އެޗް.ޕީ.ވީ (ހިއުމަން ޕެޕިލޯމާ ވައިރަސް) ވެކްސިން ޖެހުމުން، ވަކި ބާވަތްތަކެއްގެ ކެންސަރު ޖެހުމުގެ ނުރައްކާ ފިރިހެން ކުދިންނާއި ޒުވާން ފިރިހެނުންގެ މެދުގައި ކުޑަކޮށްދޭކަން އެމެރިކާގައި ކުރި ބޮޑު ދިރާސާއަކުން ހާމަވެއްޖެއެވެ. މި ނަތީޖާ ފެނިފައިވަނީ ވެކްސިން ޖެހިތާ ދިހަ އަހަރުގެ ތެރޭގައެވެ.
“ޖަމާ އޮންކޮލޮޖީ” މަޖައްލާގައި ޝާއިއުކޮށްފައިވާ މި ދިރާސާގައި، އުމުރުން 9 އަހަރާއި 26 އަހަރާ ދެމެދުގެ އެއް މިލިއަނަށްވުރެ ގިނަ ފިިރިހެނުންގެ މައުލޫމާތު ވަނީ ބަލާފައެވެ. މީގެ ތެރޭގައި ވެކްސިން ޖަހާފައިވާ 510,260 މީހުންނާއި، ވެކްސިން ނުޖަހާ އެވަރުގެ އަދަދެއްގެ މީހުން ހިމެނެއެވެ.
ސައިންސްވެރިން ވަނީ ގާތްގަނޑަކަށް ދިހަ އަހަރު ވަންދެން މި މީހުންގެ ސިއްހީ ހާލަތު މޮނިޓަރކޮށްފައެވެ. މި ދިރާސާގައި ހާއްސަ ސަމާލުކަމެއް ދީފައިވަނީ އެޗް.ޕީ.ވީއާ ގުޅުންހުރި ކެންސަރުތަކަށެވެ.
ދިރާސާގެ ނަތީޖާތަކުން ދައްކާ ގޮތުގައި، ވެކްސިން ޖެހި މީހުންގެ ތެރެއިން އެޗް.ޕީ.ވީއާ ގުޅުންހުރި ބޮލާއި ކަރުގެ ކެންސަރު ޖެހިފައިވަނީ އެންމެ 40 މީހުންނަށެވެ. ނަމަވެސް ވެކްސިން ނުޖަހާ މީހުންގެ ތެރެއިން 64 މީހަކަށް މި ބަލި ޖެހިފައިވެއެވެ. މިއީ ވެކްސިން ޖެހި މީހުންނަށް މި ބަލި ޖެހުމުގެ ނުރައްކާ ބޮޑުތަނުން ކުޑަކަން އަންގައިދޭ ހެއްކެކެވެ.
މިފަދަ ކެންސަރުތަކަކީ އެހެން ކެންސަރުތަކާ އަޅާބަލާއިރު، ހާއްސަކޮށް އުމުރުން 30 އަހަރުން ދަށުގެ މީހުންނަށް ޖެހުން މަދު ބައްޔަކަށް ވީނަމަވެސް، މި ހޯދުމަކީ ވަރަށް މުހިންމު ކުރިއެރުމެއް ކަމަށް މާހިރުން ފާހަގަކުރައްވައެވެ.
މި ދިރާސާގައި އިސްކޮށް މަސައްކަތް ކުރެއްވި ޑރ. ޓައިޓޯ ކިޓާނޯ ވިދާޅުވި ގޮތުގައި، ވެކްސިންގެ ސަބަބުން ގިނަ ފައިދާތަކެއް ލިބޭއިރުވެސް، އަންހެނުންނާ އަޅާބަލާއިރު ފިރިހެނުންގެ ތެރޭގައި ވެކްސިން ޖަހާ މިންވަރު މަދެވެ. “އަންހެން ކުއްޖެއް ނުވަތަ ފިރިހެން ކުއްޖެއްވިޔަސް، ކޮންމެ ކުއްޖަކަށްވެސް އެޗް.ޕީ.ވީ ވެކްސިން ޖަހައިގެން ކެންސަރުން ރައްކާތެރިވެވިދާނެ،” އޭނާ ވިދާޅުވިއެވެ.
މާހިރުން އިތުރަށް ފާހަގަކުރެއްވި ގޮތުގައި، އެޗް.ޕީ.ވީއާ ގުޅުންހުރި ކެންސަރުތައް އުފެދުމަށް އާންމުކޮށް އެތައް އަހަރެއް ނަގައެވެ. ނަމަވެސް، ވެކްސިން ޖެހުމުގެ ސަބަބުން ކުރީބައިގައި މި ނުރައްކާ ކުޑަވާކަން އެނގުމަކީ ލިބޭ ވަރަށް ބޮޑު އުންމީދެކެވެ. މި ވެކްސިނަކީ ބޮލާއި، ކަރާއި، ފުރަގަސްފަރާތު ދޮރާއި، އަދި ފިރިހެން ހަށީގެ ކެންސަރު ފަދަ ބަލިތަކަށް މަގުފަހިކުރާ އެޗް.ޕީ.ވީ އިންފެކްޝަނުން ރައްކާތެރިކޮށްދޭ ވެކްސިނެކެވެ.
ޑރ. ކިޓާނޯ އިތުރަށް ވިދާޅުވި ގޮތުގައި، ފިރިހެން ހަށީގެ ކެންސަރާއި ފުރަގަސްފަރާތު ދޮރުގެ ކެންސަރުން ރައްކާތެރިކޮށްދިނުމުގައިވެސް މި ވެކްސިން މަސައްކަތް ކުރާނެއެވެ. ނަމަވެސް އެކަން ކަށަވަރުކޮށް ސާބިތުކުރުމަށްޓަކައި އަދިވެސް ގިނަ ދުވަސްތަކެއް ވަންދެން އިތުރު ދިރާސާތައް ކުރަންޖެހެއެވެ.
ދުނިޔޭގެ ފެންވަރުގައި ކެންސަރު ޖެހޭ މިންވަރު މަދުކުރުމަށްޓަކައި، ހުރިހާ ޖިންސެއްގެ މީހުންނަށްވެސް އެޗް.ޕީ.ވީ ވެކްސިން ދިނުމަށް ބާރުއެޅުން މުހިންމުކަމަށް މާހިރުން އިލްތިމާސްކުރައްވައެވެ.
