އަބޫދާބީ، ޔޫއޭއީ – ބައެއް މީހުން ކިތަންމެ ވަރަކަށް ކަސްރަތުކޮށް، ކެއުމަށް ބަލައިގެން އުޅުނު ނަމަވެސް ބަރުދަން ލުއިކުރުމަށް އުނދަގޫވާ ސަބަބު ދެނެގަތުމަށް ކުރި މަސައްކަތުން، އެކަމުގެ ފަހަތުގައިވާ މުހިންމު ޕްރޮޓީނެއް ޔޫއޭއީގެ ރިސާޗަރުން ހޯދައިފިއެވެ.
އަބޫދާބީގެ ޚަލީފާ ޔުނިވަރސިޓީގެ ދިރާސާވެރިން ކުރި މި ހޯދުމުގައި ދެނެގަނެވިފައިވަނީ ‘ZFHX3’ (ޒެޑްއެފްއެޗްއެކްސް3) ނަމަކަށް ކިޔާ ޕްރޮޓީނެކެވެ. މި ޕްރޮޓީނަކީ އިންސާނާގެ ސިކުނޑީގެ ބަނޑުހައިކަން ކޮންޓްރޯލްކުރާ މަރުކަޒު ނުވަތަ ‘ހައިޕޯތަލަމަސް’ގެ މަސައްކަތްތަކަށް ސީދާ ނުފޫޒު ފޯރުވާ އެއްޗެކެވެ.
ސައިންސްވެރިން ހާމަކުރި ގޮތުގައި، މި ޕްރޮޓީނަށް އަންނަ ބަދަލުތަކުގެ ސަބަބުން މީހާގެ މެޓަބޮލިޒަމް (ހަށިގަނޑުގައި ހަކަތަ އަންދާ މިންވަރު) އަދި ކާހިތްވުމުގެ އިހުސާސްތަކަށް ބޮޑެތި ބަދަލުތަކެއް އާދެއެވެ. މިއީ ބައެއް މީހުންނަށް ބަރުދަން ލުއިކުރުމަކީ ނުހަނު އުނދަގޫ ކަމަކަށް ވެފައިވާ މައިގަނޑު އެއް ސަބަބެވެ.
މި ދިރާސާ ކުރުމުގެ ބޭނުމަކީ ފަލަބަލީގެ މައްސަލަތަކާއި، އޭގެ ސަބަބުން ކުރިމަތިވާ ސިއްހީ އެކި މައްސަލަތަކަށް ޖެނެޓިކް ފެންވަރުގައި ހައްލެއް ހޯދުމެވެ. މި ހޯދުމުގެ ސަބަބުން، ކުރިމަގުގައި ބަރުދަން ލުއިކުރުމަށް އެހީތެރިވެދޭ އައު ފަރުވާތަކާއި ބޭސްތައް އުފެއްދުމަށް މަގުފަހިވެގެންދާނެ ކަމަށް ރިސާޗަރުން އުއްމީދު ކުރެއެވެ.
ޚަލީފާ ޔުނިވަރސިޓީން ކުރިއަށްގެންދިޔަ މި ދިރާސާގެ ނަތީޖާ މިހާރު ވަނީ ބައިނަލްއަޤްވާމީ ސައިންޓިފިކް މަޖައްލާތަކުގައި ޝާއިޢުކޮށްފައެވެ. މިއީ ދުނިޔޭގެ ފެންވަރުގައި ކުރިމަތިވެފައިވާ ފަލަބަލީގެ ބަލިމަޑުކަމަށް ހައްލެއް ހޯދުމަށް ކުރެވޭ މަސައްކަތަށް ލިބުނު ވަރަށް ބޮޑު ކުރިއެރުމެކެވެ.
