ބޮލީވުޑް ފިލްމު “ދާދީ ކީ ޝާދީ” ގެ ރަސްމީ ޓްރެއިލަރ މިއަދު އާންމުކޮށްފިއެވެ. މި ފިލްމަކީ އާއިލާއެއްގެ ތެރޭގައި ކައިވެންޏަކާ ގުޅިގެން ހިނގާ މަޖާ އަދި ހަލަބޮލި ކަންތައްތަކެއް ދައްކުވައިދޭ ފިލްމެކެވެ.
ފިލްމުގެ މައިގަނޑު ވާހަކަ ބިނާވެފައިވަނީ އުމުރުން ދުވަސްވީ މާމައަކު ކައިވެނިކުރަން ނިންމުމާ ގުޅިގެން، އެ އާއިލާގެ ތެރޭގައި އުފެދޭ ހައިރާންކަމާއި މަޖާ ހާދިސާތަކެއްގެ މައްޗަށެވެ. ޓްރެއިލާއިން ފެންނަ ގޮތުގައި، މި އާދަޔާ ޚިލާފު ކައިވެނީގެ ސަބަބުން މުޅި އާއިލާގެ ތެރޭގައި ބޮޑު ހަލަބޮލިކަމެއް އުފެދި، އެކަކު އަނެކަކާ ދެމެދު ތަފާތު ދެބަސްވުންތަކާއި މަޖާ ކަންތައްތަކެއް ހިނގައެވެ.
މި ފިލްމު އުފެއްދުމުގެ މައިގަނޑު މަޤުސަދަކީ އާއިލީ ގުޅުންތަކުގެ ތެރޭގައި ހުންނަ ނުތަނަވަސްކަމާއި އުފާވެރިކަން، ކޮމެޑީގެ ޒަރީއާއިން ބެލުންތެރިންނަށް ގެނެސްދިނުމެވެ. ޓްރެއިލާ އާންމުކުރުމާއެކު، ގިނަ ބަޔަކު ދަނީ މިއީ ހުރިހާ އުމުރެއްގެ މީހުންނަށްވެސް ބަލާލެވޭނެ ފަދަ މުނިފޫހިފިލުވުމުގެ ފިލްމަކަށް ވާނެކަމަށް ބުނަމުންނެވެ.
ފިލްމުގެ މައިގަނޑު ތަރިންގެ ތެރޭގައި ކަޕިލް ޝަރްމާ، ނީތޫ ކަޕޫރް، ސާދިއާ ޚަތީބް، އާރް. ސަރަތުކުމާރް، ނިކަތު ހެގްޅޭ، ތޭޖަސްވިނީ ކޮލްހާޕޫރޭ، ޔަޝްޕަލް ޝަރްމާ އަދި އަލަށް ތަޢާރަފުކުރާ ރިދިމާ ކަޕޫރް ސަހާނީ ހިމެނެއެވެ. އާރްޓޭކް ސްޓޫޑިއޯސް، ބީއިންގް ޔޫ ސްޓޫޑިއޯސް އަދި ޝިމްލާ ޓޯކީސް ޕްރޮޑަކްޝަން ގުޅިގެން އުފައްދާފައިވާ މި ފިލްމު ޑައިރެކްޓްކުރީ އާޝީޝް އާރް. މޯހަންއެވެ.
ޓްރެއިލާއާއެކު ބެލުންތެރިން ފިލްމަށް ކުރާ އިންތިޒާރު ބޮޑުވެފައިވާއިރު، މި ފިލްމު ސިނަމާތަކަށް ގެންނަން ތާވަލުކޮށްފައިވަނީ އަންނަ މެއި މަހުގެ 8 ވަނަ ދުވަހުއެވެ.
