މާތްވެގެންވާ ރަމަޟާން މަހަކީ މުޅި އިސްލާމީ އުންމަތަށް ބަރަކާތާއި ނިޢުމަތުން ފުރިގެންވާ މަތިވެރި މޫސުމެކެވެ. މި މަތިވެރި މަސް ބެހިގެންވަނީ ތިން ބަޔަކަށެވެ. އޭގެ ތެރެއިން ފުރަތަމަ ދިހަ ދުވަހަކީ “ރަޙްމަތުގެ” ދިހަ ދުވަހެވެ. މިއީ މާތް ﷲ ގެ ތަނަވަސްވެގެންވާ ރަޙްމަތް ތަޖުރިބާކޮށް، އެކަލާނގެ އޯގާވަންތަކަމަށް އެދި ދެންނެވުމަށް ލިބޭ މަތިވެރިކަން ބޮޑުވެގެންވާ ރަނުގެ ފުރުޞަތެކެވެ.
ރަމަޟާން މަހުގެ ފުރަތަމަ ދިހަ ދުވަހުގެ މަތިވެރިކަން ވަރަށް ބޮޑެވެ. ކައު އިތުރު ރަސޫލާ ﷺ ގެ ޙަދީޘްފުޅެއްގެ މާނައިގައިވަނީ، ރަމަޟާން މަހުގެ ކުރީކޮޅަކީ ރަޙްމަތް ކަމުގައެވެ. މި ދުވަސްތަކުގައި މާތް ﷲ އެކަލާނގެ އަޅުތަކުންނަށް ރަޙްމަތުގެ ދޮރުތައް ހުޅުއްވައިދެއްވައެވެ. މިއީ އަޅުގަނޑުމެން ކުރާ ހެޔޮ އަމަލުތަކުގެ ސަވާބާއި ދަރުމަ އެތައް ގުނައަކަށް އިތުރުވެގެންދާ ވަގުތެކެވެ.
މި މަތިވެރި ދަރުމަ އާއި ސަވާބު ހޯދުމަށްޓަކައި ގިނަގުނަ މަސައްކަތްތަކެއް ކުރަންޖެހެއެވެ. އެންމެ ފުރަތަމަ ކަމަކީ ފަރުޟު ފަސް ނަމާދަށް ފަރުވާތެރިވުމެވެ. އޭގެ އިތުރުން ސުންނަތް ނަމާދުތަކާއި، ޚާއްޞަކޮށް ތަރާވީޙް ނަމާދާއި ދަމުނަމާދު ކުރުމަކީ ސަވާބު އިތުރުވާނެ ކަންކަމެވެ. ކީރިތި ޤުރުއާން ކިޔެވުމާއި، އޭގެ މާނައާ މެދު ފިކުރުކުރުމަކީ ހިތަށް މަޑުމޮޅިކަން ގެނެސްދޭނެ ކަމެކެވެ. އަދި ގިނަގިނައިން ޛިކުރުކުރުމާއި، ދުޢާކުރުމުގައި ވަގުތު ހޭދަކުރުމަކީ ރަޙްމަތަށް އެދި ދެންނެވުމަށް އޮތް އެންމެ ކުރު މަގެވެ.
މި ދުވަސްވަރު އަޅުގަނޑުމެންގެ އުޅުމާއި ގުޅުމަށް ވެސް ހެޔޮ ބަދަލުތަކެއް ގެންނަންޖެހެއެވެ. ރޯދައަށް ހުންނަ މީހާ ހަމައެކަނި ކެއުމާއި ބުއިމުން ދުރުހެލިވުމަކުން ނުފުދެއެވެ. އޭގެ ބަދަލުގައި ދޮގުހެދުމާއި، ޣީބަބުނުމާއި، ދެބައޮޑުވުމާއި، މީސްތަކުންނާ ޒުވާބުކުރުން ފަދަ ނޭދެވޭ ސިފަތަކުން ދުރުހެލިވާންޖެހެއެވެ. ރީތި އަޚްލާޤާއި، އޯގާވެރިކަމާއި، ކެތްތެރިކަން އިސްކުރުމަކީ ރޯދައިގެ ފުރިހަމަކަން އިތުރުކޮށްދޭނެ ކަމެކެވެ. އަދި ފަޤީރުންނާއި މިސްކީނުންނަށް އެހީތެރިވެ، ޞަދަޤާތް ދިނުން އިތުރުކުރުމަކީ މުޖުތަމަޢުތެރޭގައި ލޯތްބާއި ކުުލުނު ވެރިކަން އުފެދޭނެ ކަމެކެވެ.
އަޅުކަމުގައި އުޅެންވީ މިންވަރަށް ބަލާއިރު، މިއީ ހަމައެކަނި އާދައިގެ މަތިން އުޅެލަންވީ ދުވަސްތަކެއް ނޫނެވެ. ރަމަޟާން މަހުގެ ކޮންމެ ސިކުންތަކީ އަގުހުރި ވަގުތެކެވެ. އެހެންކަމުން، ބޭކާރު ވާހަކަދެއްކުމާއި، ވަގުތު ބޭކާރުވާ ފަދަ ކަންކަމުން ދުރުހެލިވެ، ވީހާވެސް ގިނަ ވަގުތު އަޅުކަމުގައި ހޭދަކުރުމަށް ގަދައަޅައި މަސައްކަތް ކުރަންޖެހެއެވެ. އަމިއްލަ ނަފްސަށްވުރެ ބޮޑަށް އާޚިރަތުގެ ބާއްޖަވެރިކަމަށް އިސްކަންދޭންޖެހެއެވެ.
އަޅުގަނޑު މެންނާއި ރަމަޟާންމަސް ބައްދަލުވުމުން، ފުރަތަމަ ދިހައެއްގެ ބޭނުން ހެޔޮގޮތުގައި ހިފައިފި މީހަކަށް، މާތް ﷲ ގެ ރަޙްމަތް އޮހިގެންދާނެކަން އެއީ އެކަލާނގެ ވަހީގެ ބަސްފުޅާއި މާތް ރަސޫލާގެ ސުންނަތުން އެނގި ސާބިތުވެފައިވާ ކަމެކެވެ. މި ދިހައެއްގައި ހޯދޭ ދަރުމަ އާއި ސަވާބަކީ އޭގެ ފަހުން އަންނަ ފާފަ ފުއްސެވުމާއި ނަރަކައިން މިންޖުވުމުގެ ދިހައަކަށް ދިއުމަށް އޮތް ބިންގަލެވެ. އެހެންކަމުން، އިޚްލާޞްތެރިކަމާއެކު މި ބަރަކާތްތެރި ދުވަސްތަކުގެ ބޭނުން ފުރިހަމައަށް ހިފުމަށް އަޒުމް ކަނޑައަޅަމާ ހިނގާށެވެ. ފަލާހާއި ކާމިޔާބާއި ނަސީބު ލިބުންއޮތީ އޭރުންނެވެ.
