ބޮލީވުޑްގެ މަޝްހޫރު ޑައިރެކްޓަރު ސޫރަޖް ބަރްޖާތިއާގެ އާ ފިލްމު “ޔޭ ޕްރޭމް މޯލް ލިޔާ” ސިނަމާތަކަށް އަންނާނެ ތާރީޚު އިޢުލާންކޮށްފިއެވެ. އަޔުޝްމާން ކުރާނާ އަދި ޝަރްވަރީ މުހިންމު ރޯލުތަކުން ފެނިގެންދާ މި ފިލްމު ރިލީޒްކުރުމަށް ހަމަޖެހިފައިވަނީ 27 ނޮވެމްބަރު 2026 ގައެވެ.
ރާޖްޝްރީ ޕްރޮޑަކްޝަންސް އާއި މަހާވީރު ޖެއިން ފިލްމްސް ގުޅިގެން އުފައްދާ މި ފިލްމަކީ ސޫރަޖް ބަރްޖާތިއާގެ އާދަކާދައިގެ މަތިން، މުޅި އާއިލާއަށް އެކުގައި ބަލައިލެވޭނެ ފަދަ މުނިފޫހިފިލުވުމުގެ ފިލްމެކެވެ. މި ފިލްމާއެކު ރާޖްޝްރީގެ ފިލްމުތަކުން މަޝްހޫރުކަން ހޯދާފައިވާ “ޕްރޭމް” ގެ ކެރެކްޓާ 10 އަހަރުގެ މެދުކެނޑުމަކަށްފަހު އަނެއްކާވެސް ބޮޑުސްކްރީނަށް އަންނާނެއެވެ. މިއީ އަޔުޝްމާން ކުރާނާ “ޕްރޭމް” ގެ ރޯލު ކުޅޭ ފުރަތަމަ ފަހަރެވެ.
މި ފިލްމަކީ ސޫރަޖް ބަރްޖާތިއާ އެންމެ ފަހުން އުފެއްދި “އޫންޗާއީ” އަށް ފަހު ޑައިރެކްޓްކުރާ ފުރަތަމަ ފިލްމެވެ. “އޫންޗާއީ” އިން އޭނާއަށް ވަނީ އެންމެ މޮޅު ޑައިރެކްޓަރުގެ ނޭޝަނަލް ފިލްމް އެވޯޑް ލިބިފައެވެ. އަދި މި ފިލްމުގެ މިއުޒިކް ތައްޔާރުކޮށްދޭނީ “ޕްރޭމް ރަތަން ދަން ޕާޔޯ” ގައިވެސް އޭނާއާއެކު މަސައްކަތްކުރި މަޝްހޫރު މިއުޒިކް ކޮމްޕޯޒަރު ހިމޭޝް ރޭޝައްމިޔާއެވެ.
މި ފިލްމުގައި އަޔުޝްމާންއާ އެކު ބަތަލާގެ ރޯލުން ފެންނާނީ ޝަރްވަރީއެވެ. މިއީ މި ދެ ތަރިން އެކުގައި ފެންނާނެ ފުރަތަމަ ފިލްމެވެ. ފިލްމު އުފައްދާ ފަރާތުން ބުނި ގޮތުގައި، މި ފިލްމަކީ އާއިލީ ގުޅުންތަކާއި، މިއުޒިކާއި، ސަގާފީ އަގުތަކުގެ މައްޗަށް ބިނާކޮށް އުފައްދާ ފިލްމެކެވެ. 2026 ވަނަ އަހަރުގެ ނޮވެމްބަރު މަހު މި ފިލްމު ދުނިޔޭގެ އެކި ކަންކޮޅުތަކުގެ ސިނަމާތަކުގައި ދައްކަން ފަށާނެއެވެ.
