ސެންޓަކީ ހަމައެކަނި “މީރުވަސްދުވާ އެއްޗެއް” ނޫނެވެ. އެއީ ތިބާގެ ޝަހުސިއްޔަތު މީރުވަސްދުވާ ފުޅިއެއްގެ ސިފައިގައި ބޭރުކޮށްދޭ ވަސީލަތެކެވެ. އެއީ ހަނދާންތަކާއި، މިޒާޖު، އަދި ބައެއް ފަހަރު ފުޅިއެއްގެ ތެރޭގައި ބަންދުކުރެވިފައިވާ މުޅިން އާ އަމިއްލަވަންތަކަމެކެވެ.
ކާ އެއްޗެއްގެ މީރުވަސް ދުވާ ސެންޓެއް ނުވަތަ ވަރަށް ހިތްގައިމު މީހެއްގެ މަތިން ހަނދާންކޮށްދޭ ވަހެއް އެ ސެންޓަކުން ތިބާއަށް އެ އިހުސާސް ކުރެވޭނަމަ، މާނައަކީ ސެންޓުގެ ބައިތައް ތިބާއަށް މިހާރުވެސް ދެނެގަނެވިއްޖެއެވެ.
ސެންޓުތައް އެކި ގިންތިތަކަށް ބަހާލެވިފައިވަނީ ކީއްވެ؟
ސެންޓުތައް ގިންތިކުރެވެނީ އޭގައި އެކުލެވޭ މައިގަނޑު ވަސްތަކާއި (Notes) އެއިން ގެނެސްދޭ އިހުސާސްތަކުގެ މައްޗަށް ބިނާކޮށެވެ. މިއީ މިއުޒިކުގެ އެކި ބާވަތްތަކެއް ފަދަ ކަމެކެވެ. މިއީ މާ ސީރިއަސް އުސޫލުތަކެއް ނޫން ނަމަވެސް، ތިބާއަށް ކަމުދާ ވަސް ހޯދުމަށް އެހީތެރިވެދޭނެ މަގުދެއްކުމެކެވެ.
1. ގޯމަންޑް (Gourmand):
މިއީ ކާހިތްވާ ކަހަލަ މީރުވަސްތަކެވެ. މިސާލަކަށް: ވެނީލާ، ކެރަމަލް، ޗޮކްލެޓް، ކޮފީ ނުވަތަ މާމުއި ފަދަ ވަސްތަކެވެ. ތިބާގެ ގައިން މީރު ފޮނި ކާއެއްޗެއްގެ ވަސް ދުއްވަން ބޭނުންނަމަ މިއީ އެންމެ އެކަށޭނަ ގިންތިއެވެ.
2. ފްލޯރަލް (Floral):
ފިނިފެންމާ، ލިލީ, ހުވަނދުމާ, ފެންފޯއްމާ، އޮރެންޖް ބްލޮސަމް ފަދަ މަލުގެ ވަސްތަކެވެ. މިއީ ނިޒާމީ އަދި ޒަމާންވީ ވަސްތަކެއް ނަމަވެސް، މިޒަމާނުގެ ފްލޯރަލް ސެންޓުތަކަކީ ވަރަށް ތާޒާ އަދި ހިތްގައިމު ވަސްތަކެކެވެ.
3. ފްރެޝް / ސިޓްރަސް (Fresh / Citrus):
ލުނބޯ، ބާގަމޮޓް، ގްރޭޕްފްރުޓް އަދި ކަނޑުގެ ތާޒާ ވަސްތަކެވެ. މިއީ ރާއްޖެ ފަދަ ހޫނު ގައުމުތަކަށް ވަރަށް އެކަށޭނަ، ތާޒާކަން ގެނެސްދޭ ވަސްތަކެކެވެ. ނަމަވެސް މި ބާވަތުގެ ސެންޓުތަކުގެ ވަސް ހުންނަ ވަގުތު އާންމުކޮށް ކުޑަވާނެއެވެ.
