ދަތް މަޑުވުން ނުވަތަ ދަތް ހީލިކެރުވުމަކީ އަޅުގަނޑުމެންގެ ތެރޭގައި ވަރަށް ގިނަ މީހުންނަށް ދިމާވާ އުނދަގޫ މައްސަލައެކެވެ. ޚާއްސަކޮށް ފިނި އެއްޗެއް ނުވަތަ ހޫނު އެއްޗެއް ބޯލާ ވަގުތު ދަތަށް އަރާ ތަދުގެ ސަބަބުން އޭގެ އަރާމު ގެއްލިގެންދެއެވެ. ސާފުތާހިރުކަމަކީ އިސްލާމްދީނުގައި ނުހަނު ބޮޑު އަހަންމިއްޔަތުކަމެއް ދީފައިވާ ކަމަކަށްވާއިރު، އަނގައާއި ދަތުގެ ސިއްޙަތަށް ރައްކާތެރިވުމަކީ ކޮންމެ މީހެއްގެ މައްޗަށް އޮތް ޒިންމާއެކެވެ.
ދަތް މަޑުވުމަށް މެދުވެރިވާ އެންމެ ބޮޑު ސަބަބަކީ ދަތުގެ އެންމެ ބޭރު ފަށަލަ ކަމުގައިވާ “އެނަމެލް” ތުނިވުމެވެ. އެނަމެލް ތުނިވުމުން ދަތުގެ އެތެރޭގައި ހުންނަ ނާރުތަކަށް ފިނި އަދި ހޫނުގެ އަސަރު މާ އަވަހަށް ފޯރާގޮތްވެއެވެ. މީގެ އިތުރުން ފޮނި އެއްޗެއް ކާލާ ވަގުތު އެ އަރާ ކުއްލި ތަދަކީވެސް މީރު ކާއެއްޗެއް ކާލުމުގެ ޝައުޤު ނަގައިލާ ކަމެކެވެ.
ބާރަށް ދަތް އުނގުޅުމަކީ ވެސް ދަތް މަޑުވުމުގެ އެންމެ މައިގަނޑު ސަބަބަށް ހުށަހެޅޭ ކަމެކެވެ. އެގޮތުން މާ ބާރަށް ނުވަތަ ހަރު ފާނބަޅަ ހުންނަ ބުރުހަކުން ދަތް އުނގުޅުމުގެ ސަބަބުން ދަތުގެ އެނަމެލް ފަށަލަ ހަލާކުވެއެވެ. އަދި ހުތް އެއްޗެހި ގިނައިން ބޭނުންކުރުމަކީ ވެސް ދަތުގެ އެނަމެލް ފަށަލަ ގިރެން މެދުވެރިވާ ސަބަބެކެވެ.
ނިދީގައި ނުވަތަ ހާސްވުމުން ދަތް ކޭރުވުމަކީ ވަރަށް ގިނަ މީހުންނަށް ވާ ކަމެކެވެ. އެގޮތަށް ދަތް ކޭރުވުމަކީ ވެސް ދަތުގެ ބޭރު ފަށަލަ ގޭނި ހަލާކުވާ ސަބަބެކެވެ. އަދި ހިރުގަނޑު ފޭވުމުގެ ސަބަބުން ދަތުގެ މޫ އަދި ނާރުތައް ހުންނަ ހިސާބު ހާމަވުމަކީ ވެސް ދަތް މަޑުވުމުގެ އުނދަގުލާ ކުރިމަތިލާން ޖެހޭ ކަމެކެވެ.
ދަތް މަޑުވުމަކީ އެކަމަށް އެކަށީގެންވާ ފަރުވާ ހޯދައިފިނަމަ ހައްލުކުރެވޭނެ ކަމެކެވެ. އެގޮތުން ފުރަތަމަ ކަމަކަށް ދަތް އުނގުޅާ ބޭސް ބަދަލު ކުރެވިދާނެއެވެ. އެގޮތުން ދަތް މަޑުވާ ފަރާތްތަކަށް ޚާއްސަކޮށް އުފައްދާފައިވާ “ޑިސެންސިޓައިޒިންގ” ދަތް އުނގުޅާ ބޭސް ބޭނުންކުރުމުން، ދަތުގެ ނާރުތަކަށް ކުރާ އަސަރު ކުޑަކޮށްދެއެވެ. އަދި މަޑު ފާނބަޅަ ހުންނަ ބުރުހަކުން މަޑުމަޑުން ދަތް އުނގުޅުމަށް އާދަކުރުމަކީ ވެސް ދަތް މަޑުވުމުން ސަލާމަތްވުމަށް ކުރެވިދާނެ މުހިންމު ކަމެކެވެ.
މާ ގިނައިން ހަކުރު އަދި އެސިޑް ހުންނަ ތަކެތި ބޭނުންކުރުން މަދުކޮށް، ސިއްޙަތަށް ފައިދާހުރި ކާތަކެތި ބޭނުންކުރުމާއި ފްލޮރައިޑް އެކުލެވޭ މައުތުވޮޝް ނުވަތަ ޖެލް ބޭނުންކުރުމުން ދަތުގެ އެނަމެލް ވަރުގަދަކޮށްދެއެވެ. އަދި ކޮންމެ ހަ މަހަކުން ދަތުގެ ޚާއްސަ ޑޮކްޓަރަކަށް ދައްކާށެވެ. އެއީ ދަތުގެ އެއްވެސް މައްސަލައެއް އުޅޭނަމަ ކުރިއާލާ ދެނެގަތުމަށްޓަކައި ޤަވާއިދުން ޗެކަޕް ހެދުމަކީ ވެސް ވަރަށް މުހިންމު ކަމެކެވެ.
ދަތް މަޑުވުމުގެ މި އުނދަގޫ މައްސަލައަކީ އަޅާނުލާ ދޫކޮށްލަން ވާވަރަށްވުރެ ބޮޑު ކަމެކެވެ. އެހެނީ ދަތުގެ ސިއްޙަތަށް ދޭ ސަމާލުކަމަކީ މުޅި ހަށިގަނޑުގެ ދުޅަހެޔޮކަމާ ގުޅިފައިވާ ކަމެކެވެ. އެހެންކަމުން، ރަނގަޅު އާދަތަކުގެ އެހީގައި ދަތްތަކަށް ރައްކާތެރިވެ، ދަތް މަޑުވުމުގެ އުނދަގުލުން ސަލާމަތްވުމަށް މަސައްކަތް ކުރަންވާނެއެވެ.
