އެއީ އުޖާލާ ހިތްގައިމު ހެނދުނެކެވެ. އަތޮޅު ތަޢުލީމީ މަރުކަޒުގެ ގްރޭޑް 9ގެ ދަރިވަރުން ތިބީ ނުހަނު އުފަލުންނެވެ. އެއީ އެކުދިން އެތައް ދުވަހަކު އިންތިޒާރު ކުރި އަހަރީ ޕިކްނިކް ދަތުރުގެ ދުވަހެވެ. ކޮންމެ އަހަރަކު ވެސް ތަޢުލީމީ މަރުކަޒު ގްރޭޑް 9ގައި ކިޔަވަމުން އަންނަ ކުދިން ތަޖުރިބާ ދަތުރެއް ކުރެއެވެ.

އަޙްމަދަކީ ގްރޭޑް 9ގައި ހިމެނޭ އެއް ދަރިވަރެވެ. ބަސް މަދު ހިތްހެޔޮ ކުއްޖެކެވެ. ދުވަހުން ދުވަހަށް ފިލާވަޅުތައް ނިންމާ އެއް ދަރިވަރެވެ. ކްލާހުގައި ހުރި އެންމެ އަދަބުވެރި، ކިޔެވުމަށް މޮޅު އަދި އެންމެންގެ ލޯބި ލިބިފައިވާ ދަރިވަރެވެ. އޭނާގެ މައިންބަފައިން އަޙްމަދު ދަތުރު ފޮނުވީ ސްކޫލްގެ މުދައްރިސުންނާއި މެނޭޖްމަންޓަށް އޮތް ފުރިހަމަ އިތުބާރެއްގެ މަތީގައެވެ.

ދަތުރު ދިޔަ ފަޅުރަށަށް ފޭބުމާއިއެކު، ހުރިހާ ކުދިން ވެސް މޫދަށް އެރުމަށް އަވަސްވެގަތެވެ. ނަމަވެސް، އެތަނުން ފެންނަން އޮތީ ރައްކާތެރިކަމުގެ އެއްވެސް އިންތިޒާމެއް ނެތް މަންޒަރެވެ. ސްކޫލް މެނޭޖްމަންޓުން ކުދިން ބަލަހައްޓާނެ ވަކި އުސޫލެއް ކަނޑައަޅާފައެއް ނުވެއެވެ. މުދައްރިސުންގެ ބޮޑުބައެއް ތިބީ އެއްގަމުގައި ހިޔާ ލިބޭ ގަސްތަކުގެ ދަށުގައި އަމިއްލަ ވާހަކައިގައާއި ފޯނުތަކަށް ގެއްލިފައެވެ.

“ކުދިން އުޅޭނެ ގޮތަކަށް އުޅެން ދޫކޮށްލާ. މިއީ އެކުދިން މިނިވަންކަމާއިއެކު މަޖާކޮށްލަން ލިބޭ ދުވަހެއް.” އިސް މުދައްރިސަކު ބުނި އަޑު އިވުނެވެ.

މޫދުގައި ކުދިން ސަކަރާތް ޖަހަމުން ދިޔައިރު، މޫދުގެ ހާލަތު ބަލައި، ކުދިންނަށް ފާރަވެރިވާނެ އެއްވެސް މީހަކު މޫދު ކައިރިއަކު ނެތެވެ. އަޙްމަދާއި އޭނާގެ ރަހުމަތްތެރިން ތަންކޮޅެއް ފުން ހިސާބަކަށް ދިޔައެވެ. ކުއްލިއަކަށް އޮއިވަރު ބަދަލުވެ، އަޙްމަދު ގެނބެން ފެށިއެވެ. އޭނާ އެހީއަށް އެދި އަތް ހޫރުވަމުން ދިޔައިރު، އެއްގަމުގައި ތިބި މުދައްރިސުންނަށް އެ މަންޒަރެއް ނުފެނުނެވެ. އެމީހުން ތިބީ ކާތަކެތި ތައްޔާރުކުރުމާއި ފޮޓޯ ނެގުމުގެ ފޯރީގައެވެ.

