ތިޔަ ބަލައިލެވުނީ ނަޓެއްލާ ގެ އިޝްތިހާރެކެވެ. ވަރަށް ފުރިހަމަދޯ އެވެ. ހަށިގަނޑަށް ފައިދާހުރި އެތަކެއް މާއްދާާތަކެއް އެކުލެވޭ ތަކެތި އެއްކޮށްފައި ހުރިކަމަށްވެސް ބުނެފިދޯ އެވެ. ނަމަވެސް ނަޓެއްލާ އަށް އަޅާފައިވާ ތަކެތީގެ މިންވަރު ދެނެގަތުމަށް ކޮށްފައިވާ ވަރަށް ކުޑަކުޑަ ތަހުލީލަކުން ދައްކަނީ ނަޓެއްލާގައި އެކުލެވިގެންވަނީ ވަރަށް ކުޑުކުޑަ ހެޒްލްނަޓް ކޮޅަކާއި ވަރަށް ގިނަ މިންވަރަކަށް ހަކުރާއި ޕާމް އޮއިލް ކަމެވެ.
އާނއެކެވެ. ނަޓެއްލާ އަކީ ޕާން ފޮތީގައި ހާކައިގެން ކައިލަން ވަރަށް މީރު އެއްޗެކެވެ. ހެޒްލްނަޓާއި ކޮކޯ ޕައުޑަރ އެކުލެވިގެންވާ ސިއްޙަތަށް ފައިދާހުރިކަމަށް ވިޔަފާރިކުރާ ފަރާތްތަކުން އިޝްތިހާރު ކުރަމުން އަންނަ އެއްޗެކެވެ.
ގިނަ ގައުމުތަކުގައި ނަޓެއްލާ އިޝްތިހާރުކުރަމުން އަންނަނީ މިއީ ހެޒްލްނަޓް ގެ ކިރީމް އެކުލެވޭ، މަސްނޫއީ ކުލައާއި ކާތަކެތި ގިނަދުވަހަށް ދެމެހެއްޓުމަށް އަޅާ ޕްރިޒަވޭޓިވްސް އެއްވެސް ވަރަކަށް އެކުލެވިގެންނުވާ، ވަރަށް ޤުދުރަތީ ސިފަތައް އެކުލެވޭ އެއްޗެއް ކަމަށެވެ. އެހެން ނަމަވެސް ނަޓެއްލާއަކީ އެބުނާހައ ސިއްޙަތަށް ފައިދާހުރި އެއްޗެއް ނޫނެވެ.
ފޮޓޯ އެޅުމަށް މަޝްހޫރު މީސްމީޑިއާއެއް ކަމަށްވާ ‘ރެޑިޓް’ ގައި އާއްމުކޮށް މިހާރު ފަތުއަޑުކިޔާފައި ފެތުރެމުން އަންނަ ފޮޓޯއަކުން ނަޓެއްލާ ފުޅިއެއްގައި އަސްލު އެކުލެވޭ ތަކެތި ވަނީ ވަރަށް ރަނގަޅަށް ދައްކާލާފައެވެ.
ނަޓެއްލާގައި މައިގަނޑު ގޮތެއްގައި ފަސް އިންގްރެޑިއެންޓްސް އެކުލެވެއެވެ. އެއީ ޕާމް އޮއިލް، ކޮކޯ، ހޭޒްލްނަޓް، ސްކިމްޑް މިލްކް ޕައުޑަރ އަދި ހަކުރެވެ. ނަމަވެސް ނަޓެއްލާގައި އެކުލެވޭ ތަކެތީގެ މިންވަރަށް ރަނގަޅަށް ބަލާލާާއިރު މައިގަނޑު ގޮތެއްގައި އެންމެ ގިނައިން އޭގައި އެކުލެވެނީ ހަކުރެވެ.
ނަޓެއްލާއިން ލިއްބައިދޭ ފައިދާތައް އެކުލެވޭ ލޭބަލް ގައި ބުނާގޮތުން، ޕާން ފޮއްޗެއްގައި ހާކައިލާ ދެ ސަމުސަލުގެ ނުވަތަ 37 ގްރާމް ނަޓެއްލާ ގައި ހުންނަނީ އެންމެ 21 ގްރާމް ހަކުރެވެ. މީގެ ހަޤީޤަތަށް ބަލާލާާއިރު ޕާންފޮތީގައި ހާކާ ނަޓެއްލާގެ ދެބައިކުޅަ އެއްބަޔަކީ ހަކުރު ކަމެވެ. ބާކީ ހުންނަނީ ޕާމް އޮއިލްގެ ސޮލިޑް ފެޓެކެވެ. ބައެއް މީހުން ބުނާގޮތުން މިއީ ކެންސަރު ޖެހުމަށް މަގުފަހިކުރުވާ މާއްދާއެކެވެ.
ފުޅީގައި ޖަހާފައިވާ ލޭބަލް ބުނާގޮތުން ނަޓެއްލާ ފުޅިއެއްގައި ހުންނަ ނަޓެއްލާގެ ކޮންމެ 12 އޯޒެއްގައި 50 އަށްވުރެން ގިނަ ހެޒްލްނަޓް ހުރެއެވެ.
ޔޫޓިއުބްގައިވާ ނަޓެއްލާ އިޝްތިހާރެއްގެ ސްނިޕްޝޮޓެއް
ނަޓެއްލާ އުފައްދާ ކުންފުނި ‘ފެރޭރޯ’ އިން ނަޓެއްލާ އާއިމެދު ބުނެފައިވަނީ ނަޓެއްލާ އަކީ މިންހެޔޮ ކެއުމެއް (ބެލެންސްޑް ޑަޔަޓެއް) ގެ އުފާ ހޯދުމަށް އެހީތެރިވެދޭ އެއްޗެއް ކަމަށެވެ.
ނަމަވެސް ނަޓެއްލާގައި އެކުލެވޭ ތަކެތީގެ މިންވަރު މިހާރު މިވަނީ ހާމަވެފައެވެ. ކެއުމަށް ނަޓެއްލާ އިޚްތިޔާރު ކުރުމާއި ނުކުރުން އެއީ ބޭނުންކުރާ ބައެއްގެ އަމިއްލަ އިޚްތިޔާރުގައިވާ ކަމެއް ނަމަވެސް، ހާމަކޮށްލެވުނު ޙަޤީޤަތާއިމެދު ވިސްނައިލުން ބުއްދިވެރިއެވެ.
