއް ބަޔަކަށް އެއްވެސް އަލާމާތެއް ނުފެނި ވެސް ހިނގައިދާނެއެވެ. އެންމެ އާންމު އަލާމާތްތަކަކީ:

1- ވޭންދެނިވި މައްސަރު ކަންތައް: މައްސަރު ކަންތައް ދިމާވާއިރު އާދަޔާ ޚިލާފަށް ބޮޑަށް ބަނޑުގައި ނުވަތަ އުކުޅުވަޅުގައި ރިއްސުން. މިއީ އާންމުކޮށް ވާ ތަދަށްވުރެ މާ ގަދަ ތަދެކެވެ.

2- ޖިންސީ ގުޅުން ހިންގާއިރު ތަދުވުން: ގުޅުން ހިންގާ ވަގުތު ނުވަތަ އޭގެ ފަހުން ވެސް ރިއްސުން ހުރެދާނެއެވެ.

3- ކުޑަކަމުދާއިރު ނުވަތަ ބޮޑުކަމުދާއިރު ތަދުވުން: ހާއްސަކޮށް މައްސަރު ކަންތައް ދިމާވެފައިވާ ދުވަސްވަރު މި އުނދަގޫތައް ބޮޑުވެއެވެ.

4- ދަރިން ހޯދުމަށް ދަތިވުން: ބައެއް ފަހަރު އެންޑޯމެޓްރިއޯސިސް ހުންނަކަން އެނގެނީ ދަރިން ނުލިބިގެން ޓެސްޓުތައް ހަދާ މަރުހަލާގައެވެ.

5- އެހެނިހެން އަލާމާތްތައް: ވަރުބަލިވުން، ބަނޑުހައިވުން، ބަނޑު ފުއްޕުން، އަދި މޭ ނުބައިކުރުން ފަދަ ކަންކަން ހިމެނެއެވެ.

އެންޑޯމެޓްރިއޯސިސްގެ ފަރުވާ

މި ބައްޔަށް މުޅިން ފަސޭހަވާނެ ފަރުވާއެއް އަދި ހޯދިފައެއް ނުވި ނަމަވެސް، ބަލީގެ އުނދަގޫތައް ކުޑަކުރުމަށާއި ދަރިމައިވުމުގެ ފުރުސަތު ބޮޑުކުރުމަށް އެކި ފަރުވާތައް ދެއެވެ.

* ބޭސްވެރިކަން: ތަދު ކުޑަކުރުމަށްޓަކައި ތަދުކަނޑުވާ ބޭސް ބޭނުންކުރުމާއި، ހޯރމޯން ތެރަޕީ (މިސާލަކަށް އުފަންވެލި ކޮންޓްރޯލް ކުރާ ބޭސް ނުވަތަ އިންޖެކްޝަން) ބޭނުންކޮށްގެން މައްސަރު ކަންތައް ކޮންޓްރޯލްކޮށް، ސެލްތައް ބޮޑުވުން މަޑުޖައްސާލެވެއެވެ.

* ސާޖަރީ: ލެޕްރޮސްކޯޕީ ބޭނުންކޮށްގެން، ރަހިމުން ބޭރުގައި ހުންނަ އެންޑޯމެޓްރިއޯސިސްގެ ސެލްތަކާއި ސްކާ ޓިޝޫތައް ނައްތާލެވެއެވެ. މިއީ ދަރިމައިވުމުގެ ފުރުސަތު އިތުރުކުރުމަށް ވެސް ކުރެވޭ ކަމެކެވެ.

* ދިރިއުޅުމުގެ އާދަތައް: ސިއްހަތަށް ފައިދާހުރި ކާނާ ކެއުމާއި، ޤަވާއިދުން ކަސްރަތު ކުރުމަކީ ބަލީގެ ސަބަބުން ހަށިގަނޑުގައި އުފެދޭ ދުޅަހެޔޮކަން ކުޑަކުރުމަށް އެހީތެރިވެދޭނެ ކަންކަމެވެ.

ނިންމާލަމުން ދަންނަވާނީ، އެންޑޯމެޓްރިއޯސިސްއަކީ އަންހެނެއްގެ ޖިސްމާނީ އަދި ނަފްސާނީ ދުޅަހެޔޮކަމަށް ވަރަށް ބޮޑަށް އަސަރުކުރާ ކަމެކެވެ. އެހެންކަމުން، މައްސަރު ކަންތަކާ ގުޅިގެން އާދަޔާ ހިލާފު ތަދެއް އިހުސާސް ކުރެވޭނަމަ، އެއީ “އާންމު ކަމެއް” ކަމަށް ބަލައި ހަނުނުހުރެ، ލަސްނުކޮށް ޑޮކްޓަރެއްގެ ލަފާ ހޯދުމަކީ ބަލީގެ ކުރީކޮޅު ފަރުވާ ފެށުމަށް ލިބޭނެ ވަރަށް ބޮޑު އެހީއެކެވެ.