4. ވުޑީ (Woody):
ސޭންޑަލްވުޑް (ކެލާ)، ސީޑަވުޑް، އޫދު އަދި ވެޓިވާ ފަދަ ލަކުޑީގެ ވަސްތަކެވެ. މިއީ ތަންކޮޅެއް މޫސީގީ، އަދި އަގުބޮޑު ފާޑެއް ޖަހާ ވަސްތަކެކެވެ. ހަންގަނޑުގައި މި ވަސް ގިނައިރު ހަރުލާފައި ހުރެއެވެ.
5. އޮރިއެންޓަލް / އެމްބަރ (Oriental / Amber):
މިއީ ހޫނު، ކުޅި، އަދި ފޮނި ވަސްތަކެކެވެ. ވެނީލާއާއި އެކި ބާވަތުގެ ހަވާދުގެ ވަސް މީގައި އެކުލެވިގެންވެއެވެ. މި ބާވަތުގެ ސެންޓުތައް ރޭގަނޑުގެ ވަގުތުތަކާއި އޭސީ ކުރެވިފައިވާ ތަންތަނުގައި ބޭނުންކުރުމަށް ވަރަށް ފުރިހަމައެވެ.
🌼ތިބާއަށް ކަމުދާނެ ސެންޓެއް އިޚްތިޔާރު ކުރާނީ ކިހިނެއް؟
ސެންޓެއް ގަތުމުގެ ކުރިން އަމިއްލަ ނަފްސާ މި ސުވާލުތައް ކޮށްލާށެވެ:
● މަށަށް ކަމުދަނީ ފޮނި، ތާޒާ، ކުޅި ނުވަތަ ލަކުޑީގެ ވަސް ހެއްޔެވެ؟
● މިއީ ކޮންމެ ދުވަހަކު ބޭނުންކުރާ ސެންޓެއް ހެއްޔެވެ؟ ނުވަތަ ޚާއްސަ މުނާސަބަތަކަށް ބޭނުންކުރާ ސެންޓެއް ހެއްޔެވެ؟
● މި ސެންޓު ބޭނުންކުރާނީ ހޫނު ތަނެއްގައި ހެއްޔެވެ؟ ނުވަތަ އޭސީ ގައެއް ހެއްޔެވެ؟
🌹އެންމެ މުހިންމު ނުކުތާ:
ސެންޓު ޓެސްޓުކުރާއިރު ކަރުދާސްކޮޅަށް ޖެހުމުގެ ބަދަލުގައި ހަންގަނޑަށް ޖަހައިގެން ޓެސްޓުކުރާށެވެ. ކޮންމެ މީހެއްގެ ހަންގަނޑުގެ ކެމިސްޓްރީ ތަފާތުވާނެތީ، އެކަކަށް މީރުވަސްދުވާ ސެންޓެއް އަނެކަކަށް ކަމުނުގޮސްދާނެއެވެ. އަދި ސެންޓު ޖަހާފައި ފުރަތަމަ 5 މިނެޓުން އެއަށް އިންސާފު ނުކުރާށެވެ. ވަގުތުކޮޅެއް ދިނުމުން އޭގެ އަސްލު ވަސް އެނގިގެންދާނެއެވެ.
ސެންޓުގެ ނޯޓްސް، ސިލާޖް އަދި ގިނައިރު ވަސް ދެމިހުރުން (ލޮންޖެވިޓީ) ދެނެގަތުން:
●ނޯޓްސް (Notes): ފުރަތަމަ ދުވާ ވަހަކީ “ޓޮޕް ނޯޓްސް” އެވެ. ސެންޓުގެ އަސްލު ވަހަކީ “މިޑްލް ނޯޓްސް” އެވެ. އަދި އެންމެ ފަހުން ގިނައިރު ވަސް ހުންނަ ބަޔަކީ “ބޭސް ނޯޓްސް” އެވެ.
