ރާއްޖޭގައި އުމުރުން 16 އަހަރުން ދަށުގެ ކުޑަކުދިން ސޯޝަލް މީޑިއާ ބޭނުންކުރުން ހަރުދަނާ އުސޫލުތަކެއްގެ ދަށުން ކޮންޓްރޯލް ކުރުމަށް ގޮވާލާ ޕެޓިޝަނެއް ހުށަހަޅައިފިއެވެ. މި ހުށަހެޅުމުގައި ހުރިހާ އުމުރެއްގެ ދަރިވަރުން ސްކޫލަށް މޯބައިލް ފޯނު ގެންދިއުން މަނާކުރުމަށް ވެސް ލަފާދީފައިވެއެވެ.
މިހާރު ސޮއިކުރަން ފަށާފައިވާ މި ޕެޓިޝަނުގައި، ކުޑަކުދިން ފޯނާއި ސޯޝަލް މީޑިއާ ބޭނުންކުރަމުންދާ ގޮތާ މެދު ހުރި ބޮޑެތި ކަންބޮޑުވުންތައް ފާހަގަކޮށްފައިވެއެވެ. ޕެޓިޝަން ހުށަހެޅި ފަރާތުން ބަޔާންކުރާ ގޮތުގައި، ރާއްޖޭގެ އެކި ސަރަހައްދުތަކުގައި ކުޑަކުދިން ޓެކްނޮލޮޖީގެ ވަސީލަތްތައް ބޭނުންކުރަމުންދާ މިންވަރު ހުރީ ނުރައްކާތެރި އަދި ކަންބޮޑުވާންޖެހޭ ފަދަ ދަރަޖައެއްގައެވެ. މީގެ އިތުރުން، ބެލެނިވެރިންނަށް އެކުދިން އިންޓަނެޓުގައި ކުރާ ކަންކަން އެދެވޭ ގޮތެއްގައި މޮނިޓަރކޮށް އިރުޝާދު ދިނުމަށް ދަތިތަކަކާ ކުރިމަތިލާންޖެހޭކަން ވެސް ފާހަގަކޮށްފައިވެއެވެ.
މި އިސްނެގުމަށް ތާއީދުކުރާ ފަރާތްތަކުން ގަބޫލުކުރާ ގޮތުގައި، މިއީ ކުދިންގެ ރައްކާތެރިކަމާއި ދުޅަހެޔޮކަން ކަށަވަރުކުރުމަށް އެޅޭ މުހިންމު ފިޔަވަޅެކެވެ. އަދި އިންޓަނެޓުގެ ޒަރީއާއިން ކުރިމަތިވެދާނެ ނުރައްކާތަކުން ކުދިން ސަލާމަތްކުރުމަށް މިކަމުގެ ސަބަބުން ބާރަކަށް ވާނެއެވެ.
މި މައުޟޫޢަށް އާންމުންގެ މެދުގައި ބަހުސް ކުރެވެމުންދާއިރު، މި ޕެޓިޝަނާ މެދު އާންމުންގެ ޚިޔާލު ހޯދުމަށް ވަނީ ހުޅުވާލާފައެވެ. ކުޑަކުދިން ސޯޝަލް މީޑިއާ ބޭނުންކުރުން ހަނިކުރުމާއި ސްކޫލަށް ފޯނު ގެންދިއުން މަނާކުރުމާ މެދު ތިޔަބޭފުޅުންގެ ދެކެވަޑައިގަންނަވަނީ ކިހިނެއްތޯއެވެ؟ މިފަދަ ފިޔަވަޅުތަކެއް އެޅުމުން ހެޔޮ ބަދަލެއް އަތުވެދާނެ ކަމަށް ގަބޫލުކުރައްވަންތޯއެވެ؟
