ދަރްމާ ޕްރޮޑަކްޝަނުން އުފައްދާ، ގިނަ ބަޔަކު އިންތިޒާރު ކުރަމުން އަންނަ ފިލްމު “ދޯސްތާނާ 2” ގެ ޑައިރެކްޓަރު އެޑްވައިޓް ޗަންދަން ފިލްމުން ވަކިވެއްޖެއެވެ.
މި މަޝްރޫޢާ އެޑްވައިޓް ވަކިވީ ފިލްމުގެ އުފެއްދުންތެރިކަމުގެ ވިސްނުމުގައި ޕްރޮޑިއުސަރުންނާ ޚިޔާލު ތަފާތުވުންތަކެއް އުފެދިގެންނެވެ. ޚަބަރުތައް ބުނާ ގޮތުގައި މި ފިލްމުގެ މަސައްކަތުގައި ހަތް މަސް ދުވަހު އުޅުމަށްފަހު އޭނާ ވަކިވީ ދެ ފަރާތުގެ ދެމެދުގައި އޮތް ގުޅުން ގޯސްނުވެ، ވަރަށް ރީތިކޮށެވެ. އެޑްވައިޓް ފިލްމު ގެންދަން ބޭނުންވި މިސްރާބާއި ޕްރޮޑިއުސަރުންގެ ތަޞައްވުރާ ދިމާނުވުމަކީ އޭނާ މި މަޝްރޫޢުން ވަކިވާން ޖެހުނު މައިގަނޑު ސަބަބެވެ.
“ދޯސްތާނާ 2” އަކީ ފެށުނީއްސުރެ ގިނަ ހުރަސްތަކެއް ކުރިމަތިވަމުން އަންނަ ފިލްމެކެވެ. 2008 ވަނަ އަހަރު ރިލީޒްކުރި ކާމިޔާބު ފިލްމު “ދޯސްތާނާ” ގެ ސީކުއަލްއެއް އުފައްދާނެކަން ފުރަތަމަ އިޢުލާން ކުރީ 2019 ވަނަ އަހަރުއެވެ. އޭރު ފިލްމުގެ ތަރިންގެ ގޮތުގައި ހަމަޖެއްސީ ކާތިކް އާރްޔަން، ޖާންވީ ކަޕޫރު އަދި ލަކްޝްޔާއެވެ. ނަމަވެސް އެކި ސަބަބުތަކާ ހުރެ އެ ފަހަރު ފިލްމުގެ މަސައްކަތް ވަނީ ހުއްޓާލާފައެވެ.
ދަރްމާ ޕްރޮޑަކްޝަނުން މިހާރު ވަނީ މި ފިލްމު އާ ކާސްޓަކާއެކު އަލުން ފަށާފައެވެ. މިހާރު ފިލްމުގެ މައިގަނޑު ރޯލުތަކުން ފެންނާނީ ވިކްރާންތު މަސީ އާއި ލަކްޝްޔާއެވެ. އަދި ބަތަލާގެ ރޯލަށް ބިއުޓީ ޕޭޖަންޓް ކާމިޔާބުކޮށްފައިވާ ސިނީ ޝެޓީ ގެނައުމަށް މަޝްވަރާ ކުރެވެމުންދާ ކަމަށް މަޢުލޫމާތު ލިބެއެވެ.
ފިލްމުން ވަކިވި އެޑްވައިޓް ޗަންދަން އަކީ އާމިރު ޚާންގެ “ލާލް ސިންގް ޗައްޑާ” އާއި “ސީކްރެޓް ސުޕަސްޓާ” ފަދަ ފިލްމުތަކުން ބޮޑު މަޤުބޫލުކަމެއް ހޯދާފައިވާ ޑައިރެކްޓަރެކެވެ. އޭނާ “ދޯސްތާނާ 2” އާ ގުޅުނީ ފިލްމީ ދާއިރާގެ ގިނަ ބައެއްގެ އުންމީދުތަކާ އެކުގައެވެ. ނަމަވެސް އޭނާ ވަކިވުމާއެކު، ފިލްމު ދެން ޑައިރެކްޓް ކުރާނެ ފަރާތެއް ދަރްމާ ޕްރޮޑަކްޝަނުން އަދި ހާމައެއް ނުކުރެއެވެ.