●ސިލާޖް (Sillage): މިއީ ތިބާ ހިނގާފައި ދާއިރު ފަހަތުން ދުވާ ވަހުގެ މިންވަރެވެ. މި މިންވަރު މާ ގަދަވުމަކީ ބައެއް ފަހަރު އަނެކުންނަށް އުނދަގޫވެދާނެ ކަމެކެވެ.
●ލޮންޖެވިޓީ ނުވަތަ ގިނައިރު ވަސް ދެމިހުރުން (Longevity): މިއީ ހަންގަނޑުގައި ސެންޓުގެ ވަސް ހަރުލާފައި ހުންނަ ވަގުތެވެ. ތާޒާ ވަސްތަކަށްވުރެ ބަރު ވަސްތައް (Heavy notes) ހުންނަ ވަގުތު ގިނަވާނެއެވެ.
އީ.ޑީ.ޕީ (EDP) އަދި އީ.ޑީ.ޓީ (EDT)؟
އެއް ސެންޓެއްގެ އީ.ޑީ.ޕީ (EDP) އަދި އީ.ޑީ.ޓީ (EDT) ފުޅި ފެނުމުން، އެކަތި އަނެކައްޗަށް ވުރެ އަގުބޮޑުވެފައި، ގިނަވަގުތު ވަސް ހުންނަ ސަބަބާ މެދު ސުވާލު އުފެދިދާނެއެވެ. މީގެ މައިގަނޑު ސަބަބަކީ އޭގައި އެކުލެވޭ ސެންޓު ތެލުގެ މިންވަރު ނުވަތަ ކޮންސެންޓްރޭޝަނެވެ.
💐 އޯ ޑި ޓޮއިލެޓް (Eau de Toilette – EDT)
● ސެންޓު ތެލުގެ މިންވަރު ނިސްބަތުން މަދެވެ.
● ވަސް މާ ތާޒާވެފައި، ލުއި އިހުސާސެއް ކޮށްދޭނެއެވެ.
● ދުވާލު ގަޑިއަށާއި ހޫނު މޫސުމަށް ވަރަށް އެކަށީގެންވެއެވެ.
● އާންމުކޮށް 3 އާއި 5 ގަޑިއިރާ ދެމެދުގެ ވަގުތަކަށް ވަސް ހުންނާނެއެވެ.
● ފެށޭއިރު ވަސް ގަދަވި ނަމަވެސް، ވަރަށް އަވަހަށް މަޑުމަޑުން ވަސް ފަނޑުވެގެންދާނެއެވެ.
● މިއީ ކޮންމެ ދުވަހަކު ބޭނުންކޮށްލަން ފަސޭހަ، ލުއި ހެދުމެއް ފަދަ އެއްޗެކެވެ.
💐 އޯ ޑި ޕަރފަމް (Eau de Parfum – EDP)
● ސެންޓު ތެލުގެ މިންވަރު ގިނަވާނެއެވެ.
● ވަސް މާ ފުންވެފައި، ގަދަވާނެއެވެ.
● ގިނަވަގުތު ވަސް ހިފަހައްޓާނެއެވެ (ގާތްގަނޑަކަށް 6 އާއި 10 ގަޑިއިރަށް ވުރެ ގިނަވަގުތު).
● މީގައި “ބޭސް ނޯޓްސް” ނުވަތަ މައިގަނޑު ވަސްތަކުގެ ގޮތުގައި ވެނީލާ، ލަކުޑި (woods) އަދި އެމްބާ ނުވަތަ މާވަހަރު ފަދަ ވަސްތައް ގަދައަށް އެކުލެވިގެންވެއެވެ.
● މިއީ މާ ބޮޑަށް ފާހަގަވާ، ހަރުދަނާ އަދި ފުރިހަމަ ގޮތެއް ހުންނަ ބާވަތެވެ.
