ޚިޔާލަކަށް ގެއްލުމަކީ ނަފުސާނީގޮތުން ވަކިވެގަތުން ކުޑަކޮށްދޭ އަދި އާންމު ބާވަތެކެވެ. މިއީ ފޫހިވުން، ހާސްކަން އިތުރުކޮށްދޭ ނުވަތަ ދިރިއުޅުމުގައި ދިމާވާ ދަތިކަންކަމާ ކުރިމަތިލާން ޖެހޭ ވަގުތުތަކުގައި ކެރިގެން އެކަމާ ކުރިމަތިލުމަށް ނުވަތަ އެ ހާލަތުން ސަލާމަތްވުމަށް ބޭނުންކުރެވޭ އުކުޅެކެވެ.
ދިގު އުނދަގޫ ފޮތެއް ކިޔަން އިނދެފައި، 10 ވަރަކަށް މިނެޓްގެ ތެރޭގައި އެއްވެސް ލަފުޒެއްވެސް ކިޔައި ނުލެވޭ ހެއްޔެވެ؟ ނުވަތަ މީޓިންނެއްގައި މީހަކު މާ ފޯރީގައި ގިނައިރު ވާހަކަދައްކާތީ އެހެން ދިމާއަކަށް ޚިޔާލުދޭ ހެއްޔެވެ؟ މިއީ ގާތްގަނޑަކަށް ކޮންމެ މީހަކަށްވެސް ކޮންމެވެސް ވަގުތެއްގައި ދިމާވާ ކަމެކެވެ.
ފޫހިވުމުން ނުވަތަ ހާސްވުމުން އެހެން ކަމެއް ކުރަން ބޭނުންވެފައި ހުންނަ ވަގުތުތަކުގައި މިފަދަ ކަންކަން ދިމާވެއެވެ. ހިތާމަވެރި ހާދިސާއެއް ނުވަތަ ތިމާގެ ގާތްމީހަކު ވަކިވެގެން ދިޔުން ފަދަ ދިރިއުޅުމުގެ ދަތިކަންކަމާ ކުރިމަތިލާން ޖެހުމުގެ ސަބަބުން ސިކުނޑި ނުސާފުވެއެވެ. މީގެއިތުރުން މާ ގިނައިރު ޚިޔާލަކަށް ގެއްލިފައި ހުރުމަކީވެސް ވަރަށް އާންމު ކަމެކެވެ. މިފަދަ ހާލަތްތަކުގައި ޚިޔާލަށް ގެއްލުމަކީ އެ ދަތި ކަންކަމުން ސަލާމަތްވުމަށް ނުވަތަ ހިތްހަމަޖެހުމެއް ހޯދުމަށް ސިކުނޑި ބޭނުންކުރާ އުކުޅެކެވެ. އެހެންކަމުން މިއީ ގޯސް އާދައެއް ނޫނެވެ.
ޚިޔާލަކަށް ގެއްލުމަކީ އަމިއްލަ ނަފުސާ ދުރަށް ދިއުން ކަމުގައި ބެލިއަސް މިއީ އާދައިގެ ކުޑަ މިންވަރެއްގެ ކަމެކެވެ. މިކަން ދިމާވާން މެދުވެރިވާ ސަބަބުތަކަކީ:
- ސިކުނޑި އޮޓޯ ޕައިލެޓަށް ދިޔުން: ގިނަފަހަރު މިކަމަށް މިމެދުވެރިވަނީ ހެދުން ފަތްޖެހުން ފަދަ ނުވަތަ އެހެނިހެން ކޮންމެވެސް އާދައިގެ ކަމެއް ކުރާ ގަޑިއެއްގައެވެ.
- ނިދިމަދުވުން: އެންމެފަހުން ރޭގަނޑުގެ ހަމަނިދިން މަހުރޫމް ވިރެއަކާ މެދު ވިސްނާލާށެވެ. މިކަމުގެ ސަބަބުން ސިކުނޑި ނުސާފުވެ، ފަސޭހައިން ސަމާލުކަން ގެއްލިގެން ދެއެވެ. މިކަމުގެ ސަބަބުން ވެހިކަލެއް ދުއްވާއިރު އެކްސިޑެންޓް ފަދަ ނުރައްކާތެރި ހާދިސާއެއް ހިނގުމަށް މެދުވެރިވެއެވެ.