އިރުކޮޅެއް ފަހުން، މުޅި އެ މާހައުލު އެއްކޮށް ކަހަލަ ގޮތަކަށް ބަދަލުވެގެން ދިޔައީ ދަތުރު ގޮސް އުޅުނު ކުއްޖެއްގެ ހަޅޭކާއެކުއެވެ. އެ މާހައުލު ވަނީ މާޔޫސްކަމާއި ބިރުވެރިކަމުގައެވެ. ވާނުވާ ނޭނގޭ ހާލުގައެވެ. އެ ހަޅޭއްލެވުމުގެ އަޑަށް ޓީޗަރުން ދުވެ އެދިމާއަށް ދިޔައެވެ. އަދި އެތަކެއް ސުވާލުތަކެއް ކުރިއެވެ. ދަތުރު ދިޔަ ފަރާތްތަކުގެ ހިތްތަކުގައި ވަނީ ބިރުވެރިކަމެވެ.

“ކިހިނެއްވީ؟ ކަމެއް ގޯސްވީތަ؟” އެތަނުން ޓީޗަރަކު އެއްސެވެ.

“އަ.. ހު.. މަދު.” ކުއްޖަކު އަޅައަޅައިގަންނަމުން ބުނެލިއެވެ.

“އަހުމަދު ކިހިނެއްވީ؟” ޓީޗަރު ސުވާލުކޮށްލިއެވެ.

“އަހުމަދު މިތާ މޫދަށް ގެނބިއްޖެ.” އެހެން ބުނުމުން އެންމެންނަށް ވެސް ލިބުނީ ޝޮކެކެވެ. ދަތުރު ދިޔަ އެންމެން އަހުމަދު ހޯދުމަށް މަސައްކަތްކުރަން ފެށިއެވެ. ޖެޓީ މަތިންނާއި، ފީނައިގެންނާއި އެނޫން ވެސް ގޮތްގޮތަށް އަހުމަދު ހޯދުމަށް މަސައްކަތްކުރިއެވެ. ގަޑިއެއްހާއިރު ފަހުން އަޙްމަދުގެ ހަށިގަނޑު ފެނުނުއިރު، އޭނާގެ ފުރާނަ ވަނީ ހަށިގަނޑާއި ވަކިވެފައެވެ.

މި ހާދިސާގެ ތަހުގީގުން ހާމަވީ، ސްކޫލް މެނޭޖްމަންޓުން ދަތުރުގެ ކުރިން ހަދަންޖެހޭ ރިސްކް އެސެސްމަންޓް ހަދާފައި ނުވާކަމާއި، މުދައްރިސުންގެ ފަރާތުން ފެނުނު ބޮޑު އިހުމާލެވެ. އެއް އާއިލާއެއްގެ އުންމީދުތައް ފުނޑުފުނޑުވެގެން ދިޔައީ މަދު ބައެއްގެ ފަރުވާކުޑަކަމުގެ ސަބަބުންނެވެ.

އަމާނާތެއްގެ ގޮތުގައި ތިމާއާ ހަވާލުކުރެވޭ ކަންކަމުގައި ފަރުވާތެރިވުމަކީ ދީނީ އަދި އަޚުލާޤީ ވާޖިބެކެވެ. ވަކިން ޚާއްސަކޮށް، ކުޑަކުދިންގެ ޒިންމާއާ ހަވާލުވެގެން ތިބޭ ފަރާތްތަކުން އެންމެ ހިނދުކޮޅަކަށްވެސް ފަރުވާކުޑަކޮށްލުމަކީ އިއާދަނުކުރެވޭފަދަ ބޮޑު ހިތާމައަކަށް މަގުފަހިވެދާނެ ކަމެކެވެ. އިހުމާލަކީ ހަމައެކަނި ކުށެއް ނޫނެވެ. އެއީ މުޅި އުމުރަށް އުފުލަންޖެހޭ ހިތްދަތިކަމެކެވެ.

ނިމުނީ