އިޚްތިޔާރު ކުރާނީ ކޮން ބާވަތެއް؟
ދިވެހިރާއްޖެ ފަދަ ހޫނުގަދަ، ތެތްފިނިކަން ބޮޑު ގައުމެއްގައި އީ.ޑީ.ޓީ (EDT) ބޭނުންކުރުމުން މާ ބޮޑަށް ގަދަވަސް ނުދުވައި ލުއިކަން އިހުސާސްކޮށްދޭނެއެވެ. ނަމަވެސް މީގެ ވަސް އަވަހަށް ފިލައިގެންދާނެއެވެ. ވަސް ގިނަވަގުތު ހުރުމާއި ވަސް ފުންވުމަށް އެދޭނަމަ، އީ.ޑީ.ޕީ (EDP) އިޚްތިޔާރު ކުރާށެވެ. އެކަމަކު ބޭނުންކުރާއިރު މާ ގިނައިން ނުޖެހުމަށް ސަމާލުކަން ދޭންވާނެއެވެ.
ސެންޓެއްގެ ވަސް “ނުހުންނަ” ކަމަށް ބުނުމުގެ ކުރިން އޭގެ ލޭބަލް ބަލައިލާށެވެ. ބައެއް ފަހަރު އެއީ ސެންޓުގެ މައްސަލައަކަށް ނުވެ، އެއީ އޭގައި ހިމެނޭ ތެލުގެ މިންވަރު މަދުވުމުން ދިމާވާ ކަމަކަށް ވެދާނެއެވެ. އަދި ވަސް ގަދަވުމަކީ އަބަދު އެންމެ ރަނގަޅު ގޮތެއް ނޫނެވެ. އެންމެ ރަނގަޅު އިޚްތިޔާރަކީ މޫސުމާއި، އަމިއްލަ ހަންގަނޑާއި އަދި ދިރިއުޅުމުގެ ވައްޓަފާޅިއާ ގުޅޭ ސެންޓެވެ.
ސެންޓަށް ލޯބިކުރާ މީހެއްގެ އެންމެ ބޮޑު ބިރު!
ރާއްޖެ ފަދަ ހޫނު ގައުމެއްގައި ސެންޓު ރައްކާކުރާނެ ގޮތް:
● ހޫނާއި، އަލި، އަދި ތެތްކަމަކީ ސެންޓުގެ ދުޝްމަނުންނެވެ.
● އަވިން ދުރުގައި ބަހައްޓާށެވެ.
● ފާހާނާ ތެރޭގައި ސެންޓު ފުޅި ނުބަހައްޓާށެވެ.
● މަތިގަނޑު އަބަދުވެސް ރަނގަޅަށް ޖަހާފައި ބަހައްޓާށެވެ.
● ފުޅި ލާފައި ހުންނަ ފޮށީގައި ބެހެއްޓުމަކީ ސެންޓު ރައްކާތެރިކޮށްދޭ ކަމެކެވެ.
💐 ސެންޓު ލޭޔަރ ކުރުން (Layering)
ލޭޔަރ ކުރުމަކީ ދެތިން ސެންޓެއް އެއްކޮށްލައިގެން އަމިއްލަ ހާއްސަ ވަހެއް އުފެއްދުމެވެ.
އެއްކަހަލަ މިޒާޖެއްގެ ވަސްތައް އެއްކޮށްލާށެވެ (ފޮނި + ފޮނި، ނުވަތަ ތާޒާ + ތާޒާ).
ވެނީލާއާއި މާވަސް، ނުވަތަ މަސްކާއި ސިޓްރަސް އެއްކޮށްލުމުން ވަރަށް ފުރިހަމަ ވަހެއް ލިބިދެއެވެ.
ސެންޓަށް ޝައުގުވެރިވާ މީހެއްގެ އެންމެ ބޮޑު ބިރަކީ ހިތްހަލާކުވުމެއް ނުވަތަ ބޭވަފާތެރިކަމެއް ނޫނެވެ. އެއީ ވަރަށް ބޮޑަށް ގަޔާވާ، އަމިއްލަ މިޒާޖާ ގުޅޭ ސެންޓެއް ފެނުމަށްފަހު، އެ ސެންޓު އުފެއްދުން ހުއްޓާލުމެވެ.