- މަޢުލޫމާތު ގިނަވުން: އެއްފަހަރާ، ގިނަ އާ މަޢުލޫމާތުތަކަކާ ކުރިމަތިލާން ޖެހިއްޖެނަމަ، ތިމާ އާޝޯހުވާން ޖެހޭ ހާލަތްތަކާ ދިމާވެދާނެއެވެ. މިސާލަކަށް ބަލާލާއިރު ވަޒީފާގެ މާހައުލާއި ކޮލެޖް ނުވަަތަ މަދަރުސާގައި ވެސް މިކަހަލަ ހާލަތްތަކާ ކުރިމަތިލާން ޖެހެއެވެ. މިއީ ޚިޔާލަށް ގެއްލުން ރަނގަޅުގޮތުގައި ބޭނުންކުރެވިދާނެ ހާލަތެކެވެ. މިކަމުގެ ސަބަބުން ސިކުނޑިީގައި މައުލޫމާތު ޕުރޮސެސް ވާން ފަސޭހަވެގެން ދެއެވެ.
- ހާސްވުމާޢި ނަފްސާނީ ބޮޑެތި ކަންކަން: މާ ބޮޑަށް ހާސްވުމުން ނުވަތަ ދިރިއުޅުމުގެ ތެރޭގައި ދަތި ކަންކަމާ ދިމާވުމުން އެކަމުން ދުރުވުން އެއީ ސިކުނޑި ކުރާ ކަމެއްކަންވެސް ބައެއް މީހުންނަށް ހީވެއެވެ. މާ ބޮޑަށް ހާސްވުމުން ބައެއް މީހުންނަށް ހަނދާން ނެތުން ފަދަ ކަންކަން ދިމާވެއެވެ.
އާންމުގޮތެއްގައި ޚިޔާލަކަށް ގެއްލިފައި އިނުމަކީ ގޯސް ކަމެއް ނޫނެވެ. ސަބަބުތަކަށް ބަލާއިރު، މިއީ ސިކުނޑީގެ މަސައްކަތް ހުންނަ ގޮތަށް ބަލާއިރު ދިމާވާ ވަރަށް އާދައިގެ ކަމެކެވެ.
ރަނގަޅުކަންކަން
ޚިޔާލަށް ގެއްލިފައި އިނުމުގެ ސަބަބުން އާ އީޖާދީ ޚިޔާލުތައް އައުމަށް މަގުފަހިވެއެވެ. ހަމައެއާއެކު އުނދަގޫ މައްސަލަތަކަށް ހައްލު ހޯދަންވެސް ފަސޭހަވެއެވެ. ކުރާ ހިތްވާ ކަމެއް، މިސާލަކަށް ފޮތް ކިޔުން ނުވަތަ ގޭމް ކުޅުން ފަދަ ކަންކަން ކުރާއިރު އެކަމުގެ ތެރެއަށް މާ ބޮޑަށް ވަދެވެގަތުމުން އެކަމަކުން ލިބޭ އުފާ އިތުރުވެގެން ދެއެވެ.
މީގެ ނޭދެވޭ ބައި:
ޚިޔާލަކަށް ގެއްލިފައި ހުރުމުގެ ސަބަބުން ތިމާއަށް ނޭދެވޭ އަސަރުތަކެއް ކުރިމަތިވެއެވެ. މިސާލަކަށް ތިމާގެ ހަޔާތުގެ ބައިވެރިޔާއާ ދެބަސްވުމުން ނުވަތަ ބޮސްގެ ލެކްޗަރެއް ފަދަ އުނދަގޫ ކަމަކުން ރެކެން ބޭނުންވާނަމަ ޚިޔާލަށް ގެއްލުމުން އެ ވަގުތަށް ހާސްކަން ކުޑަވެދާނެއެވެ. އެކަމަކު އޭގެ ސަބަބުން އެ އިހުސާސްތަކާ ކުރިމަތިލާ ހައްލު ހޯދުމަށް ހުރަސްއެޅިގެން ދެއެވެ.
