ހިރިލަންދޫ އޮތީ ކަނޑުގެ ތެރޭގައި ފެތުރިފައިވާ އަމާން ސިއްރެއް ފަދައިންނެވެ. އެ ރަށުގެ ވަށައިގެންވަނީ ނިމުމެއް ނެތް ބޮޑު ކަނޑެވެ. އެ ކަނޑުގެ އޮއިވަރާއި ރާޅުތަކުގެ ތެރޭގައި އެ ރަށުގެ މީހުންގެ ހިތްތަކުގައި ފޮރުވިފައިވާ ކޮންމެ ސިއްރަކާއި، ބަޔާން ނުކުރެވޭ ކޮންމެ ހަޤީޤަތަކާއި، އަދި ހިތާމަތައް ވަޅުލެވިފައިވާ ކަހަލައެވެ. އާންމު ދުވަސްތަކުގައި އެ ރަށުގެ ދިރިއުޅުން އޮންނަނީ ވަރަށް އާދައިގެ ގޮތަކަށެވެ. ކުޑަކުދިންގެ ހީނލުމުގެ އަޑާއި، ބަނބުކެޔޮ ގަސްތަކުގެ ހިޔަލުގައި ތިބެގެން އަންހެނުން ދައްކާ ވާހަކަތަކުންނާއި، އަދި އިރުއޮއްސޭ ވަގުތު މަސްވެރިން އެނބުރި އަންނަ އައުމުން އެ ރަށަށް ދިރުން ގެނެސްދެއެވެ.
ނަމަވެސް، އާފިޔާގެ ކައިވެނި ކުރެވުނު ރޭ، އެ ރަށުގެ މާހައުލުން ފެނުނީ ތަފާތު ގޮތެކެވެ. ޖެހެމުންދިޔަ ވައިރޯޅިވެސް މަޑުޖެހިފައިވާ ކަހަލައެވެ. އެ ވައިރޯޅިތަކާއެކު އާފިޔާގެ ހިތަށް ބަރުކަމެއް އިޙުސާސްވަމުން ދިޔައެވެ. އޭނާ ހުރީ އޭނާގެ ކޮޓަރީގެ ފާރުގައި ހަރުކޮށްފައިވާ ކުޑަ ލޯގަނޑެއްގެ ކުރިމަތީގައެވެ. އޭނާ ލައިގެން ހުރީ އޭނާގެ މަންމަގެ ރަތްކުލައިގެ ދިވެހި ލިބާހެވެ. އެ ލިބާހުގެ ރަންކަސަބުތައް ވަނީ ދުވަސްވުމުގެ ސަބަބުން ކުލަ ފަނޑުވެފައެވެ. އެ ލިބާހަކީ ހަމައެކަނި ސަގާފީ ހެދުމެއްގެ ބަރުދަން ހުރި އެއްޗެއް ނޫނެވެ؛ އެއީ އޭނާ ބޭނުންނުވާ، މަޖުބޫރުވެފައިވާ ދިރިއުޅުމެއްގެ ބަރުދަންވެސް އުފުލައިދޭ އެއްޗެކެވެ.
މިއީ އޭނާގެ ކައިވެނީގެ ދުވަހެވެ. ނަމަވެސް، މިއީ އާ ފެށުމެއް ކަމުގެ އެއްވެސް އިޙުސާސެއް އޭނާއަކަށް ނުކުރެވެއެވެ. އޭގެ ބަދަލުގައި އޭނާއަށް އިޙުސާސްވަނީ މިއީ އަމާންދިނުމެއްގެ ގޮތުގައެވެ.
“އާފިޔާ.” ބޭރުގައި ހުރެ އޭނާގެ ބައްޕަ ގޮވައިލިއެވެ. އެ އަޑުގައި ވަނީ ވަރުބަލިކަމެވެ. އެއީ އޭނާ ކުރަން މިއުޅޭ ކަމަކީ ކޮންމެހެން ކުރަންޖެހޭ ކަމެއްކަމަށް އަމިއްލަ ނަފުސަށް ވިސްނައިދީގެން ހުރި މީހެއްގެ އަޑެވެ. “ވަގުތު ޖެހިއްޖެ.”
