އެފްއޭއެމް ވެޓެރަންސް ކަޕް 2026 ފުޓްބޯޅަ މުބާރާތުގެ މިއަދުގެ މެޗު ކާމިޔާބުކޮށް ހުޅުމާލޭ ވެޓަރަންސް ގުރޫޕްގެ އެއްވަނައަށް ޖެހިލައިފައެވެ.
މިއަދު ހަވީރު ބުރު ސްޕޯޓްސް އާއި ހުޅުމާލޭ ވެޓަރަންސް ބައްދަލުކުރި މެޗު ހުޅުމާލޭ ވެޓަރަންސް ކާމިޔާބުކުރީ 13-0 އިންނެވެ. މިއީ މުބާރާތުގައި މިހާތަނަށް ފެނުނު އެންމެ ތަފާތު ބޮޑު ނަތީޖާއެވެ.
މިއަދުގެ މެޗުގެ ފުރަތަމަ ލަނޑު ހުޅުމާލޭ ވެޓަރަންސްއިން ޖެހީ ފުރަތަމަ ހާފުގެ 2 ވަނަ މިނެޓުގައެވެ. މުބާރާތުގައި މިހާތަނަށް ޖެހި އެންމެ އަވަސް ލަނޑު ހުޅުމާލޭ ވެޓަރަންސްއަށް ޖަހައިދިނީ ހުސައިން ޝިމާޒްއެވެ.
ގާތްގާތުގައި ފުރުސަތުތައް ފަހިކުރަމުން ދިޔަ ހުޅުމާލޭ ވެޓަރަންސްއިން އެ ޓީމުގެ ދެވަނަ ލަނޑު ޖެހީ 24 ވަނަ މިނެޓުގައެވެ. މި ލަނޑު އެޓީމަށް ޖަހައިދިނީ މާޖިދު އެވެ.
ހުޅުމާލޭ ވެޓަރަންސްގެ ތިން ވަނަ ލަނޑު 28 ވަނަ މިނެޓުގައި ޖެހިއިރު، މި ލަނޑަކީ އެޓީމަށް ލިބުނު 5 ވަނަ ކޯނަރުން ޖެހި ލަނޑެކެވެ. މަތިމަތިން ގޯލް ކުރިމައްޗަށް ނަގައިދިން ބޯޅަ ނާފިއު މުހައްމަދު ގޯލުގެ ތެރެއަށް ފޮނުވާލީ ބޮލުންނެވެ.
ފުރަތަމަ ހާފު ނިމުމުގެ ކުރިން މުއާޒް ވަނީ ހުޅުމާލޭ ވެޓަރަންސްއަށް ހަތަރު ވަނަ ލަނޑު ޖަހައިދީފައެވެ.
ދެވަނަ ހާފުގެ ދެވަނަ މިނެޓުގައި ހުޅުމާލޭ ވެޓަރަންސްއިން 5 ވަނަ ލަނޑު ޖެހިއިރު، މި ލަނޑު އެޓީމަށް ކާމިޔާބުކޮށްދިނީ ސާއިރު އެވެ.
ހުޅުމާލޭ ވެޓަރަންސްގެ ހަވަނަ ލަނޑާއި ހަތްވަނަ ލަނޑު ގާތްގާތުގައި، 38 ވަނަ މިނެޓާއި 39 ވަނަ މިނެޓްގައި ޖަހައިދިނީ މުއާޒް އެވެ. ލަނޑު ޖަހާނެ ގިނަ ފުރުސަތުތަކެއް ހޯދި ހުޅުމާލޭ ވެޓަރަންސްގެ އަށްވަނަ ލަނޑާއި ނުވަވަނަ ލަނޑު، 47 ވަނަ މިނިޓާއި 48 ވަނަ މިނިޓްގައި ޖަހައި ހުސެއިން ޝިމާޒް ހެޓްރިކް ހެދިއެވެ.
55 ވަނަ މިނެޓްގައި ހުޅުމާލޭ ވެޓަރަންސްގެ 10 ވަނަ ލަނޑު ޒޮރީފް ޖެހިއިރު، 56 ވަނަ މިނެޓްގައި ޒިޔާދު ވަނީ 11 ވަނަ ލަނޑު ޖަހައިދީފައެވެ.
އެއްމެޗެއްގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމް 58 ވަނަ މިނިޓްގައި ޖަހައި، މި މެޗްގައި އޭނާ ޖެހި ލަނޑުގެ އަދަދު ހަތަރަކަށް ޝިމާޒް އެރުވިއިރު މިއީ ހުޅުމާލޭ ވެޓަރަންސްގެ 12 ވަނަ ލަނޑެވެ.
ފަހު ހާފުގެ ފަހު މިނެޓްގައި ހުޅުމާލޭ ވެޓަރަންސްގެ 13 ވަނަ ލަނޑު ޖަހައިދިނީ މާޖިދުއެވެ.
މި މެޗުން ލިބުނު ތިން ޕޮއިންޓާއިއެކު ހުޅުމާލޭ ވެޓަރަންސްއަށް ގުރޫޕްގެ އެއްވަނަ ލިބުނީ ފައިދާ ގޯލްގެ ތަފާތުންނެވެ.
މި މުބާރާތުގެ މެޗެއް މާދަމާ ވެސް އޮންނާނެއެވެ. މި މެޗުގައި ބައްދަލުކުރާނީ މުއިވެޔޮ ފުރެންޑްސް އާއި ނިއުރޭޑިއަންޓް އެވެ.