ހަމައެއާއެކު ރައްކާތެރިކަމުގެ މައްސަލަ ކުރިމަތިވެއެވެ. ހާއްސަކޮށް ނުދަންނަ ތަންތާނގައި ހުންނައިރު، ނުވަތަ ކޮންމެ ދުވަހަކު ދުއްވާ މަގަކުން ދުއްވާއިރުވެސް ޚިޔާލަކަށް ގެއްލިފައިހުރުމަކީ އެކްސިޑެންޓެއް ފަދަ ނުރައްކާތެރިކަމެއް ހިނގަން މެދުވެރިވެދާނެ ސަބަބެކެވެ. ކިތަންމެ ރަނގަޅަށް މަގު އެނގިފައިވީނަމަވެސް ސަމާލުކަން ގެއްލުމަކީ ނުރައްކާތެރި ކަމެކެވެ. ހިތާމަވެރި ހާދިސާތަކުން ސަލާމަތް ނުވެވިދާނެ ހާލަތްތަކުގައި ހާއްސަކޮށް ކުޑަކުދިންނަށް މިއީ އަމިއްލަ ނަފްސު ރައްކާތެރިކުރަން ކުރެވޭ ކަމެކެވެ. އެކަމަކު ސަލާމަތްވެވޭ ފަދަ ހާލަތްތަކުގައި މިއީ އެންމެ ރަނގަޅު ގޮތަކަށްވެސް ނުވެދާނެއެވެ. ހުރިހާ ކަމެއްގައި މިގޮތަށް ޚިޔާލަށް ގެއްލޭނަމަ މައްސަލަތައް ހައްލުކުރަން ބޭނުންކުރެވޭނެ އުކުޅުތައް ބޭނުންކުރަން ދަސްނުވެދާނެއެވެ.
ސަމާލުކަން އަނބުރާ ހޯދާނެ ގޮތް:
ގޭތެރޭގެ މަސައްކަތް ނުވަތަ މާ ބޮޑު ވިސްނުމެއް ބޭނުންނުވާ ކަންކަން ކުރާއިރު ޚިޔާލީ ދުނިޔެއަކަށް ގެއްލިފައި ހުރުމަކީ މައްސަލައެއް ނޫނެވެ. އެކަމަކު ބޮޑު މަޝްރޫއަކާ ބެހޭ މުހިއްމު މައުލޫމާތުތަކެއް ވެރިޔާ ކިޔައިދޭއިރު ޚިޔާލަށް ގެއްލުމަކީ އެހާ ރަނގަޅު ކަމެއް ނޫނެވެ. އެކަށީގެންނުވާ ވަގުތުތަކުގައި މިގޮތަށް ޚިޔާލަށް ގެއްލޭނަމަ ބޭނުންވާ ވަގުތު ސަމާލުކަން ހޯދުމަށް ތިރީގައިމިވާ އުކުޅުތައް ބޭނުންކުރެވިދާނެއެވެ.
1. ގްރައުންޑިންގް:
ޚިޔާލަށް ގެއްލުން ހުއްޓުވަން ބޭނުންވާ ވަގުތުތަކުގައި “ގްރައުންޑިންގް” އުކުޅުތަކަކީ ވަރަށް ބޮޑު އެހީއަކަށް ވާނެއެވެ. ގްރައުންޑިންގް އަކީ މިހާރު ހިނގަމުންދާ ވަގުތުގައި ތިމާ ސާބިތުވެ ހުރުމަށްޓަކައި ކުރެވޭ ކަންކަމެވެ.
މިގޮތަށް ކުރެވިދާނެ ކަންކަމަށް ބަލާއިރު:-
- ބާރުގަދަ ވަހެއް ހުންނަ އެއްޗަކުން ވަސް ބެލުން. މިސާލަކަށް އެސެންޝަލް އޮއިލް ފަދަ އެއްޗެއް.
- ހުރިތަނުގައި ހުރެ ހަށިގަނޑު ދަމާލުން ނުވަތަ ފުންމުން.
- ފިނި ނުވަތަ ހޫނު ފެނުން އަތް ދޮވުން.