އާފިޔާ އޭނާގެ ހެދުމުގެ އަތްކުރީގައި ބާރަށް ހިފަހައްޓާލިއެވެ. އަދި އަޑަށް ބާރުލަމުން ބުންޏެވެ. “ލައްބަ ބައްޕާ.”
ދެން އިތުރަށް ދައްކާނެ ވާހަކައެއް ނެތެވެ. އެހެނީ، ވާހަކަ ދެއްކުމަކުން އެއްވެސް ކަމެއް ބަދަލެއް ނުވާނެއެވެ. މުޅި ރަށުތެރޭގައި އޭނާއާ ބެހޭގޮތުން ދެކެވޭ ވާހަކަތަކެއް ހުއްޓައެއް ނުލެވޭނެއެވެ. އޭނާގެ ބައްޕަ ވަނީ ދަރަނިވެރިވެފައެވެ. އެއީ މާބޮޑު އަދަދެއް ނޫން ނަމަވެސް، އެ ދަރަނީގެ ސަބަބުން އޭނާގެ އާއިލާ ވަނީ މީހުންގެ ކުރިމަތީގައި ލަދުގަންނަން ޖެހިފައެވެ. ފަޅުތެރޭގައި ތިބެގެން ކަޅުސައި ބޯން ތިބޭ މީހުން، އެ ދަރަނީގެ ވާހަކަ ދައްކަނީ މަލާމާތުގެ ރާގަކަށެވެ.
“ބަލަމާ ހިނގާ، އެ ބީރު މީހާ އޭނާއާ ކައިވެނި ކުރޭތޯ.” އެކަކު ބުންޏެވެ.
އަދި ޔޫސުފް އެކަމަށް އެއްބަސްވިއެވެ. ޔޫސުފަކީ އާފިޔާއަށްވުރެ ދިހަ އަހަރު ދޮށީ ރަށު ކައިރި ޢޮތް ރަށެއްގައި ދިރިއުޅޭ އެ ރަށަށް ދެކެފަރިތަ, އައިސްގޮސް ހަދާ މަސްވެރިޔެކެެވެ. އޭނާއަކީ ރަށުގެ މީހުންނާ ވަކިން، އެކަނިވެރި ދިރިއުޅުމެއް އުޅޭ މީހެކެވެ. އޭނާއަށް އަޑު ނީވޭތީއާއި ވާހަކަ ނުދެއްކޭތީ، މީހުން އޭނާއަށް މަލާމާތްކޮށް، ބައެއް ފަހަރު އޭނާދެކެ ބިރުވެސް ގަނެއެވެ. ކުޑަކުދިން އޭނާއާ ކައިރިވާން ޖެހިލުންވެއެވެ. ބޮޑެތި މީހުން އޭނާއާ ބެހޭގޮތުން ވާހަކަ ދައްކަނީ އޭނާއަކީ އާދައިގެ އިންސާނެއް ނޫން ކަމަށް ބަލައިގެންނެވެ.
މީހުން ބުނާ ގޮތުގައި އޭނާއަކަށް އަޑެއް ނީވެއެވެ. އޭނާއަކަށް ވާހަކައެއް ނުދެއްކެއެވެ. އޭނާއަކީ އެހެން ފިރިހެނުން ކަހަލަ މީހެއް ނޫނެވެ. އަދި މިހާރު، އެއީ އާފިޔާގެ ފިރިމީހާއެވެ.
