ދުޅަހެޔޮ ސިއްޙަތަކަށްޓަކައި ސެލްމަން މަހާއި އެވޮކާޑޯ ފަދަ އަގުބޮޑު ތަކެތީގެ ބަދަލުގައި، އާދައިގެ ކުދިމަސް ނުވަތަ ސާޑީންއަކީ އޭގެ ފައިދާ ބޮޑު އެއްޗެއްގެ ގޮތުގައި މިހާރު ވަނީ ފާހަގަވެފައެވެ. ސާޑީންއަކީ މެޓަބޮލިކް ދުޅަހެޔޮކަން އިތުރުކޮށްދީ، ހަކުރުބަލީގެ ދެވަނަ ވައްތަރު ޖެހުމުގެ ފުރުސަތު ކުޑަކޮށްދޭ ވަރުގަދަ ކާނާއެއްގެ ގޮތުގައި ދިރާސާވެރިން މިހާރު އަންނަނީ ބަލައިގަންނަމުންނެވެ.
ޔުނިވާސިޓީ އޮފް ބާސެލޯނާގެ ތަޖުރިބާކާރުން ބާސެލޯނާގައި ކުރިއަށް ގެންދިޔަ ކްލިނިކަލް ދިރާސާއަކުން ދައްކާގޮތުގައި، ހަކުރުބަލި ޖެހުމުގެ ފުރުސަތު އޮތް މީހުންގެ ތެރެއިން ޤަވާއިދުން ސާޑީން ކެއުމުގައި ބޭނުންކުރި މީހުންގެ އިންސިއުލިން ސެންސިޓިވިޓީ ރަނގަޅުވެ، ލޭގައި ހަކުރު ހުންނަ މިންވަރު ވަނީ ކޮންޓްރޯލް ކުރެވިފައެވެ.
އޯމެގާ-3 ފެޓީ އެސިޑް، ވިޓަމިން ޑީ، ކެލްސިއަމް އަދި ޕްރޮޓީން އިން މުއްސަނދިވެފައިވާ ސާޑީންގައި ހަށިގަނޑުގެ މެޓަބޮލިޒަމް ވަރުގަދަކޮށްދޭ މުހިންމު މާއްދާތަކެއް އެކުލެވިގެންވެއެވެ. މީގެ އިތުރުން، ލޭގައި ހަކުރު ހުންނަ މިންވަރު އެއްވަރެއްގައި ހިފެހެއްޓުމަށް ބޭނުންވާ ޓައުރިން އާއި އެހެނިހެން މުހިންމު ނިއުޓްރިއެންޓްތައް ސާޑީންގައި ހިމެނޭކަން ދިރާސާވެރިން ފާހަގަކުރެއެވެ.
މިއީ ބައްޔަކަށް އޮތް ސީދާ ފަރުވާއަކަށް ނުވި ނަމަވެސް، ދިގުމުއްދަތުގެ ދުޅަހެޔޮކަމަށްޓަކައި ކެއުމުގެ ތެރޭގައި ސާޑީން ހިމެނުމަކީ ޚަރަދު ކުޑަ އަދި ފަސޭހަ މަގެކެވެ. ޚާއްޞަކޮށް، މަހުގެ ބާވަތްތަކަކީ އަސާސީ ކާނާއެއްގެ ގޮތުގައި ބޭނުންކުރާ ދިވެހިރާއްޖެ ފަދަ ޤައުމުތަކަށް މިއީ ވަރަށް މުހިންމު ހޯދުމެކެވެ.
