ޖުވާއަކީ އިންސާނާގެ ދިރިއުޅުން ބަރުބާދުކޮށްލާ، މުޖުތަމައުގެ ބަދަހިކަން ނަގާލާ ވަރަށް ނުރައްކާތެރި ވަބާއެކެވެ. މިއީ ހަމައެކަނި ފައިސާ ގެއްލޭ ކަމެއް ނޫނެވެ. މިއީ އިންސާނާގެ އަޚްލާޤާއި، ދީންވެރިކަމާއި، އަދި ނަފްސާނީ ދުޅަހެޔޮކަންވެސް ނައްތާލާ ބޮޑުވެގެންވާ ފާފައެކެވެ.
ޖުވާ ކުޅުމަކީ އިންސާނާގެ އަމިއްލަ ނަފްސަށާއި މުޅި މުޖުތަމައަށް އޮތް ބޮޑު ނުރައްކަލެކެވެ. ޖުވާ ކުޅޭ މީހާގެ ދިރިއުޅުމުން އަމާންކަން ގެއްލި، ހާސްކަމާއި ނުތަނަވަސްކަން އުފެދެއެވެ. މަދު ވަގުތުކޮޅެއްގެ ތެރޭގައި މުއްސަނދިވުމުގެ ދަހިވެތިކަމުގައި، އަމިއްލަ މުޅި މިލްކިއްޔާތު ގެއްލި، ދަރަނިވެރިވެ، އާއިލީ ގުޅުންތައް ކެނޑިގެންދާ ތަން ފެނެއެވެ. މިއީ އިންސާނާގެ ސިކުނޑި އެކަމަކަށް ދެވިހިފުވާ، ނަފްސާނީ ގޮތުން ބަލިކަށިކޮށްލާ ކަމަކަށް ވާތީ، މީގެ ސަބަބުން ވައްކަން ކުރުމާއި، މަކަރު ހެދުމާއި، އަދި އަމިއްލައަށް މަރުވުން ފަދަ ނުރައްކާތެރި ހާދިސާތައް މުޖުތަމައުގައި އިތުރުވެގެންދެއެވެ.
މިޒަމާނުގައި ޓެކްނޮލޮޖީގެ ކުރިއެރުމާއެކު، ޖުވާ ކުޅުމުގެ ވަބާ ވަނީ ޒުވާނުންގެ މެދުގައި ވަރަށް ބޮޑަށް ފެތުރިފައެވެ. އޮންލައިންކޮށް ކުޅޭ އެކި ކަހަލަ ގޭމްތަކާއި، ކުޅިވަރުގެ މުބާރާތްތަކަށް ބެޓްކުރުމަކީ ޒުވާނުން މަޅީގައި ޖެއްސުމަށް ބޭނުންކުރާ ވަޞީލަތްތަކެކެވެ. އަތްމަތީ ފޯނުން ފަސޭހައިން މިކަންކަމަށް ވަދެވޭތީ، ގިނަ ޒުވާނުންނަށް މިއީ ޖުވާކަން ނޭނގި ނުވަތަ އެކަމުގެ ނުރައްކާތެރިކަން ވަޒަން ނުކުރެވި، އޭގެ ތެރެއަށް ޣަރަޤުވަމުންދެއެވެ. މީގެ ސަބަބުން ޒުވާނުންގެ ކިޔެވުމާއި، ވަޒީފާއާއި، އަދި މުސްތަޤުބަލަށް އޮންނަ އަހަންމިއްޔަތުކަން ކުޑަވެ، މުޅި ޖީލު ހަލާކުގެ ތެރެއަށް ވެއްޓިގެންދެއެވެ.
އިސްލާމްދީނުގައި ޖުވާ ކުޅުމަކީ ވަރަށް ބޮޑަށް ނަހީކުރައްވާފައިވާ ޙަރާމް ކަމެކެވެ. ކީރިތި ޤުރުއާނުގައި މާތްﷲ ވަނީ ޖުވާއަކީ ޝައިޠާނާގެ އަމަލުތަކުގެ ތެރެއިންވާ ފާފަވެރި ނަޖިސް އަމަލެއްގެ ގޮތުގައި ސިފަކުރައްވާފައެވެ. ސޫރަތުލް މާއިދާގެ 90 ވަނަ އާޔަތުގައި މާތްﷲ ވަހީކުރައްވާފައިވާ ބަސްފުޅުގެ މާނައިގައިވަނީ: “އޭ އީމާން ވެއްޖެ މީސްތަކުންނޭވެ! ހަމަކަށަވަރުން، ރާއާއި، ޖުވާކުޅުމާއި، އަޅުކަންކުރަން ހަދާފައި ހުންނަ ބުދުތަކާއި ނަޞީބު ހުރިގޮތް ބަލަން ގެންގުޅޭ ދުނިދަނޑިތަކަކީ، ޝައިޠާނާގެ ޢަމަލުތަކުގެ ތެރެއިންވާ މުޑުދާރު ތަކެއްޗެވެ. ފަހެ، ތިޔަބައިމީހުން އެކަންތަކާ ދުރުވެގަންނާށެވެ! (އެއީ) ތިޔަބައިމީހުން ދިންނަވައި ނަޞީބު ލިބުމަށްޓަކައެވެ.” މި އާޔަތުން އެނގޭ ގޮތުގައި ޖުވާއަކީ އިންސާނާގެ ދުނިޔެއާއި އާޚިރަތް ބާއްޖަވެރިވުމަށް އޮތް ބޮޑު ހުރަހެކެވެ. މިއީ މީސްތަކުންގެ މެދުގައި ޢަދާވާތްތެރިކަމާއި ރުޅިވެރިކަން އުފައްދާ، ﷲ ހަނދުމަކުރުމާއި ނަމާދުން މީހާ އެއްކިބާކުރާ ކަމެކެވެ. ބާޠިލު ގޮތުގައި މީހުންގެ މުދާ ކެއުމަކީ އިސްލާމީ ޝަރީޢަތުގައި ހުއްދަ ކަމެއް ނޫނެވެ. އިސްލާމްދީން ބާރުއަޅަނީ އަމިއްލަ މަސައްކަތުން ޙަލާލު ގޮތުގައި ރިޒުޤު ހޯދުމަށެވެ.
ޖުވާގެ މި ނުރައްކާތެރި ވަބާއިން ދުރުހެލިވުމަކީ ކޮންމެ މުސްލިމެއްގެ މައްޗަށް ވާޖިބު ކަމެކެވެ. އަމިއްލަ ނަފްސާއި، އާއިލާ އަދި މުޅި މުޖުތަމައުގެ ސަލާމަތަށްޓަކައި މި ނުބައި އަމަލުން ރައްކާތެރިވާންޖެހެއެވެ. ކޮންމެ ފަރުދަކުވެސް މި ނުބައި އަމަލުން ދުރުހެލިވާންޖެހެއެވެ. ހާއްސަކޮށް ޒުވާނުން މިފަދަ މަޅިތަކުގައި ޖެހުނަ ނުދިނުމަށްޓަކައި ބެލެނިވެރިންނާއި މުޅި މުޖުތަމަޢު ހޭލުންތެރިވާންޖެހެއެވެ. ދީނީ ތަރުބިއްޔަތާއި، ޙަލާލު ގޮތުގައި މުދާ ހޯދުމުގެ ރީތި އާދަ އަށަގަންނުވައިގެން މެނުވީ މި ނުރައްކާތެރި ވަބާއިން މުޖުތަމަޢު ސަލާމަތެއް ނުކުރެވޭނެއެވެ.