ކައިވެނީގެ ކަންތައްތައް ނިމުނީ ވަރަށް އަވަހަށެވެ. އެތަނުގައި ތިބި މީހުންގެ މޫނުމަތިން ފެންނަނީ ފަރުވާކުޑަކަމާއި މަލާމާތެވެ. ކައިވެނި ނިމުނުއިރުވެސް އާފިޔާއަށް އެއްވެސް އުފާވެރިކަމެއް އިޙުސާސެއް ނުކުރެވުނެވެ. ޔޫސުފް އާފިޔާއާ ދިމާލަށް ބަލައިވެސް ނުލައެވެ. މީހަކު ބުނުމުން، ޔޫސުފް ވަރަށް ބީރައްޓެހި ގޮތަކަށް އާފިޔާގެ އަތުގައި ހިފާލިއެވެ. އެއީ ލޯބިން ކުރި ކަމަކަށްވުރެ ބޮޑަށް، މަޖުބޫރުން ކުރި ކަމެއް ފަދައެވެ.
އެ ދަނޑިވަޅުގައި މީހުންގެ މަލާމާތުގެ ހީނލުމުގެ އަޑު އިވުނެވެ. އާފިޔާ އިސްދަށަށް ޖެހީ ލަދުންނެއް ނޫނެވެ. ނަމަވެސް، އޭނާގެ ހިތުގައި އުފެދެމުންދިޔަ ރުޅިވެރިކަން އެހެން މީހުންނަށް ދައްކަން ބޭނުން ނުވާތީއެވެ.
ޔޫސުފްގެ ގެއަށް ދިޔުމަށް ދަތުރުކުރީ ކުޑަ ދޯންޏެއްގައެވެ. ކަނޑު އޮތީ ވަރަށް އަމާންކޮށެވެ. އާފިޔާ އިނީ ދޯނީގެ ފަހަތުގައެވެ. ޔޫސުފް އެއްވެސް ވާހަކައެއް ނުދައްކައެވެ. އޭނާ ދޯނި ދުއްވަމުން ދިޔައީ ވަރަށް ހުށިޔާރުކަމާއެކުގައެވެ. އެއްފަހަރުވެސް އާފިޔާއާ ދިމާލަށް ބަލައެއް ނުލައެވެ.
ގޭ ކައިރި އަތިރިމައްޗަށް ކައިރި ކުރުމަށްފަހު، ޔޫސުފް ފުރަތަމަ ފޭބިއެވެ. އަދި އާފިޔާއަށް ފޭބުމަށް އިޝާރާތް ކުރިއެވެ. އޭނާގެ ގެ ހުރީ އެހެން ގެތަކާ ތަންކޮޅެއް ދުރުގައެވެ. އެއީ އާދައިގެ ގެއެއް ނަމަވެސް ވަރަށް ސާފުތާހިރު ގެއެކެވެ. ގޭގެ އެތެރެއަށް ވަނުމުން އާފިޔާއަށް ހައިރާންކަމެއް ލިބުނެވެ. ހުރިހާ އެއްޗެއް ހުރީ ތަރުތީބުންނެވެ. އޭނާ ހީކުރި ކަހަލަ ބިރުވެރި ނުވަތަ ހަޑި ތަނެއް ނޫނެވެ.
ޔޫސުފް އޭނާގެ ޖީބުން ކުޑަ ނޯޓުފޮތެއް ނަގައި، އޭގައި އެއްޗެއް ލިޔުމަށްފަހު އާފިޔާއަށް ދެއްކިއެވެ. “މިއީ ކަލޭގެ ކޮޓަރި. އަހަރެން ނިދާނީ ބޭރުގައި.”
އާފިޔާ އެ ލިޔުންކޮޅު ދެތިން ފަހަރަކު ކިޔާލިއެވެ. އޭނާއަށް ޤަބޫލުކުރަން ދަތިވިއެވެ. އެރޭ އޭނާ ނިންޖެއް ނައެވެ. އޭނާ ބިރުން އޮތީ ޔޫސުފް ކޮޓަރިއަށް ވަދެފާނެތީއެވެ. ނަމަވެސް އެފަދަ އެއްވެސް ކަމެއް ނުވިއެވެ. ހަމައެކަނި އިވެނީ ރާޅުޖަހާ އަޑެވެ.
