ދެކުނު އެޓްލާންޓިކް ކަނޑުގެ އެންމެ ފުނުގައި، ގާތްގަނޑަކަށް މޭލަކަށްވުރެ އަޑީގައި ދިރިއުޅޭ “(ޕްރޮމަޗޯޓިއުތިސް ސަލްކަސް) Promachoteuthis sulcus” އަކީ “އިންސާނެއްގެ ދަތްތައް ހުންނަ ކަނޑުގެ ބިރުވެރި މަޚްލޫޤެއްގެ” ގޮތުގައި ގިނަ ބަޔަކު ސިފަކުރާ، ވަރަށް މަދުން ނޫނީ ނުފެންނަ ބޯވަދިލަމަހެކެވެ.
މި މަހުގެ ބިރުވެރި ސިފައަކީ ހަގީގަތުގައި ލޮލަށް ފެންނަ ކުށްހީއެކެވެ. އިންސާނެއްގެ ދަތްތަކެއް ކަމަށް ހީވަނީ ބޯވަދިލަމަހުގެ ކުޑަ އަދި ތޫނު ތުންގަނޑުގެ ވަށައިގެން ހުންނަ ތުންފަތް ކަހަލަ ބައިތައް ލެނބިފައި ހުންނަ ގޮތުންނެވެ. އެހެން ހުރިހާ ބޯވަދިލަމަހެކޭ އެއްފަދައިން، މި މަސް ވެސް އޭގެ ޝިކާރަ ހިފައި ކެއުމަށް ބޭނުންކުރަނީ މި ބުނި ތޫނު ތުންގަނޑެވެ.
މި ބާވަތުގެ ބޯވަދިލަމަސް ޚާއްޞަވާ މައިގަނޑު ސަބަބަކީ އެއީ ފެނުން ވަރަށް ނާދިރު އެއްޗަކަށް ވުމެވެ. ސައިންޓިފިކް ތާރީޚުގައި މިހާތަނަށް ރެކޯޑު ކުރެވިފައިވަނީ މި ބާވަތުގެ އެންމެ މަހެކެވެ. އެއީ 1971 ވަނަ އަހަރު، އެކަހެރި ރަށެއް ކަމަށްވާ “ޓްރިސްޓަން ޑަ ކޫންހާ” ކައިރިން އޮޅިގެން ހިފުނު، އެންމެ އިންޗިއެއްގެ ދިގުމިން ހުރި ކުޑަކުޑަ ބޯވަދިލަމަހެކެވެ.
މި މަހުގެ ސައިންޓިފިކް ތަފްޞީލުތައް ފުރަތަމަ ލިޔެވިފައިވަނީ 2007 ވަނަ އަހަރުގައެވެ. އޭގެ ފަހުން މިހާތަނަށް މި ބާވަތުގެ ދިރިހުރި އެއްވެސް މަހެއް ނުވަތަ އިތުރު އެއްވެސް ނަމޫނާއެއް ފެނިފައެއް ނުވެއެވެ.
މީގެ އަހަރުތަކެއް ފަހުން މި މަހުގެ ފޮޓޯ ސޯޝަލް މީޑިއާގައި ވަރަށް ބޮޑަށް ފެތުރިގެން ދިޔައިރު، ގިނަ ބަޔަކު މިއީ ކަނޑުގެ ބިރުވެރި މަޚްލޫޤެއް ކަމަށް ބުންޏެވެ. ނަމަވެސް، ހަގީގަތަކީ މިއީ ބިރުވެރި އެއްޗެއް ނޫން ކަމެވެ. މިއީ ކަނޑުގެ އެންމެ ފުން ސަރަޙައްދުތަކުގައި ފޮރުވިފައިވާ، ސިއްރުތަކުން ފުރިގެންވާ ކުޑަކުޑަ ބޯވަދިލަމަހެއްގެ ވަރަށް މަދުން ނޫނީ ނުފެންނަ މަންޒަރެކެވެ.