އަމިއްލަ “ސިގްނޭޗާ” ވަސް ފިހާރަތަކުން ހުސްވެ، ދެން ދުވަހަކުވެސް ނުލިބޭނެކަން އެނގުމަކީ ހިތަށް ވަރަށް ތަދުވާ ކަމެކެވެ. އެހިސާބުން، އަތުގައި ހުރި ފުޅި ބޭނުންކުރުން މަދުކޮށް، މުއްދަތު ހަމަވާ ތާރީޚު ބަލައި، އަދި އިތުރު ފުޅިއެއް ލިބޭތޯ ހޯދަން ފަށައެވެ.
“އަދި އެންމެ ފަހަރަކު ޖަހާލަން، އުންމީދަކީ މި ވަސް ހިފަހައްޓާލުން”
މިފަދައިން ހިތާހިތުން ބުނެވޭ ފަހަރު އާދެއެވެ.
އުފެއްދުން ހުއްޓާލާ ސެންޓުތަކުގެ ސަބަބުން ހަމައެކަނި ހިތްހަލާކުވަނީއެއް ނޫނެވެ. އެއީ ހަމަޖެހިގެން އުޅޭ މީހުންވެސް، ބިރުން ފުޅިތައް ފޮރުވައި، އިތުރު ފުޅިތައް ގަނެ ފުންޏަށް ޖަހަން މަޖުބޫރުކުރުވާ ކަމެކެވެ. މިއީ މިކަން ތަޖުރިބާކޮށްފައިވާ މީހަކަށް ނޫނީ އިހުސާސް ނުކުރެވޭނެ ކަމެކެވެ.
ސެންޓަކީ އަމިއްލަ އިހުސާސެކެވެ. މީގައި މާ ބޮޑު ގަވާއިދުތަކެއް ނެތެވެ. ތިބާއަށް އަމިއްލަ ނަފްސަށް އޮންނަ އިތުބާރު ބޮޑުކޮށްދީ، ހިތްހަމަޖެހުން ގެނެސްދޭ ވަހެއްނަމަ، އެ ސެންޓެއްގެ ބޭނުން އެ ފުދުނީއެވެ. ވަސް ކެނޑިއްޖެނަމަ އަލުން ޖަހާލާށެވެ. ދިރިއުޅުމަކީ ފޫހި ވަހެއްގައި އުޅެން އޮތް ކުރު ވަގުތުކޮޅެއް ނޫނެވެ.
މި ލިޔުން ޝައުގުވެރިކަމާއެކު ކިޔުއްވީތީ ވަރަށް ބޮޑަށް ޝުކުރިއްޔާއެވެ. މި މައުޟޫއާ ގުޅޭގޮތުން އަޅުގަނޑުގެ މައުލޫމާތު މުއްސަނދިކޮށްދެއްވުމުގެ ގޮތުން، ތިޔަބޭފުޅުން އެންމެ ގަޔާވާ ސެންޓަކީ ކޮބައިކަމާއި، މިހާރު ބޭނުންކުރައްވަނީ ކޮން ސެންޓެއްކަން އަދި މިހާރު އުފެއްދުން ހުއްޓާލާފައިވާ ސެންޓުތަކުގެ ތެރެއިން އެންމެ ބޮޑަށް ހަނދާންވާ ސެންޓަކީ ކޮބައިކަން ކޮމެންޓެއްގެ ސިފައިގައި ހިއްސާކޮށްލަދެއްވުން އެދެމެވެ.
ސެންޓަކީ ފުޅިއެއްގެ ތެރޭގައި ރައްކާކުރެވިފައިވާ އުފާވެރިކަމެކެވެ.🌹