ދުވަސްތައް ފާއިތުވަމުން ދިޔައެވެ. ޔޫސުފް އަބަދުވެސް ހުންނަނީ މަޑުމައިތިރިކޮށެވެ. އޭނާ އާފިޔާއާމެދު ކަންތައް ކުރަނީ ވަރަށް ރަނގަޅަށެވެ. ނަމަވެސް، ޔޫސުފްއަށް ހަމަ އަޑެއް ނީވޭ ކަމާމެދު އާފިޔާގެ ހިތުގައި ސުވާލު އުފެދެން ފެށިއެވެ. އޭނާއަށް ފާހަގަކުރެވުނު ގޮތުގައި، ކުއްލިއަކަށް އިވޭ އަޑުތަކަށް ޔޫސުފްގެ ސަމާލުކަން ހުއްޓެއެވެ. އޭނާގެ ލޮލުން ފެންނަ ކުލަވަރުތަކުން އެއީ ބީރު މީހެއްގެ ފަރާތުން ފެންނާނެ ކަންތައްތަކެއް ނޫންކަން އާފިޔާއަށް ވިސްނުނެވެ.
އެއްދުވަހަކު ގެ ސާފުކުރަން ހުއްޓާ، އާފިޔާއަށް ކުޑަ ދަގަނޑު ފޮށްޓެއް ފެނުނެވެ. އޭގެ ތެރޭގައި ހުރީ ހަލާކުވެފައިވާ ގަޑިއަކާއި، ބައެއް ފައިސާ ފޮއްޗާއި، އަދި އަންހެނުން ބޮލުގައި ޖަހާކަހަލަ ކުޑަ ދައްޗެކެވެ. އޭގެ ކައިރީގައި އޮތް ރުމާލެއްގައި ލޭގެ ނިޝާންތަކެއް ހުއްޓެވެ.
އެރޭ، ޔޫސުފް ނިދާފައި އޮއްވާ އާފިޔާ އޭނާގެ ކައިރިއަށް ދިޔައެވެ. އަދި ވަރަށް މަޑުމަޑުން އޭނާގެ ކަންފަތާ ދިމާލަށް އަތް ގެންދިޔައެވެ. އެވަގުތު ކުއްލިއަކަށް ޔޫސުފް އާފިޔާގެ އަތުގައި ބާރަށް ހިފެހެއްޓިއެވެ. އަދި ލޯ ހުޅުވާލަމުން ބުންޏެވެ.
“ތި ކުރަނީ ކީއް؟”
އެ އަޑަކީ ވަރަށް ކުރަކި، ގިނަ ދުވަސްތަކެއް ވަންދެން ބޭނުން ނުކޮށް ހުރުމުން ބަދަލުވެފައިވާ އަޑެކެވެ. ނަމަވެސް އެއީ ސާފު އަޑެކެވެ. އާފިޔާ ގަނޑުވި ކަހަލައެވެ. “ކަލެއަށް އަޑު އިވޭދޯ؟” އާފިޔާ ސިއްރުސިއްރުން އަހާލިއެވެ.
ޔޫސުފް މަޑުމަޑުން އާފިޔާގެ އަތުން ދޫކޮށްލިއެވެ. އޭނާގެ މޫނުމަތިން ފެންނަން ފެށީ ކުރިން ދުވަހަކުވެސް ނުފެންނަ ފަދަ ނިކަމެތިކަމެކެވެ. އެއަށްފަހު، އެއްވެސް ފޮރުވުމެއް ނެތި ހަޤީޤަތް ކިޔައިދޭން ފެށިއެވެ.
