ކިރަކީ އިންސާނާގެ ހަށިގަނޑަށް ބޭނުންވާ މުހިއްމު އެތައް މާއްދާތަކެއް އެކުލެވިގެންވާ، ދުޅަހެޔޮ ސިއްހަތަކަށް ކޮންމެހެން ބޭނުންތެރި ބުއިމެކެވެ. ނަމަވެސް، އަޅުގަނޑުމެންގެ މުޖުތަމައަށް ބަލާއިރު، ގިނަ ފިރިހެނުންނަކީ ކިރު ބުއިމާ ދުރު ބައެއްގެ ގޮތުގައި ފާހަގަކުރެވެއެވެ. މިކަމުގެ ފަހަތުގައި ތަފާތު ސަބަބުތަކެއް އެކުލެވިގެންވެއެވެ.
ފިރިހެނުން ކިރު ބުއިމާ ދުރުވާ އެންމެ ބޮޑު އެއް ސަބަބަކީ، ކިރަކީ ހަމައެކަނި ކުޑަކުދިންނަށް ހާއްސަ ބުއިމެއް ކަމަށް ދެކޭ ކުށްހީއެވެ. ބޮޑެތި ފިރިހެނުން ކިރު ބުއިމަކީ “ކުޑަކުދިންގެ ކަމެއް” ގޮތުގައި ބައެއް މީހުން ގަބޫލުކުރެއެވެ. މީގެ އިތުރުން، ކިރު ބުއިމުން ބައެއް މީހުންނަށް ދިމާވާ ބަނޑު ފުއްޕުމާއި، ގޭސްވުން ފަދަ “ލެކްޓޯޒް އިންޓޮލަރެންސް” ގެ މައްސަލަތަކަކީވެސް ކިރާ ދުރުވާން މެދުވެރިވާ ސަބަބެކެވެ. އަދި ގިނަ ފިރިހެނުން ކިރުގެ ބަދަލުގައި ސައި ނުވަތަ ކޮފީ ފަދަ ބުއިންތަކަށް ބޮޑަށް އާދަވެފައިވުމަކީވެސް މިކަމުގެ ސަބަބެކެވެ.
ކިރު ބުއިމާ ފިރިހެނުން ދުރުވި ނަމަވެސް، ކިރުން ލިބޭ ފައިދާތަކަކީ ނުހަނު ގިނަގުނަ ކަންކަމެވެ. ކިރަކީ ކަށިތައް ވަރުގަދަކުރުމަށް ބޭނުންވާ ކެލްސިއަމް އާއި ވިޓަމިން ޑީ އިން މުއްސަނދި ބުއިމެކެވެ. ހަމައެހެންމެ، މަސްތައް ބިނާކުރުމަށް ބޭނުންވާ މަތީ ފެންވަރުގެ ޕްރޮޓީން ކިރުން ލިބެއެވެ. މިއީ ކަސްރަތުކުރާ އަދި ބުރަ މަސައްކަތްކުރާ ފިރިހެނުންނަށް ހަށިގަނޑުގެ ވަރުބަލިކަން ފިލުވައިދީ، ހަކަތަ ލިއްބައިދޭ މުހިއްމު މަސްދަރެކެވެ.
ދުުޅަހެޔޮ ސިއްހަތެއްގައި ހުރުމަށްޓަކައި ކިރުގެ ބޭނުންތެރިކަން ނުހަނު ބޮޑެވެ. އުމުރުން ދުވަސްވުމުން ދިމާވާ ކަށި ފީވުމުގެ މައްސަލަތަކުން ރައްކާތެރިވުމަށާއި، ދިފާއީ ނިޒާމު ވަރުގަދަކުރުމަށް ކޮންމެ ދުވަހަކު ކިރު ބުއިމަކީ މުހިއްމު ކަމެކެވެ. އަދި ހިތުގެ ބަލިތަކުންނާއި ލޭގެ ޕްރެޝަރު ކޮންޓްރޯލް ކުރުމަށްވެސް ކިރު އެހީތެރިވެދެއެވެ.
ކިރަކީ ހަމައެކަނި ކުޑަކުދިންގެ ބުއިމެއް ކަމަށް ދެކޭ ދެކުން ބަދަލުކުރަން ޖެހިއްޖެއެވެ. ފިރިހެނުންގެ ހަށިގަނޑަށް ބޭނުންވާ މުހިއްމު މާއްދާތައް ހޯދުމަށާއި، ދުޅަހެޔޮ ދިރިއުޅުމެއް ބިނާކުރުމަށްޓަކައި، ކޮންމެ ދުވަހެއްގެ ކެއުމުގައި ކިރު ހިމެނުމަކީ ނުހަނު ބޭނުންތެރި ކަމެކެވެ.