- ވަރަށް ގަދަ ރަހައެއް ހުންނަ މެޓައެއް ކެއުން ނުވަތަ އެފަދަ އެއްޗެއް ކެއުން. (މިސާލަކަށް ފޮނިތޮށި، ޕެޕަރމިންޓް ނުވަތަ ހުތް މެޓާ).
ޚިޔާލަށް ގެއްލުން ކުޑަކުރުމަށް ވަރަށް ބޮޑަށް އެހީވާނެ ކަންކަން.
- އެންމެ ގިނައިން ޚިޔާލަށް ގެއްލެނީ ކޮން ވަގުތެއްގައިތޯ ބެލުން،
- ޚިޔާލަށް ގެއްލޭކަން އެނގޭ ކޮންމެ ފަހަރަކު ކުޑަ ނޯޓެއް ލިޔެލުން.
- އަމިއްލައަށް އެކަން ނޭނގޭނަމަ ގާތް މީހެއްގެ އެހީތެރިކަން ހޯދުން.
- މިހާރުގެ ވަގުތަށް ސަމާލުކަން ދިނުން
- މިއީ ކޮންމެ ވަގުތަކުވެސް ހިނގާ ކަންކަމަށް ސަމާލުކަން ދިނުން.
- މާ ބޮޑު ވިސްނުމެއް ބޭނުންނުވާ މަސައްކަތެއް ކުރާއިރު ޚިޔާލުތައް އެހެން ދިމާލަކަށް ދިޔަ ނުދީ ކުރާ މަސައްކަތަށް ސަމާލުކަން ދިނުން. މިސާލަކަށް ތަށި ދޮންނައިރު ސައިބޯނީގެ ވަހާއި ފެނުގެ ފިނިހޫނުމިނާއި ތަށިތައް ސާފުވުމުން ލިބޭ އުފަލާ މެދު ވިސްނާށެވެ. ނޭވާލާ ކަސްރަތުތަކަކީވެސް ސަމާލުކަން ހޯދަން ވަރަށް ރަނގަޅު ކަމެކެވެ. މިއީ ދުއްވާއިރު ނުވަތަ ޓްރެފިކްގައި ޖެހިފައި އިންނައިރު ސްޓްރެސް ކުޑަކުރަންވެސް ކުރެވިދާނެ ކަމެކެވެ.
- އެހެން މީހުން ދައްކާ ވާހަކަ ރަނގަޅަށް އަޑުއެހުން: މީހަކު ވާހަކަދައްކާއިރު ޚިޔާލަށް ގެއްލޭނަމަ ‘އެކްޓިވް ލިސަނިންގް’ ބޭނުންކުރަން ފަށާށެވެ. މީގެ ތެރޭގައި ހިމެނެނީ:- ވާހަކަ އަޑުއަހާކަން އެންގުމަށް ބޯ ޖަހާލުން ފަދަ އިޝާރާތްތައް ބޭނުންކުރުންމެވެ.
- އެ މީހަކު ބުނި ވާހަކަ އޮޅުންފިލުވަން ސުވާލުކުރުން ނުވަތަ ބުނި އެއްޗެއް އަލުން ކިޔައިދިނުން.
އަމިއްލަ ނަފްސަށް އަޅާލުން
އަމިއްލަ ނަފްސަށް އަޅާލުމަކީވެސް ސްޓްރެސް ކުޑަވެ ޚިޔާލަށް ގެއްލުން މަދުވާނެކަމެކެވެ. މީގެ ތެރޭގައ ފައިދާހުރި ކާނާ ކެއުން، ހަމަނިދި ހޯދުން ނުވަތަ ކަސްރަތު ކުރުންފަދަ ކަންކަން ކުރުމުން އަމިއްލަ ނަފުސަށް ދެވޭ ސަމާލުކަން އިތުރުވެގެންދެއެވެ. މަސައްކަތުގައި ވެސް އަމިއްލައަށް ފަރުވާތެރިވުމަކީ މުހިންމު ކަމެކެވެ. ހާއްސަކޮށް ހާސްކަން ބޮޑު ވަޒީފާއެއްގައި މިއީ ވަރަށް މުހިއްމު ކަމެކެވެ. ހަށިގަނޑު ދަމާލުމާއި، އަރާމުކުރުމާއި، ހަކަތަވެރި ލުއި ކާނާ ކެއުމުން ނުވަތަ ގިނަގިނައިން ބްރޭކް ނެގުމަކީ އުފެއްދުންތެރިކަމާއި ކަންކަމަށް ފަރުވާތެރިވުން އިތުރުކޮށްދޭ ކަމެކެވެ.