އޭނާއަކީ އުފަންވީއިރު ބީރު މީހެއް ނޫނެވެ. އޭނާއަށް މަޖުބޫރުވީ ހަނުހުންނާށެވެ. ކުޑަކުއްޖަކަށް ހުރިއިރު، އޭނާއަށް ފެނުނީ ފެނިގެން ނުވާނެ ފަދަ ނުރައްކާތެރި މަންޒަރެކެވެ. އެއީ ރަށުގެ ނުފޫޒުގަދަ ބަޔަކު ހިންގި ލޭއޮހޮރުވުމެކެވެ. އެމީހުން ބޭނުންވީ އެ ސިއްރު ފޮރުވާށެވެ. އެހެންކަމުން އެ މީހުން ޔޫސުފް މަރާލުމުގެ ބަދަލުގައި، އޭނާގެ ކަންފަތާއި ބޮލަށް އަނިޔާކޮށް، ދުވަހަކުވެސް އޭނާގެ ބަހެއް އެހެން މީހަކަށް ނީވޭނެކަން ކަށަވަރު ކުރިއެވެ.
އަނިޔާގެ ސަބަބުން އޭނާގެ އަޑުއިވުމަށް ބައެއް އުނިކަން އައި ނަމަވެސް، އޭނާ މުޅިއަކުން ބީރެއް ނުވެއެވެ. އެކަމަކު ސަލާމަތްވުމަށްޓަކައި އޭނާ އިޚްތިޔާރުކުރީ ހަނުހުރުމެވެ. ދުވަސްތައް ފާއިތުވަމުން ދިޔަވަރަކަށް މުޅި ދުނިޔެ އެ ދޮގު ޤަބޫލުކުރިއެވެ. އަދި އެންމެ ފަހުން އޭނާ އަމިއްލައަށްވެސް އެގޮތް ޤަބޫލުކުރީއެވެ. އެހެނީ، އެއްވެސް މީހަކު އަޑުއަހަން ބޭނުން ނުވާނަމަ، ވާހަކަ ދެއްކުމުގެ އެއްވެސް ބޭނުމެއް ނޯންނާނެތީއެވެ.
އާފިޔާ މި ހުރިހާ ވާހަކައެއް އަޑުއެހީ ވަރަށް ކަނުލައިގެނެވެ. އޭނާގެ ހިތް ފުނޑުފުނޑުވީ ބިރުގަތުމުންނެއް ނޫނެވެ. ޔޫސުފްގެ ހާލަތު އޮޅުންފިލުމުންނެވެ. ޔޫސުފްގެ ހަނުހުރުމަކީ ހުސްކަމެއް ނޫންކަމާއި، އެއީ އޭނާގެ ފުރާނަ ސަލާމަތްކުރުމަށްޓަކައި ކުރި މަސައްކަތެއްކަން އާފިޔާއަށް ވިސްނުނެވެ.
އެ ދުވަހަށްފަހު އެ ދެމީހުންގެ ދެމެދުގައި އޮތް ގުޅުން ބަދަލުވިއެވެ.
ރޭގަނޑުގެ ހިމޭން ވަގުތުތަކުގައި އެކަކު އަނެކަކަށް ހިތުގެ ވާހަކަތައް ބަދަލުކުރަން ފެށިއެވެ. ވަޅުލެވިފައިވާ އެތައް ބަސްތަކެއް ދުލާ ހަމައަށް އައެވެ. އެކަކު އަނެކަކަށް ކުރާ އިތުބާރު އުފެދެން ފެށީ މަޖުބޫރުކަމެއް ނެތި، ހަޤީޤީ ލޯތްބާއެކުގައެވެ.
ނަމަވެސް އެއްރޭ، ކުއްލިއަކަށް ހުރިހާ ކަމެއް ބަދަލުވިއެވެ. ގޭގެ ބޭރުން ބައެއްގެ އަޑު އިވުނެވެ. އެއީ ބާރުގަދަ، ނުރައްކާތެރި ބައެއްގެ އަޑެވެ. “މީހަކު ވާހަކަ ދައްކަން ފަށައިފި.” އެތަނުން މީހަކު ބުންޏެވެ.
އާފިޔާގެ ހިތް ބާރަށް ތެޅެން ފެށިއެވެ. ޔޫސުފް އާފިޔާގެ ލޮލަށް ބަލާލިއެވެ. އެ ބެލުމުން ހުރިހާ ކަމެއް ސާފުވިއެވެ. ޔޫސުފްގެ ހަނުހުރުމަކީ އޭނާގެ ސަލާމަތެވެ. ނަމަވެސް އެ ހަނުހުރުން މިހާރު ވަނީ ނިމުމަކަށް އައިސްފައެވެ. ގޭގެ ދޮރުގައި ވަރަށް ބާރަށް ތަޅަން ފެށިއެވެ. އެއީ އިންޒާރެކެވެ.
އާފިޔާއަށް އެވަގުތު އިޙުސާސްވީ އޭނާގެ ކައިވެނީގެ ދުވަހު އިޙުސާސްވި ފަދަ ނިކަމެތިކަމެވެ. އެކަމަކު މިފަހަރު އޭނާ މަޑަކުން ނުހުރެއެވެ. އޭނާ ގޮސް ހުރީ ޔޫސުފްގެ ފަހަތަކު ނޫނެވެ. ޔޫސުފްގެ ކައިރީގައި، އޭނާއާ އެކީގައެވެ.
ޔޫސުފް ދޮރު ހުޅުވާލިއެވެ. އަދި އެތައް އަހަރަކަށްފަހު، ސާބިތުކަމާއެކު ބުންޏެވެ، “އަހަރެން ހުރިހާ ކަމެއް ހަނދާން އެބަހުރި.”
ވައިރޯޅިތައް ގޭގެ ތެރެއަށް ވަދެގަތެވެ. އެވަގުތު އެރަށަކީ ހަޤީޤަތްތައް ފޮރުވޭނެ ތަނެއް ނޫންކަން އެންމެންނަށްވެސް އެނގުނެވެ. ބައެއް ހަނުހުރުންތަކަކީ އަބަދަށް ދެމިގެންވާނެ އެއްޗެއް ނޫނެވެ. އަދި ބައެއް އަޑުތަކަކީ އަލުން އިވުމަށްފަހު، ދުވަހަކުވެސް ކަނޑުވައިނުލެވޭނެ އަޑުތަކެވެ.
އެރޭ ކަނޑުގެ ރާޅުތަކުގެ އަޑު ގަދަވިއެވެ. އެވެސް ހަޤީޤަތް ބޭރުވުމަށް އެދި ގޮވާލާ ކަހަލައެވެ. ކުރިމަތީގައި ތިބި މީހުން ތިބީ ހައިރާންވެފައެވެ. އެމީހުންގެ ކުރިމަތީގައި މިހާރު ހުރީ ބީރު މީހެއް ނޫނެވެ. އެއީ ހުރިހާ ކަމެއްގެ ހެކިވެރިޔާއެވެ. އާފިޔާއަށް އިޙުސާސްވީ އޭނާގެ ކިބައިގައި ހުރި ވަރުގަދަކަމެވެ. އެއީ އޭނާއަށް ލިބުނު އިޚްތިޔާރެކެވެ. އޭނާއަކީ މީހަކު ދިން ހަދިޔާއެއް ނޫންކަމާއި، އޭނާގެ ދިރިއުޅުމުގެ މި ހިސާބަށް އާދެވުނީ ސަބަބުތަކަކާ ހުރެކަން އޭނާއަށް ވިސްނުނެވެ.
ފަތިހުގެ ރަންއަލި ދުނިޔެއަށް ފާޅުވިއިރު، އާފިޔާގެ ރަށް ހިރިލަންދޫއަށް ފެތުރެމުން ދިޔައީ މުޅިން ތަފާތު އަޑެކެވެ. އެއީ ހަޤީޤަތުގެ އަޑެވެ. އަދި ބީރު މީހެއް ކަމަށް ދެއްކި، ނަމަވެސް ދުވަހަކުވެސް ބީރު ނުވާ ފިރިހެނެއްގެ ގުގުމާލި ވާހަކައެވެ.
(ނިމުނީ)