އާންމުކޮށް ބުނާނަމަ ދޭތެރެއަކުން ޚިޔާލަކަށް ގެއްލުމަކީ މާ ބޮޑު މައްސަލައެއް ނޫނެވެ. ހާއްސަކޮށް ކަމެއްގެ ތެރެއަށް މާ ބޮޑަށް ވަދެވިފައި ހުންނަ ގަޑިއެއްގައި މިހެންވުމަކީ އާދައިގެ ކަމެކެވެ. އެކަމަކު އަބަދު މިހެންވާނަމަ ނުވަތަ ސިކުނޑި ސާފުނުވާހެން ހީވާނަމަ އެއީ އޭޑީއެޗްޑީ ނުވަތަ ޑިޕްރެޝަން ފަދަ ކަމެއްގެ އަލާމާތަކަށް ވެދާނެއެެވެ.
ސިއްހީ އެހީތެރިކަން ހޯދަންޖެހޭ ހާލަތްތައް
ޚިޔާލަށް ގެއްލުމުގެ އިތުރުން މި ކަންކަން ދިމާވާނަމަ ޑޮކްޓަރަކަށް ދައްކާލުން މުހިއްމެވެ. މީގެ ތެރޭގައި:-
* ސަމާލުކަން ދޭން ނުވަތަ ވަގުތު މެނޭޖްކުރަން އުނދަގޫވުން.
* އަވަހަށް ރުޅިއައުން ނުވަތަ ހާސްވުން.
* މޫޑު ކޮންޓްރޯލް ކުރަން އުނދަގޫވުން ނުވަތަ މާ ގިނަ ދުވަހު ދެރަވެފައި ހުރުން.
* އަމިއްލަ ނަފްސަށް ގެއްލުން ދިނުމުގެ ޚިޔާލު އައުން.
އަމިއްލަ ނަފުސާއި ދުރަށްދެވޭ ބައެއް ނިޝާންތައް:
* ހާސްވާ ވަގުތުތަކުގައި ޚިޔާލަށް ގެއްލުން.
* ވަށައިގެންވާ މާހައުލާ މުޅިން ގުޅުން ކެނޑުން.
* ޚިޔާލަށް ގެއްލޭކަން އަމިއްލައަށް ނޭނގުން.
* ކުރިން ދިމާވެފައިވާ ހިތާމަވެރި ހާދިސާތައް.
ކުޑަކުދިން ޚިޔާލަށް ގެއްލިފައި ހުންނައިރު ގޮވާލުމުންވެސް އެއްވެސް ޖަވާބެއް ނުދޭނަމަ އެއީ ‘އެބްސެންސް ސީޒަރ’ ނަމަކަށް ކިޔާ ފިިޓު ޖެހުމުގެ ބާވަތަކަށް ވެދާނެތީ ކުޑަކުދިންގެ ޑޮކްޓަރަކަށް ދައްކާލުމަކީ ބުއްދިވެރިކަމެކެވެ.
ނިންމުން :
ކަސްރަތު ކުރަން ހުރެފައި ނުވަތަ އެހެންވެސް ކަމެއްގައި އުޅެނިކޮށް ދޭތެރެއަކުން ކުޑަ ވަގުތުކޮޅަކަށް ޚިޔާލަކަށް ގެއްލުމަކީ ކަންބޮޑުވާންޖެހޭ ކަމެއް ނޫނެވެ. އެކަމަކު އަބަދު މިހެންވާނަމަ ނުވަތަ އަމިއްލައަށް އެކަން ނުހުއްޓުވޭނަމަ ތެރަޕިސްޓަކާ ވާހަކަދެއްކުން އެންމެ ރަނގަޅެވެ. ތެރަޕީގެ އެހީގައި މިކަން ދިމާވާ ސަބަބު ހޯދައި މީގެން ސަލާމަތްވާނެ އުކުޅުތައް ދެނެގަންނަން ޖެހެއެވެ.
